សត្វកម្រ រនាលពណ៌ មួយហ្វូងបានបង្ហាញខ្លួននៅតំបន់ការពារទេសភាពអន្លង់ព្រីង

សត្វកម្រ រនាលពណ៌ មួយហ្វូងបានបង្ហាញខ្លួននៅតំបន់ការពារទេសភាពអន្លង់ព្រីង

ក្រុមមន្រ្តី និងអ្នកជំនាញនៃអ្នកអង្គការជីវិតធម្មជាតិនៅកម្ពុជា(NLC) បានបញ្ជាក់ថា សត្វរនាលពណ៌បានបង្ហាញខ្លួនតំបន់ការពារទេសភាពអន្លង់ព្រីង ហើយសត្វរនាលពណ៌ដ៏កម្រទាំងនេះកំពុងរកចំណីនាតំបន់ទេសភាពមួយនេះយ៉ាងសុខសាន្ត។

សូមបញ្ជាក់ផងដែរថា តំបន់ការពារទេសភាពអន្លង់ព្រីង ស្ថិតនៅស្រុកកំពង់ត្រាច ខេត្តកំពត ត្រូវបានបង្កើតឡើងដោយអនុក្រឹត្យ លេខ ៨៤ អនក្រ-បក ចុះថ្ងៃទី០៩ ខែឧសភា ឆ្នាំ២០១៦ ។

សត្វរនាលពណ៌ មានឈ្មោះវិទ្យាសាស្ត្រ Mycteria leucocephala ។ ជាសត្វមានវ័ណ្ឌខ្មៅលើដើមទ្រូង ។ សត្វប្រភេទនេះមានចំពុះវែងពណ៌លឿងចាស់ និងមុខពណ៌លឿង។សត្វរនាលពណ៌មានកំពស់៩៣ ទៅ ១០២សង់ទីម៉ែត្រ និងមានទម្ងន់ពី ២ ទៅ ៥គីឡូក្រាម។

វាមានរោមពណ៌ស និងចុងកន្ទុយរោមពណ៌ផ្កាឈូក នៅពេលវាពេញវ័យ។ នៅក្នុងរដូវកាលបន្តពូជ វាមានរោមពណ៌ភ្លឺជាងពេលធម្មតា។ ពេលវានៅតូច មានសម្បុរពណ៌ត្នោតខ្ចី លើកលែងតែរោមវ័ណ្ណដើមទ្រូង។ រវាងសត្វញី និងសត្វឈ្មោលពេលពេញវ័យបន្តពូជមិនមានបង្ហាញចារឹកលក្ខណៈខុសប្លែកពីគ្នាទេ ប៉ុន្តែសត្វរនាលពណ៌ឈ្មោលមានរូបរាងធំជាងសត្វញីបន្តិច។ ទំហំខ្លួនរបស់វាគឺជាសូចនាករមួយសម្រាប់បង្ហាញពីភេទរបស់សត្វ ។

សត្វរនាលពណ៌ រស់នៅក្នុងតំបន់ដីសើមទឹកសាប និងវាលទំនាបលិចទឹក តំបន់វាលស្រែលិចទឹក និង បឹង។ នៅកម្ពុជា គេឃើញវត្តមាននៅតំបន់ព្រែកទាល់ និងធ្វើចរាចរណ៍ចេញទៅអាងត្រពាំងថ្ម ខេត្តបន្ទាយមានជ័យ និងបឹងពារាំងទំនាបលិចទឹកបឹងទន្លេសាប ក្នុងសង្កាត់ជ្រាវ ខេត្តសៀមរាប ។ ក្រៅពីនេះ មានសត្វរនាលពណ៌មួយចំនួនក៏មានបង្ហាញវត្តមាននៅតំបន់ឆ្នេរផងដែរ ដូចជានៅឧទ្យានជាតិរាមជាដើម ៕