ចិញ្ចឹមត្រឹមតែក្របី កសិករក្នុងខេត្តកោះកុងអាចស្រោចស្រង់ជីវភាពគ្រួសារបានធូរធារ និងមិនជំពាក់បំណុលគេ
ចិញ្ចឹមត្រឹមតែក្របី កសិករក្នុងខេត្តកោះកុងអាចស្រោចស្រង់ជីវភាពគ្រួសារបានធូរធារ និងមិនជំពាក់បំណុលគេ
កោះកុង : ស្ថិតក្នុងស្រុកថ្មបាំង ខេត្តកោះកុង កសិករមួយរូបសម្រេចចិត្តចាប់យករបរចិញ្ចឹមក្របី និងបន្តបង្កើនជីវភាពគ្រួសាររបស់ខ្លួនកាន់តែប្រសើរពីមួយឆ្នាំទៅមួយឆ្នាំ។ កសិកររូបនេះចាប់ផ្ដើមចិញ្ចឹមក្របីដំបូងតាំងតែពីឆ្នាំ ១៩៩៣ ដោយកាលណោះ មានត្រឹមតែក្របីញីមួយក្បាលប៉ុណ្ណោះ។
ពីមួយឆ្នាំទៅមួយឆ្នាំ ក្របីរបស់កសិករ គង់ ទាវ ចេះតែកើនឡើង ហើយជានិច្ចជាកាល លោកតែងលក់ក្របីសម្រាប់តម្រូវការចាំបាច់នានា។
កសិករដដែលនេះបានបន្តឲ្យដឹងថា ការចិញ្ចឹមក្របីគឺមានភាពងាយស្រួលជាងការចិញ្ចឹមគោ ហើយតម្លៃវិញក៏លក់បានថ្លៃផងដែរ ដោយកន្លងមកលោកអាចលក់បានក្នុងចម្លោះ ៥០០ដុល្លារ ទៅ៦០០ដុល្លារក្នុងមួយក្បាល។
លោក គង់ ទាវ៖ «សព្វថ្ងៃនេះ ខ្ញុំមានក្របីញីជិត១០ក្បាល ហើយបើគិតបូកទាំងកូនៗវាទៀត មានប្រហែលជាជិត ៣០ក្បាលអីហ្នឹង»។
លោក គង់ ទាវ បានបន្តរៀបរាប់ថា៖ «តាំងពីចិញ្ចឹមក្របីមក ខ្ញុំការកូនអស់បីនាក់ហើយ ពេលត្រូវការរៀបចំការកូនម្ដងៗ ខ្ញុំលក់ក្របី ២០ ទៅ៣០ក្បាលទៅ គ្រាន់ហើយ»។
តាមរយៈការលក់ក្របីចិញ្ចឹមនេះ លោក គង់ ទាវ បានអះអាងថា លោកមិនដែលខ្ចីបំណុលគេនោះទេ ពោលគឺពេលដែលមានតម្រូវការ លោកលក់ក្របី ដើម្បីយកប្រាក់ ហើយការលក់នេះទៀតសោត គឺមិនមានការលំបាកអ្វីទេ ដោយសារមានឈ្មួញចូលទៅទិញដល់កន្លែងតែម្ដង។
លោកបន្តទៀតថា៖ «ពេលត្រូវការទិញម៉ូតូជិះទៅណាមកណាអី ខ្ញុំលក់ក្របី២ ទៅ៣ក្បាល ក៏អាចទិញបានហើយ អីចឹងទៅខ្ញុំមិនដែលចងការប្រាក់គេមកប្រើទេ ត្រូវការប៉ុណ្ណាក៏លក់ប៉ុណ្ណឹងទៅ ដូចឥឡូវនេះខ្ញុំទិញម៉ូតូបានពីរគ្រឿងដោយសារលក់ក្របីនេះឯង»។
មុខរបរចិញ្ចឹមក្របីនេះផងដែរ បានក្លាយជាចំណូលប្រចាំរបស់គ្រួសារលោក ជាពិសេសថែមទាំងបានផ្គត់ផ្គង់ការរៀនសូត្ររបស់កូនចៅលោកទៀតផង។ ម្យ៉ាងទៀត ការចាយវាយប្រចាំថ្ងៃ ដូចជា ទិញម្ហូបអាហារ ទិញគោយន្ដ ធ្វើប្រព័ន្ធស្រោចស្រពដំណាំជាដើម គឺសុទ្ធតែបានមកពីការចិញ្ចឹមក្របីនេះឯង។
តាមរយៈបទពិសោធន៍នេះ លោក គង់ ទាវ បានផ្ដល់ជាគំនិតដល់ប្រជាកសិករកម្ពុជា ឲ្យខិតខំបង្កបង្កើនផល មិនថាកសិកររូបនោះកំពុងដាំដុះ ឬចិញ្ចឹមសត្វនោះទេ សូមផ្ដោតទៅលើមុខរបរ និងរស់នៅតាមលទ្ធភាពរបស់ខ្លួន ទើបមិនធ្លាក់ខ្លួនក្នុងបំណុល៕
