ថៃ នឹងដាក់កីឡាករឈុតបម្រុង ឲ្យចូលលេងក្នុងពានរង្វាន់ AFF Cup 2024
ថៃ នឹងដាក់កីឡាករឈុតបម្រុង ឲ្យចូលលេងក្នុងពានរង្វាន់ AFF Cup 2024
គ្រូបង្វឹកក្រុមដំរីសឹកថៃ លោក Masatada Ishii បានបញ្ជាក់ថា ក្រុមជម្រើសជាតិថៃ នឹងបាត់តារាឆ្នើមជាច្រើន ក្នុងព្រឹត្តិការណ៍ AFF Cup ឆ្នាំ ២០២៤ នេះហើយក្រុមទាំងមូល នឹងផ្អែកលើកីឡាករឈុតទី២ ជាចម្បង ដែលសំដៅដល់កីឡាករដែលភាគច្រើនអង្គុយនៅកៅអីបម្រុងនាពេលកន្លងមក។
កីឡាករថៃ ទាំង២៣នាក់ ត្រូវបានកោះហៅឲ្យទៅត្រៀមប្រកួតមិត្តភាពចំនួន២ប្រកួតជាមួយលីបង់ នៅថ្ងៃទី ១៤ ខែ វិច្ឆិកា និងឡាវ នៅថ្ងៃទី ១៧ ខែវិច្ឆិកា។ នេះក៏ជាការហាត់សមចុងក្រោយផងដែរ មុនពេលក្រុមចាប់ផ្ដើមដំណើរការពារជើងឯក AFF Cup 2024។
គ្រូបង្វឹក Masatada Ishii បាននិយាយនៅលើគេហទំព័ររបស់សមាគមបាល់ទាត់ថៃ (FAT) ថា៖« ភាគច្រើននៃកីឡាករដែលត្រូវបានកោះហៅនៅពេលនេះ នឹងចូលរួមក្នុង AFF Cup 2024។ ការជ្រើសរើសកីឡាករគឺប៉ះពាល់ ដោយសារក្រុមមួយចំនួន នៅតែលេងក្នុង Thai League 1 ក្នុងខែធ្នូ»។
ការប្រកួតពានរង្វាន់ Thai League 1 សប្ដាហ៍ទី ១៥ បានធ្វើឡើងនៅថ្ងៃទី ១ ខែធ្នូ ហើយក៏បញ្ចប់ជើងទី១ ផងដែរ ដូច្នេះក្លឹបអាចសម្រាកជាងមួយខែ។ ទោះជាយ៉ាងណាក៏ដោយ ក្រុមមួយចំនួននៅតែត្រូវរៀបចំកាលវិភាគរបស់ពួកគេ ដោយសារតែកាលវិភាគប្រកួតមានភាពមមាញឹកខ្លាំងពេក និងមិនត្រូវថ្ងៃ FIFA DAY។ ក្នុងចំណោមក្លឹបទាំងនោះ មានក្លឹបដែលចូលរួមចំណែកសមាជិកជាច្រើនក្នុងក្រុមជម្រើសជាតិដូចជា Port FC, Buriram United ឬ BG Pathum United។ ដូច្នេះ តារាឆ្នើមជាច្រើន នឹងអវត្តមាន រួមមាន Theerathon Bunmathan និង Chanathip Songkrasin , Sarach Yooyen, Supachok Sarachat ឬខ្សែប្រយុទ្ធ Teerasil Dangda និង Supachai Chaided ជាដើម។
ក្នុងបញ្ជីឈ្មោះកោះហៅរបស់ថៃ នៅខែវិច្ឆិកា មានកីឡាករ៧នាក់ ដែលត្រូវកោះហៅឲ្យចូលជម្រើសជាតិជាលើកដំបូង និងកីឡាករ U22 មួយចំនួនតូច។ កីឡាករ ដែលធ្លាប់ជាប់ជម្រើសជាតិឈុតធំមានតែ៨នាក់ប៉ុណ្ណោះ។
មែនទែនទៅ នេះមិនមែនជាលើកទីមួយទេ ដែលថៃ ដាក់ក្រុមទីពីរ លេងក្នុងពាន AFF Cup ។ កាលពីឆ្នាំ ២០១៨ ក្រោមការបង្វឹក Milovan Rajevac ក៏បាត់តារាឆ្នើមមួយចំនួនផងដែរ ហើយធ្លាក់នៅវគ្គពាក់កណ្តាលផ្តាច់ព្រ័ត្រ បន្ទាប់ពីស្មើ ២-២ ជាមួយម៉ាឡេស៊ី ហើយត្រូវបានកាត់ចេញ ដោយសារគ្រាប់បាល់ក្រៅដី។ ស្ថានភាពស្រដៀងគ្នានេះ បានកើតឡើងនៅឆ្នាំ ២០២២ ប៉ុន្តែក្រុមដែលដឹកនាំដោយលោក Mano Polking បានឈ្នះជើងឯក បន្ទាប់ពីបានយកឈ្នះលើក្រុមវៀតណាម ក្នុងលទ្ធផល ៣-២។
ក្រៅពីថៃ ឥណ្ឌូណេស៊ី ក៏បានបញ្ជាក់ថា វានឹងពិបាកក្នុងការនាំយកកីឡាករដែលលេងនៅអឺរ៉ុប ពីព្រោះមិនចំថ្ងៃ FIFA DAY។ គ្រូបង្វឹក Shin Tae-yong នឹងកោះហៅកីឡាករ៣០នាក់ ដែលលេងក្នុងស្រុក ខណៈផ្តល់អាទិភាពដល់ក្រុម U22។
គួរបញ្ជាក់ថា ពានរង្វាន់ AFF Cup នឹងប្តូរឈ្មោះទៅជា ASEAN Cup ចាប់ពីឆ្នាំ 2024 តទៅ។ ក្រុមទាំង ១០ នឹងចែកចេញជាពីរពូល ដោយប្រកួតក្នុងទឹកដី និងក្រៅដី ២ដងដូចគ្នា ដោយយក២ក្រុម ក្នុងមួយកំពូល ឡើងទៅវគ្គពាក់កណ្តាលផ្តាច់ព្រ័ត្រ៕
