លោកTrump ប្រកាសថា នឹងអង្គុយធ្វើបទសម្ភាសន៍ជាមួយ លោក Elon Musk

លោកTrump ប្រកាសថា នឹងអង្គុយធ្វើបទសម្ភាសន៍ជាមួយ លោក Elon Musk

បរទេសៈ អតីតប្រធានាធិបតីសហរដ្ឋអាមេរិក និងជាបេក្ខជនមកពីគណបក្សសាធារណរដ្ឋ លោក Donald Trump បានប្រកាសថា រូបលោកនឹងអង្គុយជាមួយមហាសេដ្ឋីបច្ចេកវិទ្យា លោក Elon Musk សម្រាប់បទសម្ភាសន៍ដ៏សំខាន់មួយនៅសប្តាហ៍ក្រោយ។

តាមរយៈការចុះផ្សាយរបស់សារព័ត៌មាន Politico នៅថ្ងៃទី ៧ ខែសីហា ឆ្នាំ ២០២៤ ដោយបានស្រង់សំដីរបស់លោក Trump ដែលបានបង្ហោះនៅលើប្រព័ន្ធផ្សព្វផ្សាយសង្គម Truth Social ថា «នៅយប់ថ្ងៃច័ន្ទ ខ្ញុំនឹងធ្វើបទសម្ភាសន៍ដ៏សំខាន់ជាមួយ លោក ELON MUSK — ព័ត៌មានលម្អិតសូមតាមដាន!» ។

ទោះជាយ៉ាងណា លោក Musk មិនទាន់ធ្វើអត្ថាធិប្បាយលើការចូលរួមធ្វើបទសម្ភាសន៍ដែលបានគ្រោងទុកនោះនៅឡើយទេ។

មហាសេដ្ឋីដែលជាបុគ្គលសាធារណៈ តែងតែប្រកាន់និន្នាការស្តាំនិយម និងមានភាពចម្រូងចម្រាសរូបនេះ បានគាំទ្រជាផ្លូវការចំពោះលោក Trump កាលពីខែមុន នៅថ្ងៃជាមួយគ្នានឹងលោក Trump ត្រូវបានគេបាញ់នៅក្នុងការប្រមូលផ្តុំយុទ្ធនាការបោះឆ្នោតមួយនៅក្នុងរដ្ឋ Pennsylvania។

បន្ទាប់ពីការចូលកាន់កាន់កាប់ប្រព័ន្ធទំនាក់ទំនងសង្គម X ដែលជាអតីតបណ្តាញសង្គម Twitter លោក Musk បានបញ្ចូលគណនីរបស់លោក Trump ឡើងវិញ ក្រោយពីមានការផ្អាកដោយអតីតម្ចាស់បណ្តាញសង្គម Twitter មុន បន្ទាប់ពីកុបកម្មថ្ងៃទី ៦ ខែមករានៅឯកាពីតូលសហរដ្ឋអាមេរិកក្នុងឆ្នាំ ២០២១ ។

នៅឯការប្រមូលផ្តុំយុទ្ធនាការមួយកាលពីថ្ងៃសៅរ៍ លោក Trump ហាក់ដូចជាបានទម្លាក់ការប្រឆាំងរបស់លោកចំពោះរថយន្តអគ្គិសនីដោយសារតែមានការគាំទ្រលោកពីលោក Musk ។
លោក Trump បាននិយាយថា «ខ្ញុំស្រឡាញ់រថយន្តអគ្គិសនី ខ្ញុំស្រឡាញ់ ក៏ដោយសារតែ លោក Elon គាំទ្រខ្ញុំយ៉ាងខ្លាំង»។

លោក Musk បានបដិសេធនូវរបាយការណ៍ដែលថាលោកកំពុងរៀបចំផែនការដើម្បីបញ្ជូលទ្រព្យសម្បត្តិដ៏ច្រើនរបស់លោក ទៅក្នុងយុទ្ធនាការបោះឆ្នោតឡើងវិញរបស់ លោក Trump ដោយអះអាងថាលោកនឹងមិន «បរិច្ចាគប្រាក់ដល់បេក្ខជនទាំងពីរ» សម្រាប់ប្រធានាធិបតីទេ៕