Ronaldo ទទួលបានពានរង្វាន់ពិសេស សម្រាប់ការតំណាងឱ្យប្រទេសព័រទុយហ្គាល់ នៅលើឆាកអន្តរជាតិ

Ronaldo ទទួលបានពានរង្វាន់ពិសេស សម្រាប់ការតំណាងឱ្យប្រទេសព័រទុយហ្គាល់ នៅលើឆាកអន្តរជាតិ

កំពូលកីឡាករ Cristiano Ronaldo ដែលជាកីឡាករបាល់ទាត់ដ៏ល្បីល្បាញបំផុតរបស់ប្រទេសព័រទុយហ្គាល់ និងពិភពលោក បានទទួលពានរង្វាន់ពិសេសមួយ កាលពីម្សិលមិញ ដែលជាការទទួលស្គាល់ពីឥទ្ធិពលរបស់គាត់ ចំពោះកីឡាបាល់ទាត់ព័រទុយហ្គាល់។

ក្នុងអំឡុងពេលប្រារព្ធពិធី Quinas de Ouro ដែលផ្តល់កិត្តិយសដល់កីឡាករបាល់ទាត់កំពូលរបស់ប្រទេសព័រទុយហ្គាល់ ដែលធ្វើឡើងជារៀងរាល់ឆ្នាំ Ronaldo ត្រូវបានគេផ្តល់រង្វាន់នេះជូន។

Ronaldo បានទទួលពានរង្វាន់ Platinum Quinas សម្រាប់ការរួមចំណែកពិសេសរបស់គាត់ ចំពោះកីឡាបាល់ទាត់ព័រទុយហ្គាល់ និងសម្រាប់ការតំណាងឱ្យប្រទេសព័រទុយហ្គាល់ នៅលើឆាកអន្តរជាតិ។

បន្ទាប់ពីទទួលបានពានរង្វាន់នេះ Ronaldo បាននិយាយនៅលើ Instagram ថា ៖« ខ្ញុំមានមោទនភាព ក្នុងការទទួលបានពានរង្វាន់នេះ សម្រាប់អាជីពរបស់ខ្ញុំជាមួយក្រុមជម្រើសជាតិ»។

គួរបញ្ជាក់ថា ពេញមួយអាជីពរបស់គាត់ជាមួយក្រុមជម្រើសជាតិព័រទុយហ្គាល់ Ronaldo បានបង្ហាញខ្លួនចំនួន ២១៦ប្រកួត និងស៊ុតបញ្ចូលទីបាន ១៣៣គ្រាប់ និងបានក្លាយជាកីឡាករបាល់ទាត់ ដែលស៊ុតបញ្ជូលទីឲ្យក្រុមជម្រើសជាតិច្រើនជាងគេបំផុតនៅលើពិភពលោក៕