ប្រធានសហព័ន្ធគុនខ្មែរ ៖ នេះជាប្រវត្តិសាស្រ្តរបស់កម្ពុជា ដែលសហព័ន្ធ បានដឹកនាំគុនខ្មែរ ទៅធ្វើការប្រកួត និងផ្សព្វផ្សាយ នៅសហរដ្ឋអាមេរិក

ប្រធានសហព័ន្ធគុនខ្មែរ ៖ នេះជាប្រវត្តិសាស្រ្តរបស់កម្ពុជា ដែលសហព័ន្ធ បានដឹកនាំគុនខ្មែរ ទៅធ្វើការប្រកួត និងផ្សព្វផ្សាយ នៅសហរដ្ឋអាមេរិក

(ប្រដាល់)៖ ប្រធានសហព័ន្ធកីឡាប្រដាល់គុនខ្មែរ ឯកឧត្តម ឧត្តមសេនីយ៍ទោ ខូវ  ឆាយ បានប្រកាសនៅក្នុងសន្និសីទសារព័ត៌មាន ស្ដីពីការប្រកួតគ្រុឌគុនខ្មែរអន្តរជាតិកម្ពុជា-USA ថា សហព័ន្ធកីឡាប្រដាល់គុនខ្មែរ នឹងដឹកនាំកីឡាករកីឡាការិនីប្រដាល់គុនខ្មែរ ចំនួន ៤រូប ទៅប្រកួតនៅលើទឹកដីសហរដ្ឋអាមេរិក ក្នុងទីក្រុងឡុងប៊ិច រដ្ឋកាលីហ្វញ៉ា នាវេលាម៉ោង ៦ល្ងាចថ្ងៃទី១២ ខែមេសា ឆ្នាំ២០២៥ ត្រូវនឹងថ្ងៃទី១៣ ខែមេសា ២០២៥ វេលាម៉ោង ៨ព្រឹក នៅកម្ពុជា។

ឯកឧត្តម ប្រធានសហព័ន្ធថា នេះជាបេសកកម្មគ្រុឌគុនខ្មែរលើកទី១ ដឹកនាំកីឡាករកីឡាការិនីគុនខ្មែរទៅប្រកួតលើទឹកដីអាមេរិកជាលក្ខណៈទ្រុងទ្រាយធំ ហើយ នេះ ក៏ជាប្រវត្តិសាស្រ្តរបស់កម្ពុជាលើកទី១ ដែលសហព័ន្ធបានដឹកនាំគុនខ្មែរ ទៅធ្វើការប្រកួតនិងផ្សព្វផ្សាយលើទឹកដីប្រទេសមហាអំណាចសហរដ្ឋអាមេរិក ដែលមានប្រជាជនចម្រុះជាតិសាសន៍ ក្នុងនោះក៏មានជនជាតិខ្មែរយើងរស់នៅច្រើនផងដែរ។ ដូច្នោះ ការផ្សព្វផ្សាយគុនខ្មែរទៅលើទឹកដីប្រទេសអាមេរិកនេះ គឺជារឿងចាំបាច់បំផុតមួយ ដែលគុនខ្មែរយើងត្រូវធ្វើដើម្បីឱ្យប្រជាពលរដ្ឋដែលរស់នៅក្នុងប្រទេសអាមេរិក មានប្រជាជនចម្រុះជាតិសាសន៍ជាង៣រយលាននាក់ បានស្គាល់ ដែលជាការបញ្ជាក់ថា គុនខ្មែរមានលទ្ធភាពទៅដល់គ្រប់ទិសទី។

បើតាមឯកឧត្តម ខូវ ឆាយ អ្នកប្រដាល់គុនខ្មែរទាំង ៤រូប ដែលចេញទៅប្រកួត និងផ្សព្វផ្សាយ នៅសហរដ្ឋអាមេរិក មានដូចជា កីឡាការិនី អេ យ៉ានុត, កីឡាករ ពេជ្រ សម្បត្តិ, រឿង សោភ័ណ្ឌ និងកីឡាករ ធន់ រិទ្ធី ដោយអ្នកទាំង៤ នឹងត្រូវប្រកួតជាមួយគូប្រកួតជាជនជាតិអាមេរិកទាំងអស់ ដែលពួកគេសុទ្ធសឹងតែអ្នកប្រដាល់កម្រិតខ្ពស់ដូចៗគ្នាតែម្តង។

មិនតែប៉ុណ្ណោះ អ្នកប្រដាល់គុនខ្មែរទាំង ៤រូប នឹងត្រូវប្រកួតដណ្តើមខ្សែក្រវាត់ ក្នុងនោះ កីឡាការិនី អេ យ៉ានុត និងកីឡាករ រឿង សោភ័ណ្ឌ ដណ្តើមខ្សែក្រវាត់ កម្ពុជា-អាមេរិក ដែលខ្សែក្រវាត់នេះ នាំចេញពីកម្ពុជាទៅ ដោយប្រកួតក្នុងលក្ខខណ្ឌ ៣ទឹក។ ចំពោះ ធន់ រិទ្ធី និងពេជ្រ សម្បត្តិ នឹងប្រកួតដណ្តើមខ្សែក្រវាត់ WCK Kun Khmer ប្រចាំសហរដ្ឋអាមេរិក ក្នុងលក្ខខណ្ឌ ៥ទឹក ដោយប្រើប្រាស់ច្បាប់ប្រដាល់គុនខ្មែរដូចៗគ្នា៕