កតិកាសញ្ញាការពារជាតិអាមេរិក-ហ្វាំងឡង់ នឹងអាចបង្កើនវត្តមាន F-35 កាន់តែច្រើន ក្បែរព្រំដែនរុស្ស៊ី
កតិកាសញ្ញាការពារជាតិអាមេរិក-ហ្វាំងឡង់ នឹងអាចបង្កើនវត្តមាន F-35 កាន់តែច្រើន ក្បែរព្រំដែនរុស្ស៊ី
បរទេស ៖ កិច្ចព្រមព្រៀងអំពីកិច្ចសហប្រតិបត្តិការទ្វេភាគីលើវិស័យការពារ DCA ដែលកំពុងបន្តពិភាក្សារវាងអាមេរិកនិងប្រទេសហ្វាំងឡង់កំពុងក្លាយទៅជាឱកាសនៃការបង្កើនសកម្មភាពយោធារបស់អាមេរិកនៅក្នុងតំបន់ក្បែរទៅនឹងព្រំដែនជាមួយនឹងប្រទេសរុស្ស៊ី។
យោងតាមការចេញផ្សាយរបស់កាសែតក្នុងស្រុកប្រទេសហ្វាំងឡង់ Helsinki Sanomat បានរាយការណ៍កាលពីពេលថ្មីៗកន្លងមកនេះថា សំណើមួយចំនួននៅក្នុងកិច្ចព្រមព្រៀងនេះនឹងអាចអនុញ្ញាតផងដែរនូវការវិនិយោគផ្នែកហេដ្ឋារចនាសម្ព័ន្ធបែបយោធានៅក្នុងប្រទេស ហើយវានឹងផ្តល់អត្ថប្រយោជន៍យ៉ាងសំខាន់សម្រាប់ហ្វាំងឡង់ក្នុងការបង្កើនវត្តមានយន្តហោះចម្បាំងប្រភេទ F-35 ផងដែរ។
មន្ត្រីជាន់ខ្ពស់មួយរូបរបស់ប្រទេសហ្វាំងឡង់ លោក Mikael Antell បានពោលថា ៖ មកដល់ពេលនេះ កិច្ចព្រមព្រៀងស្ថិតនៅក្នុងដំណាក់កាលដំបូងនៅឡើយ ប៉ុន្តែប្រសិនបើកិច្ចពិភាក្សាគ្នាជោគជ័យនោះវានឹងនាំឲ្យទៅដល់ការធានាបាននូវការបញ្ជាទិញបន្ថែមនូវយន្តហោះចម្បាំង F-35 កាន់តែច្រើនពីសហរដ្ឋអាមេរិក។
គួរឲ្យដឹងដែរថា កាលពីឆ្នាំកន្លងទៅរដ្ឋាភិបាលទីក្រុង Helsinki បានធ្វើការបញ្ជាទិញយន្តហោះចម្បាំងប្រភេទ F-35 ប្រមាណជា 64 គ្រឿងពីក្រុមហ៊ុនផលិតអាវុធអាមេរិក Lockheed Martin ដើម្បីយកមកជំនួសយន្តហោះជួរមុខចាស់ៗរបស់ខ្លួន F-18 Hornet ហើយជឿជាក់ថាការដឹកជញ្ជូនយន្តហោះទាំងនោះនឹងអាចធ្វើឡើងចាប់ពីឆ្នាំ២០២៦ខាងមុខនេះ។
គួររំលឹកដែរថា កាលពីខែកញ្ញាកន្លងទៅ សហរដ្ឋអាមេរិក និងហ្វាំងឡង់បានប្រកាសពីផែនការចរចាលើកតិកាសញ្ញាមួយដើម្បីពង្រឹងកិច្ចសហប្រតិបត្តិការសន្តិសុខទ្វេភាគីដែលកិច្ចព្រមព្រៀងនេះនឹងផ្តល់នូវក្របខ័ណ្ឌ និងមូលដ្ឋានច្បាប់សម្រាប់កងកម្លាំងសហរដ្ឋអាមេរិកដើម្បីទទួលបានការចូលទៅក្នុងប្រទេស និងសម្រួលការប្រើប្រាស់មធ្យោបាយដែលបានព្រមព្រៀងគ្នាដើម្បីធ្វើសកម្មភាពសម្រាប់ការពារគ្នាទៅវិញទៅមករបស់ពួកគេ៕
