កងទ័ពជើងទឹកឥណ្ឌា ដាក់ពង្រាយនាវាចម្បាំង ដើម្បីការពារខ្សែបណ្តាញថាមពលតាមច្រកសមុទ្រ Hormuz

កងទ័ពជើងទឹកឥណ្ឌា ដាក់ពង្រាយនាវាចម្បាំង ដើម្បីការពារខ្សែបណ្តាញថាមពលតាមច្រកសមុទ្រ Hormuz

ក្នុងបរិបទនៃភាពតានតឹងកាន់តែខ្លាំងឡើងនៅតំបន់អាស៊ីខាងលិច និងការរំខានជាបន្តបន្ទាប់នៅច្រកសមុទ្រ Hormuz កងទ័ពជើងទឹកឥណ្ឌាបានដាក់ពង្រាយនាវាពិឃាត និងសមត្ថភាពយោធាផ្សេងៗ ក្រោមប្រតិបត្តិការ Sankalp ដើម្បីអមដំណើរនាវាដឹកប្រេងឆៅ និងនាវាដឹកឧស្ម័ន LPG ដែលធ្វើដំណើរទៅកាន់ប្រទេសឥណ្ឌា។

នាវាចម្បាំងជាច្រើនគ្រឿង រួមមាននាវាពិឃាតប្រភេទ Visakhapatnam និង Kolkata ព្រមទាំងឧទ្ធម្ភាគចក្រ MH-60R កំពុងអនុវត្តការល្បាតយ៉ាងតឹងរឹងនៅតំបន់ឆ្នេរសមុទ្រអូម៉ង់ ដើម្បីធានាឱ្យបាននូវការធ្វើចរាចរណ៍តាមសមុទ្រដោយសុវត្ថិភាព។

ឥណ្ឌា ដែលពឹងផ្អែកលើការនាំចូលប្រេងជាង ៨០ ភាគរយ តាមរយៈច្រកសមុទ្រដ៏សំខាន់នេះ បានសម្រេចចិត្តអនុវត្តវិធានការដោយឯករាជ្យ ដើម្បីការពារសន្តិសុខថាមពលជាតិ ជាជាងចូលរួមក្នុងក្រុមចម្រុះអន្តរជាតិណាមួយ។

នៅពេលថ្មីៗនេះ នាវាចម្បាំងឥណ្ឌា រួមមាន Shivalik និង Nanda Devi បានអមដំណើរនាវាដឹកប្រេង Jag Prakash ឆ្លងកាត់ច្រកសមុទ្រ Hormuz ដោយជោគជ័យ ហើយរំពឹងថាបេសកកម្មអមដំណើរបន្ថែមទៀត នឹងត្រូវអនុវត្តក្នុងពេលឆាប់ៗខាងមុខ។

ការឆ្លើយតបយ៉ាងរឹងមាំរបស់កងទ័ពជើងទឹកឥណ្ឌា បង្ហាញពីការប្តេជ្ញាចិត្តក្នុងការការពារផ្លូវពាណិជ្ជកម្មតាមសមុទ្រដ៏សំខាន់ និងធានាសន្តិសុខថាមពលជាតិ ដោយមិនពឹងផ្អែកលើកម្លាំងខាងក្រៅ៕