សមាគមវារីវប្បករកម្ពុជាស្នើសុំកិច្ចសហការពីចិន ដោយរំពឹងប្រកួតប្រជែងជាមួយប្រទេសជិតខាង
សមាគមវារីវប្បករកម្ពុជាស្នើសុំកិច្ចសហការពីចិន ដោយរំពឹងប្រកួតប្រជែងជាមួយប្រទេសជិតខាង
តាមរយៈកិច្ចព្រមព្រៀងច្រករបៀង «មច្ឆា និងអង្ករ» រវាងភាគីកម្ពុជា និងចិន ដែលចាប់ផ្ដើមបង្កើតឡើងកាលពីដើមឆ្នាំ ២០២៣កន្លងទៅ សមាគមវារីវប្បករកកម្ពុជាបានស្នើសុំកិច្ចសហការពីប្រទេស ចិន ដើម្បីធ្វើឱ្យប្រសើរឡើងនៃវិស័យវារីវប្បកម្ម ព្រមទាំងបំពេញតម្រូវការនៃទីផ្សារចិនផង។
ដោយឡែក កិច្ចព្រមព្រៀងនេះជាការពន្លឿនការធ្វើផែនការអភិវឌ្ឍន៍កសិកម្មទំនើបរបស់កម្ពុជា ដោយពិនិត្យលទ្ធភាពលើកិច្ចសហប្រតិបត្តិការកសិកម្មឌីជីថល គាំទ្រការលើកកម្ពស់លើវិស័យវារីវប្បកម្មចម្ការត្រូពិក និងវិស័យសក្តានុពលផ្សេងទៀតរបស់កម្ពុជានៅតាមតំបន់ទន្លេសាប។
ដើម្បីទាញផលប្រយោជន៍ពីកិច្ចព្រមព្រៀងនេះ លោក សុខ រ៉ាដែន ប្រធានសមាគមន៍វារីវប្បករកម្ពុជា បានស្នើជាថ្មីម្ដងទៀតទៅកាន់ភាគីចិន ដោយលោកសង្ឃឹមថាកិច្ចសហការនេះនឹងពង្រឹងផលិតផល វារីវប្បកម្មនៅកម្ពុជា ជាពិសេសបង្កលទ្ធភាពឱ្យកម្ពុជាអាចប្រកួតប្រជែងជាមួយទីផ្សារប្រទេសជិត ខាងបាន។
មិនមែនជាផលប្រយោជន៍តែម្ខាង ទីផ្សារចិនក៏កំពុងមានតម្រូវការច្រើនលើផលិតផលវារីវប្បកម្មផងដែរ និយាយជារួមប្រសិនបើកិច្ចសហការនេះអាចធ្វើបាន ភាគីប្រទេសទាំងពីរនឹងមានផលចំណេញរៀងៗខ្លួន។
លោក សុខ រ៉ាដែន បានឱ្យដឹងថា ៖ «បើសិនជាចិនទទួលយកការស្នើសុំរបស់កម្ពុជា និងផ្ដល់កិច្ចសហការពិតមែននោះ ស័យវារីវប្បកម្មនៅកម្ពុជានឹងកាន់តែមានភាពល្អប្រសើរ ហើយអាចប្រកួតប្រជែងក្នុងការទៅលក់នៅក្រៅប្រទេសបាន ព្រោះទីផ្សារបច្ចុប្បន្នហាក់នៅចង្អៀតនៅឡើយ»។
លោកបន្តថា បញ្ហាសំខាន់សំរាប់វិស័យវារីវប្បកម្មដែលកំពុងទាមទារឱ្យមានការកែប្រែនោះគឺ បញ្ហាពូជ បញ្ហាបច្ចេកទេស និងបញ្ហាធនធានមនុស្ស។ នេះក៏មិនមែនបានន័យថាវិស័យវារីវប្បកម្ម នៅកម្ពុជាកំពុងដើរថយក្រោយនោះដែរ ប៉ុន្តែវាជាការពង្រឹងបន្ថែមដើម្បីឆ្លើយតបទៅនឹងស្តង់ដារនាំចេញ។
ទោះជាយ៉ាងណា លោកមានសុទិដ្ឋិនិយមថាភាគីចិននឹងផ្ដល់កិច្ចសហការ តាមរយៈជំនួយបច្ចេក ទេស និងផ្ដល់ពូជសម្រាប់ចិញ្ចឹមក្នុងពេលឆាប់ៗខាងមុខ។
គួរបញ្ជាក់ថា កិច្ចព្រមព្រៀងច្រករបៀង «មច្ឆា និងអង្ករ» គឺជាការព្រមព្រៀងគ្នាក្នុងការលើកកម្ពស់កិច្ចសហប្រតិបត្តិការត្រួតពិនិត្យគយ និងជំរុញយ៉ាងសកម្មក្នុងការនាំចូលកសិផលកម្ពុជា ដែលមានគុណភាពខ្ពស់។
កិច្ចព្រមព្រៀងនេះដែរជាកត្តាលីករក្នុងការជំរុញអន្ដរតភ្ជាប់ «ច្រកចេញចូលតែមួយ» ដើម្បីជំរុញពាណិជ្ជកម្មទ្វេភាគីរវាងប្រទសទាំងពីរ និងប្រើប្រាស់ឱ្យបានពេញលេញនូវកិច្ចព្រមព្រៀង RCEP និងកិច្ចព្រមព្រៀងពាណិជ្ជកម្មសេរីកម្ពុជា-ចិន ព្រមទាំងជំរុញការចរចា ដំឡើងតំបន់ពាណិជ្ជកម្មសេរីអាស៊ាន-ចិន ៣.០ ក៏ដូចជាវេទិកានានា រួមទាំងពិព័រណ៍នាំចូលអន្តរជាតិ ចិន ពិព័រណ៍នាំចូល និងនាំចេញចិន និងពិព័រណ៍អាស៊ាន-ចិន៕
