សម្ព័ន្ធមិត្តណាតូ ប្រកាសត្រៀមតបត ប្រសិនបើលោកត្រាំ ប្រើកម្លាំងបាយដណ្ដើមយកកោះ ហ្គ្រីនឡែន

សម្ព័ន្ធមិត្តណាតូ ប្រកាសត្រៀមតបត ប្រសិនបើលោកត្រាំ ប្រើកម្លាំងបាយដណ្ដើមយកកោះ ហ្គ្រីនឡែន

អន្តរជាតិ៖ ពិភពលោកកំពុងតាមដានយ៉ាងយកចិត្តទុកដាក់ចំពោះវិបត្តិការទូតដ៏ស្រួចស្រាវបំផុត មិនធ្លាប់មានក្នុងប្រវត្តិសាស្ត្រសម័យទំនើប បន្ទាប់ពីរដ្ឋបាលលោក ដូណាល់ ត្រាំ បានបង្ហើបពីលទ្ធភាពនៃការប្រើប្រាស់កម្លាំងយោធាដើម្បីបញ្ចូលកោះហ្គ្រីនឡែន (Greenland) ជាដែនដីរបស់សហរដ្ឋអាមេរិក ដែលធ្វើឱ្យសម្ព័ន្ធមិត្តអឺរ៉ុប និងអង្គការណាតូ (NATO) ចេញមុខព្រមានតបតវិញយ៉ាងធ្ងន់ៗ។

ភាពតានតឹងបានផ្ទុះឡើងកាន់តែខ្លាំង បន្ទាប់ពីអ្នកនាំពាក្យសេតវិមាន លោកស្រី Karoline Leavitt បានបញ្ជាក់កាលពីថ្ងៃទី៦ ខែមករា ឆ្នាំ២០២៦ ថា ការប្រើប្រាស់កម្លាំងយោធាគឺជា «ជម្រើសដែលមានជានិច្ច» ប្រសិនបើដាណឺម៉ាកនៅតែបដិសេធមិនព្រមចរចាលក់កោះដ៏ធំមួយនេះ។

ប្រធានាធិបតី ដូណាល់ ត្រាំ បានអះអាងថា កោះហ្គ្រីនឡែនមានសារៈសំខាន់ជាយុទ្ធសាស្ត្រសម្រាប់សន្តិសុខជាតិអាមេរិក ដើម្បីទប់ទល់នឹងឥទ្ធិពលយោធារបស់រុស្ស៊ី និងចិននៅតំបន់អាកទិក។

ជុំវិញរឿងនេះ នាយករដ្ឋមន្ត្រីដាណឺម៉ាក លោកស្រី Mette Frederiksen បានឆ្លើយតបទៅវិញដោយកំហឹងថា រាល់ការប៉ុនប៉ងឈ្លានពានលើកោះហ្គ្រីនឡែន គឺជាការវាយប្រហារលើអធិបតេយ្យភាពរបស់ដាណឺម៉ាកទាំងស្រុង។ លោកស្រីបានបញ្ជាក់ថា៖ «ប្រសិនបើសហរដ្ឋអាមេរិកវាយប្រហារលើសម្ព័ន្ធមិត្តខ្លួនឯង វានឹងក្លាយជាទីបញ្ចប់នៃអង្គការណាតូ»។

ចំណែកឯនាយករដ្ឋមន្ត្រីកោះហ្គ្រីនឡែន លោក Jens-Frederik Nielsen ក៏បានបន្ថែមដែរថា ហ្គ្រីនឡែនមិនមែនជាទំនិញសម្រាប់លក់ដូរឡើយ ហើយអនាគតនៃកោះនេះត្រូវសម្រេចដោយប្រជាជនក្នុងស្រុកតែប៉ុណ្ណោះ មិនមែនដោយមហាអំណាចបរទេសនោះទេ។

ដើម្បីឆ្លើយតបលើរឿងនេះ មេដឹកនាំមកពីប្រទេសធំៗក្នុងអឺរ៉ុប រួមមាន ចក្រភពអង់គ្លេស បារាំង អាល្លឺម៉ង់ និងប៉ូឡូញ បានចេញសេចក្តីថ្លែងការណ៍រួមគ្នា ដោយសន្យានឹងផ្តល់ការគាំទ្រគ្រប់បែបយ៉ាងដល់ដាណឺម៉ាក។ ការព្រួយបារម្ភបានកើនឡើងទ្វេដង បន្ទាប់ពីសហរដ្ឋអាមេរិកទើបតែបានធ្វើប្រតិបត្តិការយោធាចាប់ខ្លួនប្រធានាធិបតីវ៉េណេស៊ុយអេឡា លោក Nicolás Maduro កាលពីដើមខែមករានេះ ដែលធ្វើឱ្យបណ្ដាប្រទេសអឺរ៉ុបយល់ឃើញថា ការគំរាមកំហែងរបស់លោក ត្រាំ លើកោះហ្គ្រីនឡែន មិនមែនជារឿងលេងសើចឡើយ។

អ្នកវិភាគនយោបាយអន្តរជាតិលើកឡើងថា ប្រសិនបើសហរដ្ឋអាមេរិកពិតជាបោះជំហានទៅរកការប្រើកម្លាំងយោធាមែននោះ វានឹងធ្វើឱ្យសណ្តាប់ធ្នាប់ពិភពលោកមានការប្រែប្រួលទាំងស្រុង ហើយអាចឈានទៅរកសង្គ្រាមទ្រង់ទ្រាយធំរវាងមហាអំណាចលោកខាងលិច ដែលធ្លាប់តែជាមិត្តនឹងគ្នារាប់សិបឆ្នាំមកហើយ។

បច្ចុប្បន្ន ពិភពលោកកំពុងរង់ចាំមើលថា តើរដ្ឋបាលលោក ត្រាំ នឹងបន្តជំរុញផែនការនេះ ឬក៏នឹងដកថយដើម្បីរក្សាសម្ព័ន្ធភាពដ៏រឹងមាំជាមួយអឺរ៉ុបវិញ៕