ACCB៖ មជ្ឈមណ្ឌលសង្គ្រោះ និងអភិរក្សសត្វជិតផុតពូជនៅកម្ពុជា
ACCB៖ មជ្ឈមណ្ឌលសង្គ្រោះ និងអភិរក្សសត្វជិតផុតពូជនៅកម្ពុជា
(សៀមរាប)៖ មជ្ឈមណ្ឌលអង្គរសម្រាប់ការអភិរក្សជីវៈចម្រុះ ហៅកាត់ថា ACCB ជាមជ្ឈមណ្ឌល មួយដែលបង្កើតឡើងកាលពីឆ្នាំ ២០០៣ ក្រោមជំនួយរបស់សួនសត្វមួយកន្លែងនៃប្រទេសអាល្លឺម៉ង់។ ក្រៅពីជំនួយជាហិរញ្ញវត្ថុ មជ្ឈមណ្ឌលនេះក៏ទទួលបានជំនួយបច្ចេកទេសសម្រាប់សង្គ្រោះ និងអភិរក្សសត្វព្រៃផងដែរ។
បច្ចុប្បន្ននេះ មជ្ឈមណ្ឌលកំពុងផ្ដោតលើប្រភេទសត្វជិតផុតពូជដូចជា ប្រភេទសត្វស្លាបចំនួន ៦ប្រភេទ ព្រមទាំងប្រភេទសត្វអណ្ដើកចំនួន ៦ប្រភេទ ក្នុងនោះក៏មានផងដែរនូវការអភិរក្សសត្វអណ្ដើកហ្លួង ដែលជាសត្វតំណាងជាតិ។
ដោយឡែក សម្រាប់គម្រោងសំខាន់មួយចំនួនរបស់មជ្ឈមណ្ឌលរួមមាន៖ គម្រោងស្តុកទុកចំនួនរបាយប្រជាសាស្ត្រប្រភេទពូជកម្រដើម្បីការពារកុំឲ្យផុតពូជ គម្រោងបង្កាត់ពូជ និងគម្រោងដោះលែងកូនៗ របស់សត្វទាំងនោះត្រឡប់ទៅក្នុងធនធានធម្មជាតិវិញ។
កញ្ញា Christel Griffioen នាយិកាមជ្ឈមណ្ឌលអង្គរសម្រាប់ការអភិរក្សជីវៈចម្រុះបានគូសបញ្ជាក់ថា៖ «មកដល់ពេលនេះយើងមិនទាន់បានលែងសត្វណាមួយទៅក្នុងធម្មជាតិទេ វាជាគម្រោងរយៈពេលវែង ទម្រាំងអាចលែងបានប្រហែលជា ២០ឆ្នាំឯណោះ។»
បន្ថែមពីនេះ កញ្ញាបានរៀបរាប់អំពីប្រភេទសត្វដែលមជ្ឈមណ្ឌលបានបង្កាត់ពូជបានជោគជ័យរូមមាន៖ « សត្វត្រយ៉ងចង្កុំកស ដែលទើបតែបានជោគជ័យ ហើយយើងធ្វើគម្រោងបង្កាត់ពូជសត្វខ្សឹប ក្រៅពីនោះប្រភេទអណ្ដើកចំនួន៦ប្រភេទ។»
ជាក់ស្ដែង ការបង្កាត់ពូជសត្វនីមួយៗមានភាពលំបាក និងស្មុគស្មាញ ប៉ុន្តែដោយសារនៅក្នុងមជ្ឈមណ្ឌលមានអ្នកជំនាញក្នុងការបង្កាត់ពូជ និងថែទាំសត្វច្បាស់លាស់ ក្រៅពីនោះក៏មានការបណ្ដុះបណ្ដាលធនធានជំនាញនៅក្នុងសហគមន៍ផ្ទាល់ផងដែរ ដែលពួកគាត់នឹងត្រូវធ្វើការជាមួយអ្នកជំនាញផ្ទាល់។
នាយិការមជ្ឈមណ្ឌលរូបនេះក៏បានលើកឡើងអំពីការជួយសង្គ្រោះសត្វព្រៃផងដែរ ដោយការងារសង្គ្រោះ សត្វព្រៃគឺធ្វើឡើងដោយសហការជាមួយប្រជាសហគមន៍ និងមន្ត្រីឧទ្យានុរក្សដែលជាអ្នកនៅតំបន់មូល ដ្ឋានផ្ទាល់។ លើសពីនោះ មជ្ឈមណ្ឌលក៏បានបណ្ដុះបណ្ដាលទៅដល់មន្ត្រីឧទ្យានុរក្សអំពីការជួយ សង្គ្រោះបឋមផងដែរ។
រាល់ពេលមានការរាយការណ៍ណាមួយ ក្រុមការងាររបស់មជ្ឈមណ្ឌលនឹងធ្វើដំណើរទៅយកសត្វនោះ មកសង្គ្រោះក្នុងទីតាំងមជ្ឈមណ្ឌលផ្ទាល់តែម្ដង។ ហើយសត្វព្រៃដែលមកដល់ ភាគច្រើនគឺស្ថិតក្នុង ស្ថានភាពមានរបួសស្នាម ដែលបង្កឡើងដោយអន្ទាក់ និងការបរបាញ់របស់ព្រានព្រៃជាដើម។
ប៉ុន្តែជាការសាទរមួយ ដែលសត្វភាគច្រើនដែលយកមកដល់មជ្ឈមណ្ឌលគឺមានភាគរយក្នុងការ ជាសះស្បើយច្រើន ពោលគឺមានត្រឹមតែមួយផ្នែកតូចប៉ុណ្ណោះដែលមិនអាចជួយសង្គ្រោះបាន ហើយនោះក៏ដោយសារតែសត្វនោះស្ថិតក្នុងស្ថានភាពធ្ងន់ធ្ងរខ្លាំង ឬស្ថិតនៅឆ្ងាយខ្លាំងពីមជ្ឈមណ្ឌល សង្គ្រោះពេក។
យ៉ាងណាមិញ មជ្ឈមណ្ឌលមួយនេះបានដើរតួនាទីយ៉ាងសំខាន់ក្នុងការស្រោចស្រង់ជីវិតសត្វព្រៃ ជាពិសេសសត្វដែលជិតផុតពូជនៅលើពិភពលោក។ ដូច្នេះហើយ ទៅថ្ងៃអនាគតកម្ពុជាអាចនឹង ក្លាយជាជម្រកសត្វព្រៃជិតផុតពូជជាច្រើនប្រភេទ ហើយក៏ជាទីតាំងទេសចរណ៍ធម្មជាតិដ៏មានសក្កា នុពលផងដែរ៕
