ក្រសួងពង្រឹងគុណភាពអាជីវកម្មសេវាកម្មទេសចរណ៍ឆ្ពោះទៅស្វាគមន៍ព្រឹត្តិការណ៍ SEA Games 2023

ក្រសួងពង្រឹងគុណភាពអាជីវកម្មសេវាកម្មទេសចរណ៍ឆ្ពោះទៅស្វាគមន៍ព្រឹត្តិការណ៍ SEA Games 2023

ខេត្តព្រះសីហនុ ៖ ក្រសួងទេសចរណ៍បើកវគ្គបណ្តុះបណ្តាលដើម្បីពង្រឹងគុណភាពអាជីវកម្មសេវាកម្មទេសចរណ៍ឆ្ពោះទៅស្វាគមន៍ព្រឹត្តិការណ៍ SEA Games 2023 និងយុទ្ធនាការ “ឆ្នាំទស្សនាកម្ពុជា ២០២៣”។

ឯកឧត្តម គឹម សេរីរដ្ឋ ប្រធាននាយកដ្ឋានគ្រប់គ្រងសេវាកម្មស្នាក់នៅទេសចរណ៍ និងម្ហូបអាហារ ថ្ងៃទី២ ខែឧសភា ឆ្នាំ២០២៣ បានដឹកនាំវគ្គបណ្តុះបណ្តាលស្តីពី ការពង្រឹងគុណភាពសេវាកម្មទេសចរណ៍ និងអាជីវកម្មលក់ម្ហូបអាហារតាមដងផ្លូវ (Street Food Vendor) ឆ្ពោះទៅស្វាគមន៍ព្រឹត្តិការណ៍ SEA Games 2023 និងយុទ្ធនាការ “ឆ្នាំទស្សនាកម្ពុជា ២០២៣” ដោយមានការចូលរួមពីរដ្ឋបាលខេត្តព្រះសីហនុ និងមន្ទីរទេសចរណ៍ខេត្ត អង្គភាពពាក់ព័ន្ធ ប្រតិបត្តិករទេសចរណ៍ និងអ្នកលក់ដូរ តាមដងផ្លូវ ក្នុងខេត្តព្រះសីហនុ។

ក្នុងឱកាសកម្មវិធីបណ្ដុះបណ្ដាល ឯកឧត្តម គឹម សេរីរដ្ឋ បានស្នើដល់ប្រតិបត្តិករទេសចរណ៍ និងអ្នកលក់ដូរតាមដងផ្លូវ ដូចតទៅ៖

– រៀបចំសោភ័ណភាពអាជីវកម្មរបស់ខ្លួន ដោយឆ្លុះបង្ហាញពីលក្ខណៈវប្បធម៌ ទំនៀមទម្លាប់ប្រពៃណីជាតិខ្មែរ

– ចូលរួមរក្សានូវសណ្តាប់ធ្នាប់ យកចិត្តទុកដាក់ខ្ពស់លើអនាម័យម្ហូបអាហារដែលដាក់លក់ដូរជាប្រចាំ ក៏ដូចជាសម្រាប់ព្រឹត្តិការណ៍ SEA Games 2023 នេះ

– មានដាក់តាំងបញ្ជីរាយនាមសេវាកម្មជា ០៣ភាសា រួមមាន ភាសាខ្មែរ ភាសាអង់គ្លេស និងភាសាទីបីណាមួយ និងស្របតាមខ្លឹមសារប្រកាស លេខ ០៥២ ប្រក. ចុះថ្ងៃទី២៣ ខែមីនា ឆ្នាំ២០១៧ របស់ក្រសួងទេសចរណ៍

– ម្ចាស់ ឬអ្នកគ្រប់គ្រងអាជីវកម្មទេសចរណ៍ មិនត្រូវតម្លើងថ្លៃសេវាកម្មរបស់ខ្លួន ឬដោយពុំមានហេតុផលច្បាស់លាស់

– និងចូលរួមអនុវត្តតាមសារាចរណែនាំលេខ ០០៥ ស្ដីពីការពង្រឹងគុណសេវាកម្មទេសចរណ៍ បដិសណ្ឋារកិច្ចល្អ ដើម្បីអបអរការរៀបចំព្រឹត្តិការណ៍កីទ្បាអាស៊ីអាគ្នេយ៍លើកទី៣២ (32nd SEA Games) និងអាស៊ានប៉ារ៉ាហ្គេមលើកទី១២ (12th ASEAN Para Games) នៅព្រះរាជាណាចក្រកម្ពុជា៕