សិប្បកម្មកែច្នៃធុងដាក់សំរាមពីសំបកកង់ឡាន មិនត្រឹមតែជួយកាត់បន្ថយសំណល់ ថែមទាំងអាចរកចំណូលបានខ្ទង់ពាន់ដុល្លារក្នុងមួយខែ
សិប្បកម្មកែច្នៃធុងដាក់សំរាមពីសំបកកង់ឡាន មិនត្រឹមតែជួយកាត់បន្ថយសំណល់ ថែមទាំងអាចរកចំណូលបានខ្ទង់ពាន់ដុល្លារក្នុងមួយខែ
ជាទូទៅ គេប្រើធុងជ័រដាក់ពង្រាយតាមទីសាធារណៈ ឬតាមកន្លែងនានាដើម្បីរក្សាទុកសំរាមឲ្យមាន សណ្ដាប់ធ្នាប់។ ប៉ុន្តែជំនួសឲ្យការបង្កើតធុងសំរាមថ្មី ប្រសិនបើគេអាចកែច្នៃរបស់ដែលប្រើប្រាស់រួច ហើយ ទៅប្រើឡើងវិញ វានឹងមានផលចំណេញច្រើន។
សំបកកង់ឡានដែលប្រើប្រាស់ហើយ និយាយដោយឡែកជាប្រភេទសំរាមដែលក្រាស់ និងមិនងាយ រលាយទៅក្នុងបរិស្ថាន។ ដូច្នេះហើយបានជាសំណល់ប្រភេទនេះ គួរតែទទួលបានការយកចិត្តទុក ដាក់កែច្នៃកាន់តែច្រើន។
សិប្បកម្មធុងបរិស្ថានមួយ ផ្ដោតលើការប្រមូលយកសំបកកង់ឡានចាស់ៗមកកែច្នៃទៅជាធុងបរិស្ថាន។ សិប្បកម្មនេះបានបង្កើតឡើងតាំងតែពីឆ្នាំ ២០១០មកម្លេះ និងជាសិប្បកម្មដែលធ្វើដោយដៃសុទ្ធសាធ។
បើតាមលោកស្រី សឿង សុថារី ដែលជាម្ចាស់សិប្បកម្មបានឲ្យដឹងថា ការលក់របស់លោកស្រីគឺមិនសូវជាមានការចាប់អារម្មណ៍ប៉ុន្មានទេ កាលពីបង្កើតឡើងបាន៤ ទៅ៥ឆ្នាំដំបូង។ ប៉ុន្តែលោកស្រីថា ចន្លោះឆ្នាំ ២០១៧ ដល់ឆ្នាំ ២០១៩ ពោលគឺមុនការរីករាលដាលនៃជំងឺកូវីដ អាជីវកម្មនេះបានទទួលបានការចាប់អារម្មណ៍យ៉ាងខ្លាំងពីអតិថិជន ជាពិសេសបណ្ដាប្រជាជនដែលយល់ដឹងពីបញ្ហាបរិស្ថាន។
លោកស្រី សឿង សុថារី បានប្រាប់ពីមូលហេតុនៃការបង្កើតសិប្បកម្មនេះថា៖ «ដោយសារតែក្ដីស្រលាញ់ និងបំណងចង់ចូលរួមចំណែកជួយសង្គម ម្យ៉ាងដោយសារឃើញកាកសំណល់វាប៉ះពាល់ដល់បរិស្ថានខ្លាំង ដូច្នេះហើយទើបខ្ញុំយល់ថាបើសិនជាយើងអាចកែច្នៃជាធុងសំរាមគឺល្អមែនទែន និងម្យ៉ាងវាក៏បានផ្ដល់ឱកាសការងារទៅដល់ប្រជាជនដែលរស់នៅក្នុងតំបន់ស្រុកភូមិ លើសពីនេះវាក៏បានជួយលើកស្ទួយផលិតផលក្នុងស្រុក។»
