គ្រូបង្វឹកព្រះខ័នរាជស្វាយរៀង ៖ យើងជាក្រុមជើងឯកពានសម្ដេច ហើយយើងត្រូវតែបង្ហាញកម្រិតល្អបំផុតតាមតែអាចធ្វើទៅបានរៀងរាល់ការប្រកួតដែលយើងលេង

គ្រូបង្វឹកព្រះខ័នរាជស្វាយរៀង ៖ យើងជាក្រុមជើងឯកពានសម្ដេច ហើយយើងត្រូវតែបង្ហាញកម្រិតល្អបំផុតតាមតែអាចធ្វើទៅបានរៀងរាល់ការប្រកួតដែលយើងលេង

ព្រះខ័នរាជស្វាយរៀង បើកកីឡដ្ឋានខេត្តស្វាយរៀងទទួល គិរីវង់សុខសែនជ័យ នៅម៉ោង១៨:០០ នាទីល្ងាចនេះ ក្នុងការប្រកួតជើងទី២ នៃវគ្គ ១/៤ ផ្តាច់ព្រ័ត្រ ពានរង្វាន់ សម្តេចអគ្គមហាសេនាបតីតេជោ ហ៊ុន សែន បន្ទាប់ពីយកឈ្នះ ២-០ កាលជើងទី១ នៅក្រៅដី។ យ៉ាងណាក្ដី គ្រូបង្គោល Pep Muñoz នៅតែបន្តមានឆន្ទៈចង់ឈ្នះជើងទី២ទៀត ខណៈ Pablo នឹងលេងជម្រើសដំបូង។

គ្រូបង្វឹកសញ្ជាតិអេស្ប៉ាញគូសបញ្ជាក់ថា «យើងមិនគិតអំពីជើងទី១ ទល់គិរីវង់សុខសែនជ័យទេ។ យើងចង់ឈ្នះការប្រកួតជើងទី២នេះ ជាពិសេស ពេលយើងលេងក្នុងប្រកួតមុន គឺមិនបានផ្ដល់ឱ្យអ្នកគាំទ្រនូវជ័យជម្នះក្នុងផ្ទះបានឡើយ។ យើងត្រៀមរួចរាល់ សម្រាប់ការប្រកួតថ្ងៃនេះ។ យើងជាក្រុមជើងឯកពានសម្ដេច ហើយយើងត្រូវតែបង្ហាញកម្រិតល្អបំផុតតាមតែអាចធ្វើទៅបានរៀងរាល់ការប្រកួតដែលយើងលេង»។

ក្រៅពីការតាំងចិត្តដាច់ណាត់ គ្រូបង្គោលក្រុមការពារជើងឯក បានបន្ថែមអំពីវត្តមានរបស់ខ្សែប្រយុទ្ធ Pablo យ៉ាងដូច្នេះថា៖ « Pablo នឹងលេងជម្រើសដំបូង។ រូបគេ ទើបជាសះស្បើយពីរបួសយ៉ាងល្អហើយគេដឹងថា ការប្រកួតនេះ គឺសម្រាប់រូបគេ។ យើងមានកីឡាករពោរពេញដោយការប្រកួតប្រជែងខ្ពស់ ហើយអ្នកដែលបានចូលលេង គឺនឹងធ្វើឱ្យបានល្អ និងផ្ដល់គ្រប់យ៉ាងដល់ក្រុមទាំងមូល»។

បុរសវ័យ ៤៥ឆ្នាំរូបនេះ ដាក់ក្ដីរំពឹងថា ការលេងក្នុងដី តែងតែទទួលបានការគាំទ្រពីអ្នកគាំទ្ររបស់ខ្លួន ទោះជាប្រកួតចំថ្ងៃធ្វើការ ឬសិក្សាក្ដី ប៉ុន្តែលោកជឿថា ពួកគេអាចមកគាំទ្រក្រុម និងជួយឱ្យក្រុមឈ្នះការប្រកួតនេះ។

គ្រូបង្គោលដដែលសង្កត់ធ្ងន់ថា «យើងមិនគិតអំពីការប្រកួតចុងសប្ដាហ៍ទល់ភ្នំពេញក្រោនទេ នាពេលឥឡូវនេះ។ ពិតណាស់ពួកគេមិនមានការប្រកួតពាក់កណ្ដាលសប្ដាហ៍ ហើយយើងមានពេល ២ថ្ងៃ ដើម្បីសម្រាក ប៉ុន្តែយើងគ្មានអ្វីត្រូវដោះសារឡើយ។ ពួកគេប្រកួតទល់ណាហ្គាវើលដ៍ រួចហើយ ដែលមានពេលវេលាល្អប្រសើរ និងច្រើនថ្ងៃសម្រាប់ការប្រកួតដ៏ធំនៅថ្ងៃសៅរ៍នេះ។ ខ្ញុំសង្ឃឹមថា រឿងទាំងនេះជួយឱ្យមានការប្រកួតប្រជែង និងភាពស្រស់បំព្រងនៃការប្រកួតសម្រាប់ចុងសប្ដាហ៍នេះជូនដល់អ្នកគាំទ្របាល់ទាត់កម្ពុជា»។

គូប្រកួតផ្សេងទៀតនៅវគ្គ ៨ក្រុមជើងទី២ វិសាខា ទទួល កងយោធពលខេមរភូមិន្ទ នៅឯកីឡដ្ឋានព្រីនស៏ នៅថ្ងៃទី០២ ខែមេសា ដូចគ្នា មុនពេល បឹងកេត តតាំងនឹង អាយ អេស អាយ ដង្កោសែនជ័យ នៅថ្ងៃទី០៣ ខែមេសា នៅឯពហុកីឡដ្ឋានជាតិ អូឡាំពិក៕