មេដឹកនាំរបបយោធាមីយ៉ាន់ម៉ា លោក មីន អោង ហ្លេង ជាប់ឆ្នោតជាប្រធានាធិបតី

មេដឹកនាំរបបយោធាមីយ៉ាន់ម៉ា លោក មីន អោង ហ្លេង ជាប់ឆ្នោតជាប្រធានាធិបតី

មីយ៉ាន់ម៉ា៖ មេដឹកនាំរបបយោធាមីយ៉ាន់ម៉ា លោក មីន អោង ហ្លេង (Min Aung Hlaing) បានឈ្នះការបោះឆ្នោតក្នុងសភានៅថ្ងៃសុក្រនេះ ដើម្បីក្លាយជាប្រធានាធិបតីនៃប្រទេសនេះ ដែលធ្វើឲ្យការក្តោបអំណាចនយោបាយរបស់លោកកាន់តែមានសុពលភាព បន្ទាប់ពីរយៈពេល ៥ ឆ្នាំនៃការផ្តួលរំលំរដ្ឋាភិបាលដែលបានជាប់ឆ្នោតតាមប្រជាធិបតេយ្យ។

ឧត្តមសេនីយ៍វ័យ ៦៩ ឆ្នាំរូបនេះ គឺជាអ្នកដឹកនាំរដ្ឋប្រហារនៅឆ្នាំ ២០២១ ប្រឆាំងនឹងរដ្ឋាភិបាលរបស់លោកស្រី អ៊ុង សាន ស៊ូជី (Aung San Suu Kyi) ម្ចាស់ពានរង្វាន់ណូបែលសន្តិភាព (Nobel Peace Prize)។ បន្ទាប់ពីរដ្ឋប្រហារ លោកស្រីត្រូវបានឃុំខ្លួន ដែលបង្កឲ្យមានការតវ៉ា និងបន្តទៅជាការតស៊ូប្រដាប់អាវុធនៅទូទាំងប្រទេស ប្រឆាំងនឹងរបបយោធា។

ការផ្លាស់ប្តូរពីតំណែងអគ្គមេបញ្ជាការទៅជាប្រធានាធិបតីស៊ីវិលនេះ កើតឡើងបន្ទាប់ពីការបោះឆ្នោតដែលត្រូវបានរិះគន់យ៉ាងខ្លាំងថា ខ្វះភាពសុចរិត និងត្រូវបានគេមើលថាជាវិធីសាស្ត្រមួយក្នុងការបន្តអំណាចយោធាក្រោមរូបរាងប្រជាធិបតេយ្យ។

ក្នុងការផ្សាយបន្តផ្ទាល់នៃការរាប់សន្លឹកឆ្នោត សភាដែលគ្រប់គ្រងដោយគណបក្ស Union Solidarity and Development Party និងតំណាងយោធាដែលត្រូវបានតែងតាំង បានផ្តល់សំឡេងគាំទ្រគ្រប់គ្រាន់ឲ្យលោក មីន អោង ហ្លេង ឈ្នះការបោះឆ្នោតប្រធានាធិបតីដោយងាយស្រួល។

សុបិនក្លាយជាការពិត

ការឡើងកាន់តំណែងជាប្រធានាធិបតីរបស់លោក មីន អោង ហ្លេង ត្រូវបានអ្នកវិភាគមើលឃើញថា ជាគោលដៅដែលលោកបានស្វែងរកយូរមកហើយ។ វាកើតឡើងបន្ទាប់ពីការកែសម្រួលដ៏ធំមួយនៅក្នុងការដឹកនាំយោធា ដែលលោកបានគ្រប់គ្រងតាំងពីឆ្នាំ ២០១១។
កាលពីថ្ងៃចន្ទ នៅពេលដែលលោកត្រូវបានតែងតាំងជាបេក្ខជនប្រធានាធិបតី លោកបានតែងតាំងលោក Ye Win Oo អតីតប្រមុខចារកម្ម ដែលត្រូវបានគេចាត់ទុកថាស្មោះត្រង់ខ្លាំង ជាអ្នកស្នងតំណែងអគ្គមេបញ្ជាការរបស់លោក។

អ្នកវិភាគមួយចំនួនយល់ថា ការផ្ទេរតំណែងនេះ គឺជាយុទ្ធសាស្ត្រដើម្បីបង្រួបបង្រួមអំណាចរបស់លោក ក្នុងនាមជាប្រធានាធិបតី និងបង្កើនភាពស្របច្បាប់លើឆាកអន្តរជាតិ ព្រមទាំងការពារផលប្រយោជន៍របស់យោធា ដែលបានគ្រប់គ្រងប្រទេសអស់រយៈពេលជាច្រើនទសវត្សរ៍។

លោក Aung Kyaw Soe អ្នកវិភាគឯករាជ្យ បាននិយាយថា លោក មីន អោង ហ្លេង មានមហិច្ឆតាចង់ក្លាយជាប្រធានាធិបតីជាយូរមកហើយ ហើយពេលនេះគោលដៅនោះកំពុងក្លាយជាការពិត។

សង្គ្រាមស៊ីវិលនៅតែបន្ត

ទោះបីជាមានការផ្លាស់ប្តូរនយោបាយនេះក៏ដោយ សង្គ្រាមស៊ីវិលនៅមីយ៉ាន់ម៉ានៅតែបន្ត និងមាននិន្នាការកាន់តែតានតឹង។ ក្រុមប្រឆាំងរបបយោធា រួមទាំងសមាជិកដែលនៅសល់នៃគណបក្សរបស់លោកស្រី ស៊ូជី និងកងកម្លាំងជនជាតិភាគតិច បានបង្កើតសម្ព័ន្ធភាពថ្មីមួយ ដើម្បីប្រយុទ្ធប្រឆាំងយោធា។

ក្រុមប្រឹក្សាដឹកនាំសម្រាប់សហភាពប្រជាធិបតេយ្យសហព័ន្ធ បានប្រកាសថា គោលបំណងរបស់ពួកគេគឺលុបបំបាត់គ្រប់ទម្រង់នៃរបបផ្តាច់ការ រួមទាំងរបបយោធា និងបង្កើតប្រព័ន្ធនយោបាយថ្មីមួយ។

ទន្ទឹមនឹងនេះ ក្រុមប្រឆាំងអាចប្រឈមនឹងសម្ពាធយោធាកាន់តែខ្លាំង និងការត្រួតពិនិត្យពីប្រទេសជិតខាង ដែលអាចព្យាយាមពង្រឹងទំនាក់ទំនងជាមួយរដ្ឋាភិបាលថ្មី។

អ្នកវិភាគ Sai Kyi Zin Soe បានព្រមានថា បញ្ហាសេដ្ឋកិច្ច និងការខ្វះខាតប្រេងឥន្ធនៈអាចធ្វើឲ្យក្រុមប្រឆាំងពិបាកក្នុងការរក្សាស្ថិរភាព និងសហការគ្នា។ បញ្ហាទាំងនេះក៏អាចប៉ះពាល់ដល់ការជឿទុកចិត្ត និងការសម្រេចកិច្ចព្រមព្រៀងរវាងក្រុមផ្សេងៗផងដែរ៕