Varane នឹងអវត្តមានក្នុងជំនួប Manchester United ទល់នឹង Arsenal

Varane នឹងអវត្តមានក្នុងជំនួប Manchester United ទល់នឹង Arsenal

ក្លឹបបិសាចក្រហម Manchester United បាននិយាយកាលពីថ្ងៃពុធថា ខ្សែការពារ Raphael Varane នឹងខកខានការប្រកួត Premier League របស់ Manchester United ទល់នឹង ក្រុមកាំភ្លើងធំ Arsenal នៅថ្ងៃអាទិត្យ ដោយសារបញ្ហារបួស។

ក្លិបបិសាចក្រហម បាននិយាយនៅក្នុងសេចក្តីថ្លែងការណ៍មួយថា “ Raphael Varane នឹងត្រូវអវត្តមានពីក្រុមនៅពេល Manchester United ប៉ះ Arsenal ក្នុង Premier League នៅថ្ងៃអាទិត្យ ដោយសាររបួស។ កីឡាករអន្តរជាតិបារាំងរូបនេះ បានចូលលេងនៅតង់ទី១ ក្នុងជ័យជម្នះ ៣-២ របស់យើងជាមួយនឹងក្រុម Nottingham Forest នៅ Old Trafford កាលពីថ្ងៃសៅរ៍។ យើងរំពឹងថា Varane អាចនឹងអវត្តមាន ២ ទៅ ៣ សប្តាហ៍”។

គួររម្លឹកថា នឹងក្រុម Nottingham Forest កាលពីថ្ងៃសៅរ៍ សប្ដាហ៍មុន Varane បានប្ដូរចេញនៅនាទី៤៦ ជំនួសវិញដោយកីឡាករ Victor Lindelof ហើយការប្ដូរចេញនោះ ត្រូវបានអ្នកចាត់ការក្លិបបិសាចក្រហម លោក Erik ten Hag បញ្ជាក់ថា វាគឺដោយសារហេតុផលរបួស។

លោក Erik Ten Hag បាននិយាយក្រោយការប្រកួតថា ៖ « Varane បានប្រាប់ថា គាត់ដូចជាមានរបួស ហើយយើងមិនចង់ប្រថុយដាក់គាត់លេងទៀតទេ ព្រោះយើងមាន Harry Maguire, Victor Lindelof ដែលអាចជំនួសគាត់ ដូច្នេះយើងមិនចង់ប្រថុយឡើយ»។

ទោះបីជាយ៉ាងណាក៏ដោយ ទំហំនៃរបួសមិនទាន់ត្រូវបានបង្ហាញនៅឡើយទេ ហើយ លោក Ten Hag ត្រូវបានគេរំពឹងថា នឹងផ្តល់ព័ត៌មានថ្មីៗបន្ថែមទៀត ក្នុងពេលឆាប់ៗនេះ៕