Alan Shearer និយាយថា ក្រោមការដឹកនាំរបស់លោក Amorim ក្លិប Man Utd អន់ជាងជំនាន់លោក Ten Hag ទៅទៀត

Alan Shearer និយាយថា ក្រោមការដឹកនាំរបស់លោក Amorim ក្លិប Man Utd អន់ជាងជំនាន់លោក Ten Hag ទៅទៀត

យោងតាមអតីតខ្សែប្រយុទ្ធក្រុមតោកំណាចអង់គ្លេស លោក Alan Shearer និយាយថា គ្រូបង្វឹក Ruben Amorim បានធ្វើឱ្យ Man Utd កាន់តែចុះខ្សោយ បើប្រៀបធៀបទៅនឹងជំនាន់លោក Erik Ten Hag ។

Alan Shearer បាននិយាយនៅក្នុងផតឃែស្ថខ្លីមួយ បន្ទាប់ពី Man Utd ចាញ់ ១- ៣ ទៅ Brighton នៅ Old Trafford យ៉ាងដូច្នេះថា ៖«ដោយសារតែអ្វី ដែល Amorim ចង់ធ្វើជាមួយនឹងប្រព័ន្ធយុទ្ធសាស្ត្ររបស់គាត់ Man Utd មើលទៅអន់ជាងការដឹកនាំរបស់លោក Ten Hag ទៅទៀត។ ពួកគេមិនអាចលេងតាមរបៀបដែលគាត់ចង់បានណោះទេ»។

ជាមួយគ្នានេះ អតីតខ្សែការពារ Micah Richards ក៏បានយល់ស្របថា កីឡាករបច្ចុប្បន្នមិនស័ក្តិសមសម្រាប់ប្រព័ន្ធយុទ្ធសាស្ត្ររបស់ Amorim នោះទេ។ ជំនួសឱ្យទម្រង់ ៣-៤-៣ គាត់បានស្នើថាអ្នកចាត់ការ Man Utd គួរតែត្រលប់ទៅទម្រង់ ៤-៤-២ វិញ។ Micah Richards បានសួរ Shearer ថា តើវាពិបាកប៉ុណ្ណា សម្រាប់អ្នកក្នុងការសម្របខ្លួនទៅនឹងការលេង ក្នុងទម្រង់ ៣-៤-៣។

បន្ទាប់ពីជំនួស Ten Hag នៅ Man Utd ក្នុងខែវិច្ឆិកា ឆ្នាំ ២០២៤ លោក Amorim បានលេងទម្រង់ ៣-៤-៣ ដូចដែលគាត់បានធ្វើដោយជោគជ័យជាមួយ Sporting ។ ប៉ុន្តែក្នុងរយៈពេល២ខែកន្លងមកនេះ “បិសាចក្រហម” មិនបានប្រសើរឡើងទេ។ ពួកគេបានឈ្នះតែ ៣ដងប៉ុណ្ណោះ ស្មើ ២ និងចាញ់ ៦ ក្នុងចំណោម ១១ប្រកួត ក្នុងក្របខ័ណ្ឌ Premier League របស់ពួកគេ ដែលអាក្រក់ជាងកំណត់ត្រាមុនរបស់គាត់គឺឈ្នះ ៣ ស្មើ ២ និងចាញ់ ៤ ក្នុងការប្រកួតប្រាំបួនដំបូងរបស់គាត់។

យោងតាមប្រព័ន្ធផ្សព្វផ្សាយ មុនពេលទទួលយកទៅដឹកនាំ Man Utd លោក Amorim គឺជាគោលដៅជំនួសលោក Pep Guardiola នៅ Man City ។ ខណៈពេលដែលដឹកនាំ Braga និង Sporting គ្រូបង្វឹកសញ្ជាតិព័រទុយហ្គាល់វ័យ ៣៩ឆ្នាំរូបនេះ បានឈ្នះពានរង្វាន់ចំនួន ៦ ក្នុងរយៈពេលត្រឹមតែ ៥ឆ្នាំ រួមទាំងជើងឯកថ្នាក់ជាតិចំនួន ២ ពានរង្វាន់ League Cup ចំនួន៣ និង Super Cup ចំនួន១។

មុនពេលត្រូវបានបណ្តេញចេញ Ten Hag បានជួយ Man Utd ឈ្នះពានរង្វាន់ League Cup និង FA Cup ។ ទោះជាយ៉ាងណាក៏ដោយ ទម្រង់លេងនៅ Premier League របស់គាត់បានធ្វើឱ្យក្រុមប្រឹក្សាភិបាល និងអ្នកគាំទ្រខកចិត្ត ចាប់ពីលេខ៣ ក្នុងរដូវកាល 2022-23 ដល់លេខ ៨ ក្នុងរដូវកាល 2023-24៕