គណៈប្រតិភូសភាអាមេរិក កោតសរសើរការរីកចម្រើនសេដ្ឋកិច្ចរបស់កម្ពុជា និងប្ដេជ្ញាពង្រឹងទំនាក់ទំនងទ្វេភាគី
គណៈប្រតិភូសភាអាមេរិក កោតសរសើរការរីកចម្រើនសេដ្ឋកិច្ចរបស់កម្ពុជា និងប្ដេជ្ញាពង្រឹងទំនាក់ទំនងទ្វេភាគី
ភ្នំពេញ៖ នៅរសៀលថ្ងៃទី២៨ ខែសីហា ឆ្នាំ២០២៥, សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអនុញ្ញាតឲ្យគណៈប្រតិភូសភាអាមេរិក ដឹកនាំដោយលោកស្រី Beth Van Duyne សមាជិកសភាប្រចាំរដ្ឋ Texas ចូលជួបសម្តែងការគួរសម និងពិភាក្សាការងារនៅវិមានសន្តិភាព។
ក្នុងជំនួបនេះ, លោកស្រី Beth Van Duyne បានសម្ដែងការកោតសរសើរយ៉ាងខ្លាំងចំពោះ កំណើនសេដ្ឋកិច្ចកម្ពុជាប្រកបដោយភាពធន់, ការរក្សាបាននូវ ស្ថិរភាពម៉ាក្រូសេដ្ឋកិច្ច និង អត្រាអតិផរណាទាប ក្នុងរយៈពេលប៉ុន្មានទសវត្សរ៍ចុងក្រោយនេះ។ លោកស្រីក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការដាក់ចេញនូវគោលនយោបាយដើម្បីទាក់ទាញវិនិយោគិនបរទេស។ លោកស្រីបានបញ្ជាក់ពីការពេញចិត្តចំពោះវឌ្ឍនភាពនៃទំនាក់ទំនងរវាងអាមេរិក-កម្ពុជា ជាពិសេសលើវិស័យពាណិជ្ជកម្ម និងវិនិយោគ។
ជាការឆ្លើយតប, សម្ដេចធិបតីបានស្វាគមន៍ចំពោះដំណើរទស្សនកិច្ចនេះ ដោយសង្កត់ធ្ងន់ថា វានឹងជួយជំរុញបន្ថែមទៀតនូវកិច្ចសហប្រតិបត្តិការរវាងប្រទេសទាំងពីរ។ សម្ដេចបានគូសបញ្ជាក់ថា កំណើនសេដ្ឋកិច្ចដែលកម្ពុជាសម្រេចបានគឺដោយសារការរក្សាបានសន្តិភាព និងស្ថិរភាព។
ជាមួយគ្នានេះ សម្ដេចបានសម្តែងអំណរគុណដល់អតីតប្រធានាធិបតីសហរដ្ឋអាមេរិក Donald J. Trump ដែលបានសម្របសម្រួលឲ្យមានបទឈប់បាញ់រវាងកម្ពុជា-ថៃបានឆាប់រហ័ស។ បន្ថែមលើនេះ សម្ដេចក៏បានថ្លែងអំណរគុណរដ្ឋាភិបាលអាមេរិកដែលបានកាត់បន្ថយអត្រាពន្ធនាំចូលទំនិញកម្ពុជាមកនៅត្រឹម ១៩%។
គណៈប្រតិភូសភាអាមេរិក និងសម្ដេចធិបតីក៏បានពិភាក្សាអំពីការពង្រឹងកិច្ចសហប្រតិបត្តិការលើវិស័យសំខាន់ៗរួមមាន៖ សន្តិសុខ និងការពារជាតិ, ការប្រយុទ្ធប្រឆាំងបទល្មើសឆ្លងដែន និងការធ្វើមាតុភូមិនិវត្តន៍របស់ពលរដ្ឋកម្ពុជា។ ជាមួយគ្នានេះ គណៈប្រតិភូអាមេរិកបានបញ្ជាក់ពីជំហររបស់ខ្លួនក្នុងការគាំទ្របទឈប់បាញ់ និងការវិលទៅរកសន្តិភាពឡើងវិញរវាងកម្ពុជា-ថៃ៕
