ក្រុមការងារចុះជួយមូលដ្ឋានខេត្តកំពត មានផែនការសហគមន៍នេសាទ និង តំបន់រមណីយដ្ឋានទេសចរណ៍នៅខេត្តកំពត
ក្រុមការងារចុះជួយមូលដ្ឋានខេត្តកំពត មានផែនការសហគមន៍នេសាទ និង តំបន់រមណីយដ្ឋានទេសចរណ៍នៅខេត្តកំពត
កំពត៖ ក្រុមការងារចុះជួយមូលដ្ឋានខេត្តកំពត ដឹកនាំដោយ លោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងដែនដី នគរូបនីយកម្ម និងសំណង់ បាន ដាក់ចេញផែនការមេសម្រាប់ការអភិវឌ្ឍសហគមន៍នេសាទកោះគ្រឹស្នា-លក តំបន់ទំនប់ទឹកភ្នំដំរី និងតំបន់រមណីយដ្ឋានទេសចរណ៍ធម្មជាតិ ភ្នំកំពង់ត្រាច។
ការដាក់ចេញនូវផែនការនេះ ធ្វើឡើង ក្នុងគ្រាដែលក្រុមការងារចុះជួយមូលដ្ឋានខេត្តកំពត បានចុះពិនិត្យសក្តានុពលសហគមន៍នេសាទកោះគ្រឹស្នា-លក តំបន់ទំនប់ទឹកភ្នំដំរី និងតំបន់រមណីយដ្ឋានទេសចរណ៍ធម្មជាតិ ភ្នំកំពង់ត្រាច ស្ថិតក្នុងស្រុកកំពង់ត្រាច ក្នុងភូមិសាស្ត្រខេត្តកំពត។
បើតាមក្រុមការងារ ផ្អែកលើសក្តានុពលធម្មជាតិក្រុមការងារបានកំណត់ផែនការមេសម្រាប់ការអភិវឌ្ឍតំបន់ កំណត់អាទិភាពហេដ្ឋារចនាសម្ព័ន្ធ សេវាកម្មទ្រទ្រង់ទេសចរណ៍ និងពង្រឹងសមត្ថភាពជំនាញវិជ្ជាជីវៈ របស់ប្រជាជនមូលដ្ឋាន ដើម្បីអាចធានាបាននូវការអភិរក្សជីវៈចម្រុះ បង្កើនទិន្នផលធនធានជលផល ជំរុញការដាំដុះចិញ្ចឹមសត្វ ទាក់ទាញទេសចរណ៍ និងបង្កើនមុខរបរថ្មីៗនៅតាមមូលដ្ឋាន។
ក្រុមការខាងលើបញ្ជាក់ថា នេះជាបំណែកដ៏សំខាន់នៃការរៀបចំដែនដី និងនគរូបនីយកម្មប្រកបដោយសោភ័ណភាព ដែលអាចពង្រឹងខេត្តកំពតក្កាយជា “របៀងសេដ្ឋកិច្ចតំបន់ឆ្នេរ និងជាគោលដៅទេសចរណ៍ដ៏ទាក់ទាញ” ស្របតាមគោលនយោបាយជំរុញការនាំចេញនៅនឹងកន្លែង និងការលើកកម្ពស់សេដ្ឋកិច្ចមូលដ្ឋានប្រកបដោយបរិយាបន្ន។
