កងកម្លាំងអ៊ីរ៉ង់ ៥,០០០ នាក់ បានស្លាប់ ខណៈភាពតានតឹងយោធានៅតែបន្តកើនឡើង
កងកម្លាំងអ៊ីរ៉ង់ ៥,០០០ នាក់ បានស្លាប់ ខណៈភាពតានតឹងយោធានៅតែបន្តកើនឡើង
តេអ៊ីរ៉ង់៖ របាយការណ៍ដែលទទួលបានដោយអង្គការ Iran International បានបង្ហាញថា សមាជិកយ៉ាងហោចណាស់ ៥,០០០ នាក់នៃកងកម្លាំងយោធា និងសន្តិសុខរបស់អ៊ីរ៉ង់ ត្រូវបានសម្លាប់ និងជាង ១៥,០០០ នាក់បានរងរបួស រហូតមកដល់ពេលនេះ ក្នុងការវាយប្រហាររវាងសហរដ្ឋអាមេរិក និងអ៊ីស្រាអែលលើប្រទេសនេះ។
របាយការណ៍បានបញ្ជាក់ថា មនុស្សជាច្រើនបានស្លាប់ក្នុងការវាយប្រហារតាមអាកាស ដែលផ្តោតលើអង្គភាពមីស៊ីល និងយន្តហោះគ្មានមនុស្សបើក។ ក្នុងនោះ កងកម្លាំងឆ្មាំបដិវត្តន៍ (IRGC) កងកម្លាំង Basij និងអង្គភាពប៉ូលីសប្រឆាំងកុបកម្ម បានទទួលរងការខាតបង់ធ្ងន់ធ្ងរបំផុត។
ទោះជាយ៉ាងណាមិនទាន់មានការបង្ហាញតួលេខផ្លូវការអំពីអ្នកស្លាប់ និងអ្នករងរបួសពីភាគីអាជ្ញាធរអ៊ីរ៉ង់នៅឡើយទេ។
ព័ត៌មានដដែលនេះក៏បានបញ្ជាក់ថា អាជ្ញាធរបានព្យាយាមកម្រិតការយល់ដឹងជាសាធារណៈអំពីការខាតបង់ ដោយរឹតត្បិតពិធីបុណ្យសព និងពិធីបញ្ចុះសពជាសាធារណៈ ខណៈដែលក្រុមគ្រួសារត្រូវបានណែនាំឱ្យរៀបចំពិធីកាន់ទុក្ខជាឯកជន។
តួលេខដែលបានរាយការណ៍នេះបង្ហាញពីសញ្ញានៃការមិនពេញចិត្ត ការថយចុះនៃស្មារតី និងភាពតានតឹងផ្នែកហិរញ្ញវត្ថុ ដែលត្រូវបានគេរាយការណ៍ថាកំពុងកើនឡើងក្នុងចំណោមផ្នែកខ្លះនៃកងកម្លាំងយោធា និងសន្តិសុខអ៊ីរ៉ង់។
យោងតាមរបាយការណ៍ សមាជិកមួយចំនួននៃអង្គភាពពិសេសរបស់ប៉ូលីស បានទទួលសេចក្តីជូនដំណឹងថា ការបើកប្រាក់បៀវត្សរ៍ត្រូវបានពន្យារពេល ដែលជាករណីកើតឡើងជាបន្តបន្ទាប់លើកទីបីក្នុងរយៈពេលប៉ុន្មានខែចុងក្រោយនេះ។
ជាការឆ្លើយតប បុគ្គលិកមួយចំនួនបានបដិសេធមិនចូលរួមសកម្មភាពគាំទ្ររដ្ឋាភិបាល ហើយការដាក់ពង្រាយកម្លាំងនៅទីក្រុងធំៗមួយចំនួនត្រូវបានរាយការណ៍ថាបានរងផលប៉ះពាល់។
បន្ថែមពីនេះ អ្នកចូលនិវត្តន៍ និងបុគ្គលិកយោធាមួយចំនួន ត្រូវបានរាយការណ៍ថាមិនទទួលបានប្រាក់ខែរយៈពេលពីរខែជាប់ៗគ្នា។
ប្រភពមួយចំនួនបានអះអាងថា មេបញ្ជាការជាន់ខ្ពស់បានចោទប្រកងកម្លាំង IRGC ថាប្រើប្រាស់វិបត្តិហិរញ្ញវត្ថុនៅធនាគារ Bank Sepah ដើម្បីបង្កើនឥទ្ធិពលលើស្ថាប័នមួយចំនួន ខណៈដែលធ្វើឱ្យអង្គភាពផ្សេងៗ ដូចជាប៉ូលីស កាន់តែខ្សោយ។
របាយការណ៍ក៏បានបង្ហាញថា IRGC បានព្យាយាមដោះស្រាយបញ្ហាកង្វះកម្លាំងមនុស្ស ដោយហៅអ្នកចូលនិវត្តន៍មួយចំនួនឱ្យត្រឡប់មកបំពេញភារកិច្ច និងលើកទឹកចិត្តអ្នកទោសខ្លះឱ្យសហការជាមួយកងកម្លាំងសន្តិសុខ ជាមួយនឹងការសន្យាលើកលែងទោស។
នៅក្នុងកងទ័ពអាកាស ស្ថានភាពស្មារតី និងការត្រៀមខ្លួនប្រតិបត្តិការ ត្រូវបានរាយការណ៍ថាមានកម្រិតទាប។ អាកាសយានិកជាច្រើន ត្រូវបានគេនិយាយថាមានការស្ទាក់ស្ទើរក្នុងការបំពេញបេសកកម្មប្រយុទ្ធ ជាពិសេសបន្ទាប់ពីមានការរាយការណ៍អំពីការប្រឈមមុខរវាងយន្តហោះ Yak-130 និងយន្តហោះ F-35 របស់អ៊ីស្រាអែល។
កម្រិតនៃការត្រៀមខ្លួនរបស់កងកម្លាំងក៏ត្រូវបានរាយការណ៍ថាបានធ្លាក់ចុះផងដែរ។
ក្នុងពេលដំណាលគ្នា បញ្ហាការបោះបង់ការងារ និងអវត្តមាននៅក្នុងកងកម្លាំងប៉ូលីស កំពុងក្លាយជាបញ្ហាប្រឈមធ្ងន់ធ្ងរសម្រាប់អាជ្ញាធរ។ របាយការណ៍មួយចំនួនបង្ហាញថា បុគ្គលិកប្រហែល ៣៥០ នាក់ បានចាកចេញពីមុខតំណែងនៅមូលដ្ឋានមួយ ខណៈដែលនៅក្នុងអង្គភាពខ្លះ អត្រាអវត្តមាន ឬការបាត់ខ្លួន ត្រូវបានរាយការណ៍ថាខិតជិតដល់ ៩០ ភាគរយ៕
