តើកម្ពុជា អាចយកឈ្នះ ថៃ បានដែរឬទេ ខណៈ៧លើកចុងក្រោយ កម្ពុជា មិនដែលឈ្នះថៃ ទាល់តែសោះ
តើកម្ពុជា អាចយកឈ្នះ ថៃ បានដែរឬទេ ខណៈ៧លើកចុងក្រោយ កម្ពុជា មិនដែលឈ្នះថៃ ទាល់តែសោះ
នៅយប់ថ្ងៃសុក្រ ទី២០ ខែធ្នូ ឆ្នាំ២០២៤នេះ វេលាម៉ោង ៨៖០០នាទីយប់ ក្រុមគោព្រៃកម្ពុជា នឹងប្រកួតជាមួយក្រុមជម្រើសជាតិថៃ ក្នុងការប្រកួត AFF Cup 2024 នៅឯកីឡដ្ឋាន RAJAMANGALA ប្រទេសថៃ។
ប្រវត្តិជួបគ្នារវាងក្រុមជម្រើសជាតិកម្ពុជា ទល់នឹងក្រុមជម្រើសជាតិថៃ ក្នុង៧ប្រកួតចុងក្រោយនេះ ក្រុមជម្រើសជាតិកម្ពុជា ធ្លាប់ទទួលបានលទ្ធផលស្មើទល់នឹងក្រុមជម្រើសជាតិថៃ បានតែម្ដងគត់ ពោលគឺនៅឆ្នាំ១៩៧១ និងចាញ់ចំនួន៦ប្រកួត។
ជម្រើសរបស់កម្ពុជា គឺត្រូវឈ្នះថៃ ដាច់ខាតនៅយប់នេះ ទើបអាចមានឱកាសអ៊ុតក្នុងការឡើងវគ្គពាក់កណ្តាលផ្តាច់ព្រ័ត្រ ប៉ុន្តែត្រឹមស្មើក៏អស់ឱកាសដែរ។ នៅម៉ោងដំណាលគ្នានេះ សិង្ហបុរី នឹងឡើងទៅកាន់វគ្គពាក់កណ្តាលផ្តាច់ព្រ័ត្រ ប្រសិនបើឈ្នះ ម៉ាឡេស៊ី ប៉ុន្តែប្រសិនបើស្មើគឺ ត្រូវអ៊ុតមើលលទ្ធផលរបស់កម្ពុជាជាមួយថៃ។ចំណែកម៉ាឡេស៊ី វិញត្រូវការឈ្នះសិង្ហបុរី ទើបអាចមានឱកាសអ៊ុតក្នុងការឡើងវគ្គបន្ត ប៉ុន្តែប្រសិនបើត្រឹមស្មើក៏អស់ឱកាសដែរ។
ទោះបីជាយ៉ាងណាក៏ដោយ រាត្រីនេះ ក្រុមកម្ពុជាកាន់ពិបាកខ្លាំង ដោយសារគ្មានកម្លាំងសំខាន់ជាច្រើននាក់។ ខ្សែបម្រើកណ្តាលដ៏សំខាន់ យូឌៃ អូកាវ៉ា មិនអាចបង្ហាញខ្លួនបានទេ បន្ទាប់ពីទទួលបានកាតលឿង២ប្រកួតជាប់គ្នា ស្មើនឹងជាប់ពិន័យមួយប្រកួត។ ជាពិសេសខ្សែការពារដ៏សំខាន់ កាន់ ម៉ូ និងខ្សែបម្រើដ៏ឆ្នើម គឹម សុខយុទ្ធ របួសមិនអាចលេងបានទេ ខណៈខ្សែការពារ សឿយ វិសាល ក៏មិនច្បាស់ថាអាចលេងបានឬទេ។
ទោះបីជាថៃ បានកក់កៅអីឡើងវគ្គបន្តហើយក្តី ប៉ុន្តែថៃហាក់ដូចជាមិនបន្ធូរជើងក្នុងការលេងជាមួយកម្ពុជាឡើយ។ ពួកគេបានកោះហៅខ្សែបម្រើប្រយុទ្ធវ័យ២៦ឆ្នាំ Supachok Sarachat មកពីក្លិប Hokkaido Consadole Sapporo នៃលីគកំពូលជប៉ុនថែមទៀត៕
