រដ្ឋមន្ត្រីកសិកម្ម ណែនាំឲ្យសហគមន៍កសិកម្មរៀបចំផែនការដាំដុះច្បាស់លាស់ ដើម្បីធានាការផ្គត់ផ្គង់ តាមតម្រូវការទីផ្សារ

រដ្ឋមន្ត្រីកសិកម្ម ណែនាំឲ្យសហគមន៍កសិកម្មរៀបចំផែនការដាំដុះច្បាស់លាស់ ដើម្បីធានាការផ្គត់ផ្គង់ តាមតម្រូវការទីផ្សារ

(ព្រះវិហារ)៖ ដោយមើលឃើញពីសក្កានុពលនៃវិស័យកសិកម្មសេរីរាងក្នុងខេត្តព្រះវិហារ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានណែ​នាំដល់​សហគមន៍ឲ្យមានការធ្វើផែនការច្បាស់លាស់ក្នុងការចិញ្ចឹម និងដាំដុះរបស់កសិករជាសមាជិក ដើម្បីធានាការផ្គត់ផ្គង់តាមតម្រូវការទីផ្សារ ដោយធ្វើយ៉ាងណា​«ចំណាយតិច ចំណេញច្រើន»។

ឯកឧត្តម ឌិត ទីណា រដ្ឋមន្ត្រីក្រសួងកសិកម្មកាលពីថ្ងៃទី ២៤ឧសភា ថ្មីៗនេះ បានអញ្ជើញធ្វើទស្សនកិច្ចសហគមន៍កសិកម្មមួយ ព្រមទាំងបានជួបសំណេះសំណាលជាមួយសមាជិក របស់សហគមន៍។ ដំណើរទស្សនកិច្ចរបស់ឯកឧត្តមរដ្ឋមន្ត្រីនេះ ធ្វើឡើងក្នុងគោលបំណង រៀបចំ​ខេត្តព្រះវិហារ​ឱ្យទៅជាខេត្តផលិតស្រូវសរីរាង្គ ដែលមានតម្លៃទីផ្សារខ្ពស់ និងងាយប្រកួត​ប្រជែង​ទីផ្សារ។

មួយវិញទៀត ឯកឧត្តមរដ្ឋមន្ត្រីក៏បានជំរុញឲ្យសហគមន៍លើកជាផែនការ និងថវិកា ផ្អែកលើ​តម្រូវការរបស់កសិករ ដើម្បីឱ្យការរៀបចំអនុវត្តត្រូវតាមគោលការណ៍ ជាពិសេសគឺ ត្រូវពិនិត្យ​លទ្ធភាពគ្រប់គ្រង និងប្រើប្រាស់ទឹកឱ្យមានប្រសិទ្ធភាពសម្រាប់វិស័យកសិកម្ម។

បើតាមឯកឧត្តមរដ្ឋមន្ត្រី ក្រសួងនឹងជួយសហគមន៍កសិកម្មលើការងារទីផ្សារឱ្យកាន់តែប្រសើរតាមរយៈ​ការពង្រឹងការធ្វើកសិកម្មតាមកិច្ចសន្យា និងការផ្តល់បច្ចេកទេសកសិកម្ម។ ជាក់ស្ដែង ក្នុងឳកាស​ទស្សនៈកិច្ចនេះ ក្រសួងកសិកម្មក៏នឹងចែកពូជស្រូវ និងចន្ទី ដល់សមាជិកសហគមន៍​រមទម​សាមគ្គី​មានជ័យផងដែរ។

ក្រៅពីនេះ ឯកឧត្តមក៏ជំរុញឲ្យមានការរៀបចំសហគមន៍កសិកម្ម ដែលមានការគ្រប់គ្រង និងកំណត់​ទីផ្សារច្បាស់​លាស់ជូន​កសិករ ដោយមានអ្នកទទួលបន្ទុកប្រចាំខេត្តនេះស្រាប់ដើម្បីជួយ​កសិករ​លើការងារ​បច្ចេកទេស និងបញ្ហាផ្សេងៗ សំដៅធ្វើយ៉ាងណាកែទម្រង់ដើម្បីឱ្យ​កសិកម្មមាន​ប្រសិទ្ធភាព។

គួរបញ្ជាក់ថា សហគមន៍កសិកម្មរមទមសាមគ្គីមានជ័យស្ថិតនៅក្នុងឃុំរមទម ស្រុករវៀង ខេត្តព្រះវិហារ​។ សហគមន៍​នេះមានសមាជិកចំនួន 335គ្រួសារ ស្មើ5360ហ៊ុន មកពីភូមិទាំង6 ក្នុងឃុំរមទម។ កន្លងមក​មុខ​​របរសំខាន់ៗរបស់សហគមន៍មានដូចជា៖ អនុវត្តកសិកម្មតាមកិច្ចសន្យាលក់ស្រូវសរីរាង្គ សេវាកម្មឥណទាន លក់សំភារៈកសិកម្ម សេវាកម្មបោកស្រូវជាដើម៕