គណៈប្រតិភូកម្ពុជានឹងទៅទាក់ទាញវិនិយោគនៅអូស្ត្រាលី នៅចុងខែសីហានេះ

គណៈប្រតិភូកម្ពុជានឹងទៅទាក់ទាញវិនិយោគនៅអូស្ត្រាលី នៅចុងខែសីហានេះ

ភ្នំពេញ៖ ថ្ងៃទី៦ ខែសីហា ឆ្នាំ២០២៥ លោកឧបនាយករដ្ឋមន្ត្រី ស៊ុន ចាន់ថុល និងឯកអគ្គរដ្ឋទូតអូស្ត្រាលីប្រចាំនៅកម្ពុជា លោក Derik Yip បានដឹកនាំកិច្ចប្រជុំពិភាក្សាការងារត្រៀមសម្រាប់រៀបចំបេសកកម្មបង្ហាញផ្លូវវិនិយោគ (Investment Roadshow) ដែលនឹងប្រព្រឹត្តទៅនៅចុងខែសីហាខាងមុខនេះ។

ក្នុងកិច្ចប្រជុំនាពេលនោះ មានការចូលរួមពីថ្នាក់ដឹកនាំក្រសួង-ស្ថាប័នពាក់ព័ន្ធ និងតំណាងពីវិស័យឯកជនតាមរយៈ សមាគមឧកញ៉ាកម្ពុជា ដែលនឹងអមដំណើរគណៈប្រតិភូទៅកាន់ប្រទេសអូស្ត្រាលីផងដែរ។

គោលបំណងចម្បងនៃកិច្ចប្រជុំត្រៀមនេះគឺដើម្បីធានាថាបេសកកម្មវិនិយោគដែលនឹងកើតឡើងនៅចុងខែសីហា អាចដំណើរការទៅដោយរលូន និងទទួលបានប្រសិទ្ធផលខ្ពស់តាមការរំពឹងទុក។

បើតាមក្រុមប្រឹក្សាអភិវឌ្ឍន៍កម្ពុជា គោលបំណងនៃបេសកកម្ម នេះ គឺដើម្បីផ្សព្វផ្សាយអំពីបច្ចុប្បន្នភាពនៃបរិយាកាសវិនិយោគ និងសក្តានុពលនានារបស់កម្ពុជា ទៅកាន់វិនិយោគិនអូស្ត្រាលី ដើម្បីទាក់ទាញការវិនិយោគដោយផ្ទាល់ពីបរទេស (FDI) មកកាន់កម្ពុជា។

បេសកកម្មនេះទទួលបានការសម្របសម្រួលយ៉ាងយកចិត្តទុកដាក់ពីសំណាក់ស្ថានទូតអូស្ត្រាលីប្រចាំនៅកម្ពុជា និងកម្មវិធីភាពជាដៃគូកម្ពុជា-អូស្ត្រាលីសម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)៕