លោក Trump៖ ការគ្រប់គ្រងរបស់អាមេរិកលើវេណេស៊ុយអេឡា អាចអូសបន្លាយពេលរាប់ឆ្នាំ

លោក Trump៖ ការគ្រប់គ្រងរបស់អាមេរិកលើវេណេស៊ុយអេឡា អាចអូសបន្លាយពេលរាប់ឆ្នាំ

វ៉ាស៊ីនតោន៖ ប្រធានាធិបតីសហរដ្ឋអាមេរិក លោក Donald Trump បានបញ្ជាក់ថា វត្តមាន និងការគ្រប់គ្រងរបស់សហរដ្ឋអាមេរិកនៅក្នុងប្រទេសវេណេស៊ុយអេឡា អាចនឹងបន្តអូសបន្លាយពេលរាប់ឆ្នាំទៅមុខទៀត មិនមែនជាវិធានការរយៈពេលខ្លីនោះទេ។

ក្នុងបទសម្ភាសន៍ផ្តាច់មុខជាមួយកាសែត The New York Times កាលពីថ្ងៃព្រហស្បតិ៍កន្លងទៅ លោក Trump បានបដិសេធមិនផ្តល់កាលបរិច្ឆេទជាក់លាក់សម្រាប់ការដកវត្តមានអាមេរិកចេញពីវេណេស៊ុយអេឡា ដោយសង្កត់ធ្ងន់ថា «វាអាចចំណាយពេលយូរ» ដើម្បីធានាថាស្ថានការណ៍នឹងដំណើរការទៅដោយរលូន និងមានសុវត្ថិភាព។

សេចក្តីថ្លែងការណ៍នេះ ត្រូវបានធ្វើឡើងនៅពេលវេណេស៊ុយអេឡាកំពុងឆ្លងកាត់ការផ្លាស់ប្តូរនយោបាយដ៏សំខាន់មួយ ដែលនាំឱ្យសហរដ្ឋអាមេរិកដើរតួនាទីសកម្មក្នុងការរៀបចំសណ្តាប់ធ្នាប់ និងស្ថិរភាពឡើងវិញ។

លោក Trump ក៏បានលើកឡើងថា គោលដៅចម្បងមួយនៃការចូលរួមនេះ គឺការស្តារសេដ្ឋកិច្ចវេណេស៊ុយអេឡាឡើងវិញ និងការប្រើប្រាស់ធនធានប្រេងដ៏សម្បូរបែបរបស់ប្រទេសនេះ ដើម្បីជំរុញសេដ្ឋកិច្ចតំបន់ និងជួយកាត់បន្ថយតម្លៃប្រេងនៅទីផ្សារពិភពលោក។

ជាមួយគ្នានេះ លោកបានសម្តែងការពេញចិត្តចំពោះកិច្ចសហការជាមួយរដ្ឋាភិបាលបណ្តោះអាសន្នបច្ចុប្បន្ន ដែលកំពុងខិតខំស្តារស្ថិរភាពនយោបាយ ក្រោយសម័យកាលរបស់លោក Nicolás Maduro។

ទាក់ទិននឹងបញ្ហានេះ អ្នកវិភាគនយោបាយមួយចំនួន យល់ឃើញថា ការលើកឡើងរបស់លោក Trump បង្ហាញពីការបន្តយុទ្ធសាស្ត្រ «អាមេរិកមកមុន» (America First) ដែលមានបំណងភ្ជាប់ផលប្រយោជន៍ភូមិសាស្ត្រនយោបាយជាមួយផលចំណេញសេដ្ឋកិច្ចសម្រាប់សហរដ្ឋអាមេរិក។

ទោះជាយ៉ាងណា ការបញ្ជាក់អំពីការត្រួតពិនិត្យរយៈពេល «រាប់ឆ្នាំ» នេះ ក៏បានបង្កើតសំណួរអំពីអធិបតេយ្យភាពពេញលេញរបស់វេណេស៊ុយអេឡា និងអាចនាំឱ្យមានប្រតិកម្មពីបណ្តាប្រទេសជិតខាងក្នុងតំបន់អាមេរិកឡាទីនផងដែរ៕