ប៉ុន្តែយ៉ាងណា លោកស្រីបានបញ្ជាក់ថា ទម្រាំអាចបានចេញជាផលិតផលធុងបរិស្ថានមួយៗ គឺមានការលំបាកច្រើន ដោយអ្នកនាងត្រូវជួលកម្មការឲ្យដើរប្រមូលក្នុងរយៈពេល ១សប្ដាហ៍ ទៅ២សប្ដាហ៍ ទើបត្រឡប់មកកែច្នៃនៅក្នុងសិប្បកម្មវិញ។
អ្វីដែលកាន់តែលំបាក គឺសំបកកង់ឡានមានទម្ងន់ធ្ងន់ ដូច្នេះវាលំបាកក្នុងការលើកបំលាស់ទី លំបាកក្នុងការសំអាត និងលំបាកក្នុងការចៀរ ដោយសារតែវាក្រាស់ និងស្វិត។
លោកស្រីបានបន្តឲ្យដឹងទៀតថា៖ «សម្រាប់តម្រូវការ វាទៅតាមទំនោរសង្គម កាលពីមុនពេលកូវីត១៩ ការលក់របស់យើងគឺផ្ទុះខ្លាំងមែនទែន យើងលក់បានច្រើន ១ខែអាចបាន ១ពាន់ តែពេលកូវីត១៩មកដល់ក្នុង ១ខែយើងលក់មិនបាន ១០០ធុងផង តែបច្ចុប្បន្ននេះទើបការលក់របស់យើងមានសន្ទុះឡើងវិញ ពោលគឺអាចលក់បានប្រមាណ ៥០០ធុងក្នុង ១ខែ ដែលនេះជាចំនួនដែលអាចទទួលយកបានសម្រាប់យើង។»
សម្រាប់ការលក់ បច្ចុប្បន្ននេះលោកស្រីអាចលក់បានប្រមាណ ៥០០ធុង ដែលវាស្របទៅតាមលទ្ធភាពក្នុងការផលិតរបស់សិប្បកម្មរបស់លោកស្រីផងដែរ។ តែយ៉ាងណា ប្រសិនបើតម្រូវការច្រើនជាងនេះក៏សិប្បកម្មលោកស្រីមិនអាចផ្គត់ផ្គង់តម្រូវការបានទាន់ពេលវេលាដែរ ខណៈដែលសព្វថ្ងៃនេះឲ្យតែផលិតបាន គឺដឹងតែលក់អស់គ្មានសល់តែម្ដង។
រីឯចំណែកតម្លៃនៃធុងបរិស្ថាននេះ លោកស្រីបែងចែកជា២ខ្នាត គឺខ្នាតតូច ១តម្លៃ ៣៥ដុល្លារ និងខ្នាតធំមួយតម្លៃ ៤៥ដុល្លា។ ក្រៅពីនេះ អាជីវកម្មរបស់លោកស្រីក៏មានផលិតជាផលិតផលដទៃទៀតដូចជា សាឡុងកង់ឡានសម្រាប់ដាក់តាំងលម្អក្នុងគេហដ្ឋាន រូបសត្វកែច្នៃ ផើងផ្កា ឧបករណ៍ដាក់ចំណីសត្វជាដើម។
បើទោះជាយ៉ាងនេះក្ដី លោកស្រីក៏ចង់សំណូមពរដល់អ្នកប្រើប្រាស់ ឲ្យមានការយោគយល់ពីផលវិបាកនៃដំណើរការអាជីវកម្ម និងជួយគាំទ្រអាជីវកម្មកែច្នៃក្នុងស្រុក ព្រោះវាជាផ្លូវមួយផ្ដល់ឱកាសការងារដល់ប្រជាពលរដ្ឋក្នុងតំបន់ បង្កើនជីវភាព និងបញ្ចៀសការចំណាកស្រុក៕
