យុវជន U16 និង 19 វិសាខា ត្រូវប្រកួតវគ្គផ្ដាច់ព្រ័ត្រ ពានរង្វាន់ Cambodian Youth League ស្អែកនេះ

យុវជន U16 និង 19 វិសាខា ត្រូវប្រកួតវគ្គផ្ដាច់ព្រ័ត្រ ពានរង្វាន់ Cambodian Youth League ស្អែកនេះ

ក្រុមបាល់ទាត់យុវជនអាយុក្រោម ១៩ឆ្នាំ វិសាខា ត្រូវប្រកួតជាមួយក្រុមបាល់ទាត់យុវជនអាយុក្រោម ១៩ឆ្នាំ អាយអេសអាយ ដង្កោសែនជ័យ ក្នុងការប្រកួតពានរង្វាន់លីគយុវជនកម្ពុជាអាយុក្រោម១៩ឆ្នាំ (Cambodian Youth League) នៅថ្ងៃអង្គារ ទី១២ ខែវិច្ឆិកា ឆ្នាំ២០២៤ វេលាម៉ោង ៦៖៣០នាទីល្ងាច ពហុកីឡដ្ឋានជាតិអូឡាំពិក។

មុនឡើងមកដល់វគ្គនេះ ក្រុម យុវជន ISI ដង្កោសែនជ័យ បានយកឈ្នះ ក្រុមយុវជនអាយុក្រោម ១៩ឆ្នាំបឹងកេត ក្នុងការប្រកួតវគ្គពាក់កណ្ដាលផ្ដាច់ព្រ័ត្រ សប្ដាហ៍ទី២០ ខណៈវិសាខា ជាក្រុមឈរកំពូលតារាង មានកៅអីទៅកាន់វគ្គផ្ដាច់ព្រ័ត្រដោយស្វ័យប្រវត្តិ។

ក្នុងថ្ងៃជាមួយគ្នានេះដែរ ក្រុមបាល់ទាត់យុវជនអាយុក្រោម ១៦ឆ្នាំ វិសាខា ក៏ត្រូវប្រកួតវគ្គផ្ដាច់ព្រ័ត្រផងដែរ ជាមួយក្រុមបាល់ទាត់យុវជនអាយុក្រោម ១៦ឆ្នាំ Siem Reap United ខណៈការប្រកួតធ្វើឡើង នៅម៉ោង ៣៖០០នាទីរសៀល នាពហុកីឡដ្ឋានជាតិអូឡាំពិក។
មុនឡើងមកដល់វគ្គនេះ ក្រុម យុវជន U16 Siem Reap United បានយកឈ្នះ ក្រុមយុវជន Tiffy Army FC ដោយបាល់ណាល់ទីកាត់សេចក្ដី ៦-៥ ក្នុង វគ្គពាក់កណ្ដាលផ្ដាច់ព្រ័ត្រ សប្ដាហ៍ទី២០ ខណៈវិសាខា ជាក្រុមឈរកំពូលតារាង កំពុងឈររងចាំ នៅវគ្គផ្ដាច់ព្រ័ត្រ។

បើតាមការប្រកាសរបស់គណកម្មាធិការរៀបចំការប្រកួត Cambodian Youth League 2024 ការប្រកួតខាងលើនេះ មិនមានការលក់សំបុត្រនោះទេ ដោយបងប្អូនអ្នកស្នេហាវិស័យកីឡាបាល់ទាត់ អាចចូលរួមទស្សនាដោយសេរី នៅពហុកីឡដ្ឋានជាតិអូឡាំពិក។

គួរបញ្ជាក់ថា សម្រាប់រូបមន្តការប្រកួតពានរង្វាន់លីគយុវជនកម្ពុជា (Cambodian Youth League 2024) ក្រុមទាំងអស់ ត្រូវប្រកួតគ្នាចំនួន២ជុំ ហើយក្រុមមានពិន្ទុខ្ពស់ជាងគេ កក់កៅអីទៅកាន់វគ្គផ្ដាច់ព្រ័ត្រដោយស្វ័យប្រវត្តិ ហើយក្រុមលេខ៣ និងលេខ៤ ត្រូវប្រកួតគ្នា ដើម្បីយកអ្នកឈ្នះទៅប្រកួតជាមួយក្រុមលេខ២ នៅវគ្គពាក់កណ្តាលផ្ដាច់ព្រ័ត្រ៕