រដ្ឋមន្ត្រី នេត្រ ភក្ត្រា អំពាវនាវដល់អ្នកវិនិយោគអាស៊ាន-ចិនថ្មីៗបន្ថែមទៀតទៅវិនិយោគនៅកម្ពុជា
រដ្ឋមន្ត្រី នេត្រ ភក្ត្រា អំពាវនាវដល់អ្នកវិនិយោគអាស៊ាន-ចិនថ្មីៗបន្ថែមទៀតទៅវិនិយោគនៅកម្ពុជា
សាន់ស៉ី-ចិន៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានអំពាវនាវដល់អ្នកវិនិយោគអាស៊ាន និងចិន សូមបន្តការវិនិយោគនៅប្រទេសកម្ពុជា ដោយសារកម្ពុជាមានសុខសន្តិភាព ស្ថិរភាពនយោបាយ មានធនធានមនុស្ស និងកម្លាំងពលកម្មសកម្ម ជាង ៦០ភាគរយ ដែលអាចធានាដល់ការវិនិយោគដ៏ល្អបំផុត។
ការអំពាវនាវនេះ ធ្វើឡើងនាឱកាសដែល លោក នេត្រ ភក្ត្រា ចូលរួមក្នុងសិក្ខាសាលាស្តីពីការលើកកម្ពស់ពាណិជ្ជកម្ម និងការវិនិយោគអាស៊ាន-ចិន (សាន់ស៊ី) ក្រោមប្រធានបទ «កាលានុវត្តភាពថ្មី អនុភាពថ្មី កិច្ចសហប្រតិបត្តិការថ្មី និងការអភិវឌ្ឍថ្មី» នារសៀលថ្ងៃទី១២ ខែសីហា ឆ្នាំ២០២៤ នៅទីក្រុងឆាងជឺ ខេត្តសាន់ស៊ី នៃសាធារណរដ្ឋប្រជាមានិតចិន ក្នុងនោះមានការចូលរួមពីលោក ស្ស៉ឺ ចុងជុន (Shi Zhongjun) អគ្គលេខាធិការនៃមជ្ឈមណ្ឌលអាស៊ាន-ចិន (ACC) លោក ឆិន ស៉ាំងយ៉ាង (Chen Xiangyang) អភិបាលក្រុងឆាងជឺ លោក Benito Gosiaco Techicoof ប្រេសិតពិសេសហ្វីលីពីនទទួលបន្ទុកពាណិជ្ជកម្ម ការវិនិយោគ និងទេសចរណ៍ ប្រចាំនៅសាធារណរដ្ឋប្រជាមានិតចិន។
លោក នេត្រ ភក្ត្រា បានឱ្យដឹងថា សិក្ខាសាលាស្តីពីការលើកកម្ពស់ពាណិជ្ជកម្ម និងការវិនិយោគអាស៊ាន-ចិន (សាន់ស៊ី) ដែលជាព្រឹត្តការណ៍ដ៏សំខាន់នៅក្នុងកម្មវិធីសប្តាហ៍អាស៊ាន-ចិន (ACW) ឆ្នាំ២០២៤។ ឆ្នាំ២០២៤ ជាឆ្នាំនៃការផ្លាស់ប្តូរប្រជាជន និងប្រជាជនរវាងអាស៊ាន និងចិន ដូច្នេះលោករដ្ឋមន្ត្រីជឿជាក់យ៉ាងមុតមាំថា អាស៊ាន-ចិន នឹងផ្តល់ឱកាសល្អៗក្នុងការពង្រឹងកិច្ចសហប្រតិប្តតិការទ្វេភាគី អាស៊ាន-ចិន។
ក្នុងសិក្ខាសាលានោះ លោករដ្ឋមន្ត្រី នេត្រ ភក្ត្រា បានអំពាវនាវដល់អ្នកវិនិយោគអាស៊ាន និងចិន សូមបន្តការវិនិយោគនៅប្រទេសកម្ពុជា ដោយសារកម្ពុជាមានសុខសន្តិភាព ស្ថិរភាពនយោបាយ មានធនធានមនុស្ស និងកម្លាំងពលកម្មសកម្មជាង ៧០ភាគរយដែលអាចធានាដល់ការវិនិយោគដ៏ល្អបំផុត។
