Ten Hag នឹងនៅបន្តស្នាក់នៅបិសាចក្រហម Manchester United

Ten Hag នឹងនៅបន្តស្នាក់នៅបិសាចក្រហម Manchester United

(បាល់ទាត់)៖ សារព័ត៌មានអង់គ្លេស បានចុះផ្សាយថា គ្រូបង្វឹកក្រុមបិសាចក្រហម Manchester United លោក Erik ten Hag នឹងបន្ត Old Trafford មួយរដូវកាលទៀត បើទោះបីជាក្រុមបញ្ចប់ចំណាត់ថ្នាក់លេខ៨ ក្នុងក្របខ័ណ្ឌ Premier League ក៏ដោយ។

ការសម្រេចចិត្តនេះកើតឡើង បន្ទាប់ពីការពិនិត្យមើលចុងបញ្ចប់នៃរដូវកាល ដែលបានបញ្ចប់ដោយលទ្ធផលដ៏គួរឱ្យភ្ញាក់ផ្អើលជាមួយនឹងការឈ្នះពានរង្វាន់ FA Cup វគ្គផ្តាច់ព្រ័ត្រលើក្រុមខ្លាំងមេឃខៀវ Manchester City។

ទូរទស្សន៍ Sky Sports បាននិយាយថា លោក Ten Hag កំពុងពិភាក្សាលើកិច្ចព្រមព្រៀងថ្មី ដោយកិច្ចសន្យារបស់លោកនឹងផុតកំណត់នៅរដូវកាលក្រោយ បន្ទាប់ពីគ្រប់គ្រងរយៈពេល ២ ឆ្នាំ។

មែនទែនទៅ អតីតគ្រូបង្វឹករបស់ Ajax Amsterdam រូបនេះ បានស្ថិតនៅក្រោមសម្ពាធកាន់តែខ្លាំងឡើង បន្ទាប់ពីម្ចាស់ជើងឯកអង់គ្លេស ២០សម័យ បានទទួលរងនូវការចាប់ផ្តើមរដូវកាលដ៏អាក្រក់បំផុតរបស់ពួកគេ ចាប់តាំងពីឆ្នាំ ១៩៦២-៦៣ ជាមួយនឹងការបរាជ័យចំនួន ៨ដង ក្នុង ១៥ប្រកួតដំបូងរបស់ពួកគេ គិតគ្រប់កម្មវិធី។

គួរបញ្ជាក់ថា ក្លិបបិសាចក្រហម បានបញ្ចប់ក្នុងចំណាត់ថ្នាក់លេខ ៨ ក្នុង Premier League បន្ទាប់ពីចាញ់ ១៤ ដង ក្នុងការប្រកួតលីកសរុបចំនួន ៣៨ របស់ពួកគេ និងបានធ្លាក់ចេញពីក្របខ័ណ្ឌ Champions League ក្នុងវគ្គចែកពូល។ រដូវកាលក្រោយ Man United មិនបានលេងក្នុងពានរង្វាន់ UCL ទៀតនោះទេ ដោយបានលេងត្រឹមពានរង្វាន់លំដាប់ទី២ អឺរ៉ុប UEFA Europa League៕