ក្រសួងការងារផ្ដល់ប្រាក់ឧបត្ថម្ភជូនកម្មករនិយោជិត ដែលត្រូវបានព្យួរកិច្ចសន្យាការងារលើកទី៥
ក្រសួងការងារផ្ដល់ប្រាក់ឧបត្ថម្ភជូនកម្មករនិយោជិត ដែលត្រូវបានព្យួរកិច្ចសន្យាការងារលើកទី៥
ក្រសួងការងារ និងបណ្តុះបណ្តាលវិជ្ជាជីវៈកាលពីថ្ងៃទី៣១ ខែកក្កដាកន្លងទៅនេះបានចេញសេចក្ដីជូនដំណឹងមួយស្តីពីការបើកផ្ដល់ប្រាក់ឧបត្ថម្ភ (លើកទី៥) ជូនបងប្អូនកម្មករនិយោជិតសរុបចំនួន ជាង៧ពាន់នាក់ ដែលត្រូវបានព្យួរកិច្ចសន្យាការងារ។ ការផ្ដល់ប្រាក់ឧបត្ថម្ភរបស់ក្រសួងនេះធ្វើឡើងស្របទៅតាមស្មារតីនៃកញ្ចប់វិធានការគាំពាសង្គមរបស់រាជរដ្ឋាភិបាល។
បើតាមការចុះផ្សាយរបស់ក្រសួងការងារ កម្មករនិយោជិតចំនួន ៧,៦៩៦នាក់ នៃរោងចក្រចំនួន ១៥ ទីតាំងនៃវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរនិងកាបូប ដែលទទួលបានការអនុញ្ញាតព្យួរកិច្ចសន្យាការងារស្របតាមស្មារតីនៃសេចក្ដីណែនាំលេខ០២០/២៣ ក.ប/ ស.ណ.ន.ខ.ល ចុះថ្ងៃទី១៥ ខែមីនា ឆ្នាំ២០២៣។
ប្រាក់ឧបត្ថម្ភនេះនឹងត្រូវបើកផ្តល់ជាប្រាក់រៀល ដោយអាស្រ័យលើចំនួនថ្ងៃនៃការព្យួរកិច្ចសន្យាការងារ។ ក្នុងនោះក្រសួងការងារបានបែងចែកការឧបត្ថម្ភជាពីគឺ ប្រាក់ចំនួន ៨១,០០០រៀល (២០ដុល្លារអាម៉េរិក) សម្រាប់ការព្យួរកិច្ចសន្យាការងាររយៈពេល ៧ថ្ងៃ ដល់ ១៤ថ្ងៃ និងប្រាក់ចំនួន ១៦២,០០០រៀល (៤០ដុល្លារអាម៉េរិក) សម្រាប់ការព្យួរកិច្ចសន្យាការងាររយៈពេល ១៥ថ្ងៃ ដល់ ១ខែ។
ក្នុងន័យនេះ ក្រសួងការងារបានក្រើនរំលឹកដល់ប្រជាជនដែលត្រូវបើកប្រាក់ឧបត្ថម្ភខាងលើ ឱ្យរួសរាន់ទៅទទួលប្រាក់ក្នុងរយៈពេល ២១ថ្ងៃ បន្ទាប់ពីទទួលបានសារតាមទូរសព្ទពីធនាគារ វីង (ខេមបូឌា) ម.ក។ យ៉ាងណាមិញ ប្រសិនបើមានការខកខានមិនបានទៅទទួលប្រាក់ឧបត្ថម្ភ
ធនាគារ វីង (ខេមបូឌា) ម.ក នឹងបង្វិលប្រាក់ត្រលប់ជូនរាជរដ្ឋាភិបាលវិញ។
ដោយឡែក ដើម្បីអាចបើកប្រាក់ឧបត្ថម្ភនេះ កម្មករនិយោជិតត្រូវយកអត្តសញ្ញាណប័ណ្ណសញ្ញាតិខ្មែរ និងទូរសព្ទដែលទទួលបានសារពីធនាគារ ទៅកាន់ភ្នាក់ងារវីងដែលនៅជិតបំផុត ដោយមិនតម្រូវឱ្យ មានការបង់ប្រាក់សេវាទៅកាន់ភ្នាក់ងារវីងនោះឡើយ។
គួររំលឹកថា ប្រាក់ឧបត្ថម្ភខាងលើនេះ ជាកញ្ចប់ជំនួយសង្គមរបស់រដ្ឋាភិបាល ដោយយោងតាមសេចក្ដីណែនាំលេខ០២០/២៣ ក.ប/ ស.ណ.ន.ខ.ល ចុះថ្ងៃទី១៥ ខែមីនា ឆ្នាំ២០២៣ ស្តីពីការព្យួរកិច្ចសន្យាការងារកម្មករនិយោជិត ធ្វើការនៅរោងចក្រក្នុងវិស័យវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូប ដែលរងផលប៉ះពាល់ដោយសារវិបត្តិ សេដ្ឋកិច្ចសកល៕