លោកបានបន្តថា គិតត្រឹមឆ្នាំ២០២៣ ការវិនិយោគផ្ទាល់ពីបរទេស (FDI) មកកម្ពុជា គិតជាទឹកប្រាក់មានទំហំសរុប ៤៨.៤ប៊ីលានដុល្លារអាមេរិក ដោយកើនឡើង ៧.៩ភាគរយ ធៀបនឹងឆ្នាំ២០២២។ កំណើននេះ បានមកដោយសារបរិយាកាសអំណោយផលដល់ការវិនិយោគ គោលនយោបាយលើកទឹកចិត្តដល់ការវិនិយោគថ្មីៗ និងកិច្ចព្រមព្រៀងពាណិជ្ជកម្មសេរីខ្នាតធំ (FTA) រវាងកម្ពុជា និងដៃគូពាណិជ្ជកម្មជាយុទ្ធសាស្ត្ររបស់យើង ក្នុងនោះមានដូចជា៖ កិច្ចព្រមព្រៀងពាណិជ្ជកម្មសេរីកម្ពុជា-ចិន កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយកម្ពុជា-អារ៉ាប់រួម។
យោងតាមព្រឹត្តិប័ត្រពាណិជ្ជកម្មចេញផ្សាយដោយអង្គការឃ្លាំមើលការវិនិយោគផ្ទាល់ពីបរទេស (FDI) ដែលមានមូលដ្ឋាននៅចក្រភពអង់គ្លេសបានបង្ហាញថា កម្ពុជាស្ថិតនៅលំដាប់ខ្ពស់ក្នុងតារាងសន្ទស្សន៍ពិភពលោកកាលពីពេលថ្មីៗនេះ ហើយត្រូវបានចាត់ទុកថាជាប្រទេសមានទីផ្សាររីកចម្រើនខ្លាំងជាងគេនៅលើពិភពលោកសម្រាប់ការវិនិយោគផ្ទាល់ពីបរទេសក្នុងឆ្នាំ២០២៤។ កម្ពុជាស្ថិតនៅចំណាត់ថ្នាក់ទី១ ក្នុងឆ្នាំ២០២៤ សម្រាប់ប្រទេសដែលមានកំណើនផលិតផលក្នុងស្រុក (GDP) ខ្លាំង និងថេរ អត្រាអតិផរណាទាប និងជាប្រទេសដែលមានកំណើនឆាប់រហ័សក្នុងវិស័យវិនិយោគផ្ទាល់ពីបរទេស។
លោកបញ្ជាក់បន្ថែមថា ទំនិញ និងផលិតផលផលិតនៅកម្ពុជា ត្រូវបាននាំចេញ និងផ្គត់ផ្គង់ដល់ប្រជាជនសរុបចំនួន២៥០លាននាក់ នៅក្នុងអនុតំបន់ទន្លេមេគង្គ និងអ្នកប្រើប្រាស់សរុបប្រហែល៦៣០លាននាក់ នៅលើទីផ្សារអាស៊ាន។ RCEP អាចផ្តល់ឱកាសចូលមកកាន់ទីផ្សារដល់ប្រជាជនសរុបចំនួន២.២ប៊ីលាននាក់ ស្មើនឹង៣០ភាគរយនៃប្រជាជនសរុបនៅលើពិភពលោក គិតជាទឹកប្រាក់សរុបចំនួន ២៦.៦ទ្រីលានដុល្លារអាមេរិក នៃផលិតផលក្នុងស្រុកសរុបនៅលើពិភពលោក ស្មើនឹង១២.៧ទ្រីលានដុល្លារអាមេរិកនៃពាណិជ្ជកម្មពិភពលោក។
លោករដ្ឋមន្ត្រីថ្លែងយ៉ាងដូច្នេះថា «ដោយសារសន្តិភាព ស្ថិរភាពនយោបាយ អត្រាប្រជាជនពេញវ័យ និងមូលធនមនុស្ស គួបផ្សំនឹងកំណើនសេដ្ឋកិច្ចខ្លាំងក្លា អាចឱ្យកម្ពុជាទាក់ទាញវិនិយោគិនជាច្រើនមកពីបណ្តាប្រទេសផ្សេងៗនៅអឺរ៉ុប សហរដ្ឋអាមេរិក និងអាស៊ី»។
លោកបញ្ជាក់ទៀតថា កាលពីឆ្នាំ២០២៣ ប្រទេសចិន នៅតែជាវិនិយោគិនធំជាងគេនៅកម្ពុជា ដែលបានបណ្តាក់ទុនសរុបរហូតដល់ទៅ៣.៧ប៊ីលានដុល្លារអាមេរិក។ ដូច្នេះលោកនៅតែអះអាងច្បាស់ៗថា កម្ពុជានឹងផ្តល់ឱកាសជាច្រើនដល់បណ្តាក្រុមហ៊ុន និងវិនិយោគិនមកពីចិន ជាពិសេសមកពីខេត្តឆាងជឺ និងបណ្តាប្រទេសនៅអាស៊ាន ក្នុងការមកបណ្តាក់ទុននៅកម្ពុជា៕
