ខែមករា និងខែកុម្ភៈ តំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញរបស់អ្នកឧកញ៉ា គិត ម៉េង នាំចេញមានតំលៃ ២៦៤ លានដុល្លារ

ខែមករា និងខែកុម្ភៈ តំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញរបស់អ្នកឧកញ៉ា គិត ម៉េង នាំចេញមានតំលៃ ២៦៤ លានដុល្លារ

ភ្នំពេញ៖ នៅដើមឆ្នាំ២០២៤នេះ តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ)ដែលជាក្រុមហ៊ុនបុត្រសម្ព័ន្ធរបស់រ៉ូយ៉ាល់គ្រុប របស់ អ្នកឧកញ៉ា គិត ម៉េង ពិតជាមានការចាប់ផ្តើមមួយដ៏ល្អប្រសើរ ដោយការនាំចេញសរុប ក្នុងខែមករា និងខែកុម្ភៈ មានតំលៃ ២៦៤ លាន ដុល្លារអាមេរិក គឺ៥% ខ្ពស់ជាងតួលេខក្នុងរយៈពេលដូចគ្នានេះកាលពីឆ្នាំមុន។

RGPPSEZ អាចរំពឹងបានថា នៅក្នុងឆ្នាំនេះ អាចនឹងបំបែកកំណត់ត្រាខ្លួនឯងម្តងទៀត ដោយការនាំចេញសរុបប្រមាណ ២០០០ លាន ដុល្លារអាមេរិក។

ចំពោះក្រុមហ៊ុនឆ្នាំនេះគឺជាពិសេសមួយ ដែលមានព្រឹត្តិការណ៍ដ៏គួរអោយទន្ទឹងរង់ចាំជាច្រើន។ ព្រឹត្តិការណ៍ មួយក្នុងចំណោមនោះគឺ ការបើកសម្ភោធជាផ្លូវការ និងដំណើរការដំឡើងរថយន្តម៉ាក តូយ៉ូតា (Toyota) ដ៏ល្បីល្បាញនៃក្រុមហ៊ុន Toyota Tsusho Manufacturing (Cambodia) Co., Ltd. និងការបើកសម្ភោធជាផ្លូវការ និងដំណើរការនៃក្រុមហ៊ុន Metal Jewelry (Cambodia) Co., Ltd. ដែលជាវិនិយោគិនពីប្រទេសបារាំងដំបូងគេ និងជារោងចក្រផលិតគ្រឿងអលង្ការទាន់សម័យ ដំបូងគេ ក្នុងតំបន់សេដ្ឋកិច្ចពិសេស។ និងចុងក្រោយគឺ ការបង្កើតឡើងនៃតំបន់សេដ្ឋកិច្ចពិសេសថ្មីមួយទៀតរបស់យើង ដើម្បីបំពេញនូវតម្រូវការទីតាំងឧស្សាហកម្មដ៏មានគុណភាពខ្ពស់ ជុំវិញរាជធានីភ្នំពេញ។

បច្ចុប្បន្ននេះកំពុងដំណើរការស្នើសុំបង្កើត តំបន់សេដ្ឋកិច្ចពិសេស រ៉ូយ៉ាល់ គ្រុប កណ្តាល ឬ Royal Group Kandal Special Economic Zone (RGKSEZ) ដែលលាតសន្ធឹងលើផ្ទៃដីទំហំប្រមាណ ១២០ហិកតា និងតភ្ជាប់ពី តំបន់សេដ្ឋ កិច្ចពិសេស រ៉ូយ៉ាល់ គ្រុប ភ្នំពេញ ដោយស្ពានថ្មីមួយឆ្លងស្ទឹងព្រែកត្នោត ដែលយើងខ្ញុំបានសាងសង់រួចតាំងពីឆ្នាំ២០២២។ ក្រុមហ៊ុនបានចាប់ផ្តើមដំណើរការងារចាក់ដីបំពេញ ហើយការសាងសង់ហេដ្ឋារចនាសម្ព័ន្ធគោល អាចនឹងត្រូវបញ្ចប់ ដើម្បីទទួល ស្វាគមន៍ភ្ញៀវវិនិយោគថ្មីក្នុងឆ្នាំនេះដែរ។

ដោយសារតម្រូវការទីតាំងវិនិយោគមានការកើនឡើង ដីទំហំប្រមាណ១០០ហិកតា ត្រូវបានកក់ទុកមុនរួចទៅហើយ ដោយក្រុមហ៊ុនមួយដែលកំពុងដំណើរការក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ។ នៅពេលដំណើរការផលិតពេញលេញ ក្រុមហ៊ុននេះនឹងបង្កើតឱកាសការងារប្រមាណ ២ម៉ឺន នាក់ថែមទៀតដល់ប្រជាជនខ្មែរ។

ក្រៅពីការងារពង្រីកបន្ថែមនេះ RGPPSEZ ក៏មានការតាំងចិត្តយ៉ាងមុតមាំសម្រាប់ឆ្នាំ២០២៤នេះ ចំពោះគម្រោងនានា ពាក់ព័ន្ធនឹងការគាំពារបរិស្ថានផងដែរ ក្នុងនោះមាន ការបង្កើនការប្រើប្រាស់ថាមពលពន្លឺព្រះអាទិត្យ ការសាងសង់ស្ថានីយ៍ ប្រព្រឺត្តកម្មទឺកកខ្វក់ថ្មីមួយដែលមានប្រសិទ្ធិភាពខ្ពស់ជាងមុន ការលក់ផលិតផលកែច្នៃពីសំណល់ប្លាស្ទីក និងការផ្លាស់ប្តូរអោយ តំបន់យើងក្លាយទៅជា តំបន់សេដ្ឋកិច្ចដែលមានការបំពុលសូន្យ (Zero Emission SEZ)។

ចាប់តាំងពីការបង្កើតឡើងក្នុងឆ្នាំ២០០៦មក តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ)ដែលជាក្រុមហ៊ុនបុត្រសម្ព័ន្ធរបស់រ៉ូយ៉ាល់គ្រុប បានអភិវឌ្ឍឥត ឈប់ឈរ និងបានផ្លាស់ប្តូរមុខមាត់ថ្មីនៃទឹកដីតំបន់នេះ ដែលធ្លាប់តែជាវាលស្រែហើយមាន សកម្មភាពការងារដ៏តិចតួច មកជា តំបន់ឧស្សាហកម្មឈានមុខគេមួយ ដែលមានក្រុមហ៊ុនកម្មន្តសាលចំនួន៨៥ក្រុមហ៊ុន និងក្រុមហ៊ុនមិនមែនកម្មន្តសាល ចំនួន២៩ក្រុមហ៊ុន និងផ្តល់ឱកាសការងារដល់ប្រជាជនខ្មែរដល់ទៅជាង៤៣០០០នាក់៕