ក្រសួងបរិស្ថានលើកទឹកចិត្តឱ្យក្រុមហ៊ុនកែច្នៃឬស្សីប្រើថាមពលពន្លឺព្រះអាទិត្យ ដើម្បីចូលរួមជំរុញអព្យាក្រឹត្យកាបូនក្នុងសហគមន៍
![ក្រសួងបរិស្ថានលើកទឹកចិត្តឱ្យក្រុមហ៊ុនកែច្នៃឬស្សីប្រើថាមពលពន្លឺព្រះអាទិត្យ ដើម្បីចូលរួមជំរុញអព្យាក្រឹត្យកាបូនក្នុងសហគមន៍](https://ennasia.com/wp-content/uploads/2023/08/1Update-File-Thumbnail-For-Webside-final-06-07-2023-191.jpg)
ក្រុមហ៊ុន LEOPA BAMBOO Co., LTD ដែលបានបង្កើតជាសិប្បកម្មកែច្នៃឬស្សី សម្រាប់នាំចេញ និងកែច្នៃកំទេចឬស្សី ធ្វើជាធ្យូងដុត ដែលបម្រើឲ្យវិស័យកសិកម្ម បានទទួលការគាំទ្រយ៉ាងពេញទំហឹងពីក្រសួងបរិស្ថាន។
ក្រុមហ៊ុនកែច្នៃខាងលើនេះមានទីតាំងនៅក្នុងតំបន់សហគមន៍ការពារធម្មជាតិចំបក់ ក្នុងខេត្តកំពង់ស្ពឺ បានចូលរួមចំណែកជំរុញឲ្យប្រជាពលរដ្ឋនៅតាមសហគមន៍តំបន់ការពារធម្មជាតិ។ ជាពិសេស ជួយឱ្យប្រជាជនទទួលបានចំណូលបន្ថែម តាមរយៈការដាំឬស្សី ដើម្បីផ្គត់ផ្គង់ឲ្យក្រុមហ៊ុន រីឯការដាំឬស្សីនេះទៀតសោតក៏នឹងក្លាយជាគម្របព្រៃឈើ ដែលអាចស្រូបយកកាបូន ដែលធ្វើឲ្យតំបន់សហគមន៍ការពារធម្មជាតិក្លាយជាជាសហគមន៍អព្យាក្រឹត្យកាបូន។
ជាមួយគ្នានេះ ដើម្បីជួយឲ្យសហគមន៍នេះទទួលបានជោគជ័យ ក្លាយជាសហគមន៍អព្យាក្រឹត្យកាបូន កាន់តែមានប្រសិទ្ធភាពថែមទៀត ឯកឧត្តម អ៊ាង សុផល្លែត រដ្ឋមន្ត្រីក្រសួងបរិស្ថានបានលើកទឹកចិត្តឲ្យក្រុមហ៊ុនកែច្នៃឬស្សី ងាកមកប្រើប្រាស់ថាមពលព្រះអាទិត្យ(Solar Power)។
គួរបញ្ជាក់ថា បច្ចុប្បន្នក្រុមហ៊ុន LEOPA BAMBOO Co., LTD កំពុងដំណើរការសាងសង់សិប្បកម្មកែច្នៃឬស្សី ដែលដកហូតដោយប្រជាសហគមន៍ ដើម្បីធ្វើជាគ្រឿងសង្ហារឹមសម្រាប់នាំចេញ និងលើសពីនេះ មានគម្រោងកែច្នៃកំទេចឬស្សីដែលជាសំណល់ពីការផលិតគ្រឿងសង្ហារឹម ធ្វើជាធ្យូងទៀតផង។
យ៉ាងណាមិញ ការរៀបចំបង្កើតសិប្បកម្មកែច្នៃឬស្សីនេះ គឺដោយសារក្រុមហ៊ុន បានចុះកិច្ចព្រមព្រៀងស្ដីពីកិច្ចសហការលើការកែច្នែឬស្សី ជាមួយសហគមន៍តំបន់ការពារធម្មជាតិចំបក់។ មកដល់ បច្ចុប្បន្ន ក្រុមហ៊ុននេះបានរួមចំណែកលើជីវភាពប្រជាពលរដ្ឋច្រើនតាមរយៈ ការទទួលទិញឬស្សី ពីសហគមន៍ដែលដកហូតឬស្សីព្រៃ។
ឯការដកហូតទៀតសោត គឺធ្វើឡើងប្រកបដោយនិរន្តរភាព ជៀសវាងការធ្វើឱ្យផុតពូជនៃធនធានធម្មជាតិ និងជំរុញពលរដ្ឋចូលរួមដាំដុះឬស្សីថែមទៀតនៅលើដីរបស់សហគមន៍៕