វៀតណាម យកឈ្នះ ថៃ ២-១ ក្នុងការប្រកួតវគ្គផ្ដាច់ព្រ័ត្រ AFF Cup ជើងទី១
វៀតណាម យកឈ្នះ ថៃ ២-១ ក្នុងការប្រកួតវគ្គផ្ដាច់ព្រ័ត្រ AFF Cup ជើងទី១
ក្រុមជម្រើសជាតិវៀតណាម ក្រោមការដឹកនាំរបស់លោក Kim Sang-sik បានយកឈ្នះ ក្រុមជម្រើសជាតិថៃ ក្នុងលទ្ធផល ២-១ ក្នុងការប្រកួតវគ្គផ្តាច់ព្រ័ត្រ ASEAN Cup 2024 ជើងទី១ នាកីឡដ្ឋាន Phu Tho provincial ប្រទេសវៀតណាម។
ការប្រកួតយប់មិញនេះ ក្រុមម្ចាស់ផ្ទះ វៀតណាម បានបើកការនាំមុខមុនរហូតដល់២គ្រាប់ ដោយខ្សែប្រយុទ្ធចូលសញ្ជាតិ Nguyen Xuan Son ទាំង២គ្រាប់ នៅនាទី ៥៩ និង ៧៣ ខណៈក្រុមភ្ញៀវថៃ រកបាន១គ្រាប់មកវិញ ដោយកីឡាករ Chalermsak Aukkee នៅនាទី៨៣។ ចប់ការប្រកួត៩០នាទី វៀតណាម ២-១ ថៃ។
ដោយសាររូបមន្តការប្រកួតវគ្គផ្ដាច់ព្រ័ត្រ AFF Cup ២០២៤នេះ មានភាពខុសប្លែកពីគេ ដោយត្រូវលេងចំនួនពីរជើង ពោលគឺលេងក្នុងដីម្នាក់ម្ដង ដូច្នេះក្រុមទាំងពីរ នឹងត្រូវប្រកួតជើងទី២ នៅថ្ងៃទី៥ ខែមករា ឆ្នាំ២០២៥នេះ នាកីឡដ្ឋាន Rajamangala ប្រទេសថៃ ដើម្បីរកជើងឯក។
គួរបញ្ជាក់ថា គិតមកទល់ពេលនេះ កីឡាករចូលសញ្ជាតិរបស់វៀតណាម ដែលមានឈ្មោះថា Nguyen Xuan Son គឺជាអ្នកស៊ុតបញ្ចូលទីច្រើនជាងគេ ក្នុងការប្រកួតពានរង្វាន់នេះ ដោយមាន ៧គ្រាប់ ក្នុងការបង្ហាញខ្លួនតែ ៤លើកប៉ុណ្ណោះ៕
