យុវជន U16 វិសាខា និង U19 ISI ដង្កោសែនជ័យ ក្លាយជាម្ចាស់ពានរង្វាន់ Cambodian Youth League 2024

យុវជន U16 វិសាខា និង U19 ISI ដង្កោសែនជ័យ ក្លាយជាម្ចាស់ពានរង្វាន់ Cambodian Youth League 2024

ក្រុមបាល់ទាត់យុវជនអាយុក្រោម ១៦ឆ្នាំ វិសាខា បានក្លាយជាម្ចាស់ពាន Cambodian Youth League U16 បន្ទាប់ពីយកឈ្នះ ក្រុមបាល់ទាត់យុវជនអាយុក្រោម ១៦ឆ្នាំ Siem Reap United ក្នុងលទ្ធផល ១ទល់នឹង០ នាពហុកីឡដ្ឋានជាតិអូឡាំពិក។

ចំណែក ក្រុម អាយអេសអាយ ដង្កោសែនជ័យ បានគ្រងជើងឯកពានរង្វាន់លីគយុវជនកម្ពុជា អាយុក្រោម១៩ឆ្នាំ (Cambodian Youth League U19) បន្ទាប់ពីយកឈ្នះ ក្រុមយុវជនអាយុក្រោម១៩ឆ្នាំ វិសាខា ដោយបាល់ប៉េណាល់ទីកាត់សេចក្ដី ៤-៣។

ក្នុងដំណើរមកកាន់ការគ្រងពាននេះ ក្រុម យុវជន U19 ISI ដង្កោសែនជ័យ បានយកឈ្នះ ក្រុមយុវជនអាយុក្រោម ១៩ឆ្នាំបឹងកេត ក្នុងការប្រកួតវគ្គពាក់កណ្ដាលផ្ដាច់ព្រ័ត្រ ។

តារាងចំណាត់ថ្នាក់ ពានរង្វាន់ Cambodian Youth League U16 ៖
-លេខ១ វិសាខា
-លេខ២ សៀមរាបយូណាយធីត
-លេខ៣ សមាគមបាល់ទាត់ ខ.ភ.ម .

តារាងចំណាត់ថ្នាក់ ពានរង្វាន់ Cambodian Youth League U19 ៖
-លេខ១ អាយអេសអាយ ដង្កោសែនជ័យ
-លេខ២ វិសាខា
-លេខ៣ បឹងកេត ។

ចំពោះគ្រូបង្វឹកល្អប្រចាំព្រឹត្តិការណ៍ នៃពានរង្វាន់លីគយុវជនកម្ពុជា អាយុក្រោម១៩ឆ្នាំ (Cambodian Youth League U19) បានទៅលើលោក ទំ សារ៉ាយ ខណៈកីឡាករល្អ និងកីឡាករស៊ុតបញ្ជូលទីបានច្រើនជាងគេ ទាំង U16 និង U19 បានទៅលើកីឡាកររបស់ ISI ដង្កោសែនជ័យទាំងអស់។

គួរបញ្ជាក់ថា សម្រាប់រូបមន្តការប្រកួតពានរង្វាន់លីគយុវជនកម្ពុជា (Cambodian Youth League 2024) ក្រុមទាំងអស់ ត្រូវប្រកួតគ្នាចំនួន២ជុំ ហើយក្រុមមានពិន្ទុខ្ពស់ជាងគេ កក់កៅអីទៅកាន់វគ្គផ្ដាច់ព្រ័ត្រដោយស្វ័យប្រវត្តិ ហើយក្រុមលេខ៣ និងលេខ៤ ត្រូវប្រកួតគ្នា ដើម្បីយកអ្នកឈ្នះទៅប្រកួតជាមួយក្រុមលេខ២ នៅវគ្គពាក់កណ្តាលផ្ដាច់ព្រ័ត្រ៕