កម្ពុជារកចំណូលបានជិត៨០០លានដុល្លារ ពីការនាំចេញស្រូវអង្ករក្នុងរយៈពេល៥ខែ
កម្ពុជារកចំណូលបានជិត៨០០លានដុល្លារ ពីការនាំចេញស្រូវអង្ករក្នុងរយៈពេល៥ខែ
តាមរយៈរបាយការណ៍នាំចេញស្រូវ និងអង្ករក្នុងរយៈពេល ៥ខែដំបូងនៃឆ្នាំ២០២៣ របស់សហព័ន្ធ ស្រូវអង្ករកម្ពុជាបានឱ្យដឹងថា កម្ពុជាសម្រេចការនាំចេញអង្ករចំនួន ២៧៨,១៨៤ តោន និង ស្រូវចំនួន ២,១៤២,៤៨៣ តោន (ប្រមាណជា ១.៣៧ លានតោនអង្ករ) គិតជាទឹកប្រាក់សរុបមានចំនួន ៧៣៦.៩០ លានដុល្លារសហរដ្ឋអាមេរិក។
ក្នុងនោះ អង្ករកម្ពុជាបាននាំចេញតាមរយៈក្រុមហ៊ុនចំនួន ៤៨ ដែលនាំចេញទៅកាន់គោលដៅចំនួន ៤៩ និងបានបរិមាណអង្ករសរុបចំនួន ២៧៨ ១៨៤ តោន ដែលគិតជាទឹកប្រាក់ចំនួន ១៩១.៦៤ លានដុល្លារសហរដ្ឋអាមេរិក និងស្រូវចំនួន ២ ១៤២,៤៨៣ តោន (ប្រមាណជា ១.៣៧ លាន តោនអង្ករ)។
ជាការកត់សម្គាល់ ប្រទេសចិនគឺជាទីផ្សារចម្បងរបស់កម្ពុជា ដែលគ្របដណ្តប់លើការនាំចេញសរុបរបស់កម្ពុជា ចំនួន ៤២.៤៣% ដែលមានទឹកប្រាក់សរុបចំនួន ៧៧.៤២ លានដុល្លារសហរដ្ឋអាមេរិក។ បន្ទាប់ទៅ ប្រទេសនៅក្នុងទ្វីបអ៊ឺរ៉ុបចំនួន ២៥ប្រទេសស្ថិតនៅលេខរៀងទី២ ដោយគ្របដណ្ដប់ការនាំ ចេញចំនួន ៣៧.៩៣% ដែលគិតជាទឹកប្រាក់ប្រមាណជា ៧១.៩៩ លាន ដុល្លារសហរដ្ឋអាមេរិក
និងប្រទេសនៅក្នុងតំបន់អាស៊ីអាគ្នេយ៍ឈរនៅលំដាប់លេខ៣ ដោយគ្របដណ្ដប់ការនាំចេញចំនួន ៧.៨៦%។ ក្នុងនោះប្រទេសហ្វីលីពីន ជាទីផ្សារថ្មីសម្រាប់កម្ពុជា ដែលប្រទេសនេះទើបនាំចេញក្នុងបរិមាណធំជាលើកទី១ ក្នុងចំនួន ២ ៥៧៥ តោន ក្រៅពីនេះទីផ្សារផ្សេងៗ ចំនួន ២០ គោលដៅស្មើនឹង ១០.៧៨%។
ដោយឡែកប្រភេទអង្ករដែលបាននាំចេញនេះរួមមាន អង្ករក្រអូបគ្រប់ប្រភេទមានចំនួន ៨៣.៤៩% អង្ករ ស ចំនួន ១០.៨៧% អង្ករចំហុយ ៣.៧១% និងអង្ករសរីរាង្គចំនួន ១.៩៣% ៕
