ក្រសួងបរិស្ថានផ្ដល់បច្ចេកទេសដាំដុះដល់ប្រជាជនខេត្តពោធិ៍សាត់ សំដៅកាត់បន្ថយសម្ពាធលើធនធានធម្មជាតិ
ក្រសួងបរិស្ថានផ្ដល់បច្ចេកទេសដាំដុះដល់ប្រជាជនខេត្តពោធិ៍សាត់ សំដៅកាត់បន្ថយសម្ពាធលើធនធានធម្មជាតិ
(ពោធិ៍សាត់)៖ ក្រសួងបរិស្ថាន ក្នុងគោលដៅរក្សាព្រៃឈរ បានផ្ដល់នូវបច្ចេកទេសក្នុងការដាំដុះដំណាំដល់ប្រជាពលរដ្ឋដែលរស់នៅក្នុងស្រុកវាលវែង ខេត្តពោធិ៍សាត់។ ការផ្ដល់ជូននេះ គឺសមស្របទៅនឹងអំណោយផលនៃទីតាំងភូមិសាស្ត្ររបស់ខេត្តពោធិ៍សាត់ ដែលមានដីសម្បូរទៅដោយជីវជាតិ។
តាមរយៈយុទ្ធនាការអន្ទាក់សូន្យ ដំណាក់កាលទី២ ឯកឧត្តម នេត្រ ភក្ត្រា រដ្ឋលេខាធិការក្រសួងបរិស្ថាន បាន្យដឹងពីការផ្ដល់ជម្រើសការងារដល់ប្រជាពលរដ្ឋក្នុងស្រុកវាលវែងថា ប្រជាជនក្នុងតំបន់នេះពីដើមមកគឺពឹងផ្អែកទៅលើធនធានធម្មជាតិជាសំខាន់ ដូច្នេះហើយ បើសិនជាក្រសួងអនុវត្តតាមច្បាប់ ក៏បទល្មើសនៅតែអាចកើតមាន ព្រោះបញ្ហាធំចំពោះមុខ គឺបញ្ហាក្រពះ។ ម៉្លោះហើយ ការផ្ដល់មុខរបរថ្មីលើវិស័យកសិកម្មនេះ គឺជាវិធីមួយក្នុងការបង្កើតសេដ្ឋកិច្ចមូលដ្ឋាន ក៏ដូចជាបង្វែរប្រជាជនពីការអាស្រ័យផលហួសហេតុទៅលើធនធានធម្មជាតិ តាមរយៈការកាប់ឈើ និងដាក់អន្ទាក់សត្វជាដើម។
ឯកឧត្តម នេត្រ ភក្ត្រា បានមានប្រសាសន៍យ៉ាងដូច្នេះថា៖ «កាលពីមុនបងប្អូនប្រជាពលរដ្ឋនៅកន្លែងនេះគឺគាត់មានមុខរបរចូលព្រៃកាប់ឈើ យកមកកែច្នៃធ្វើជាគ្រឿងសង្ហារឹមផ្សេងៗ ដើម្បីយកទៅលក់ ហើយខ្លះគឺចូលទៅក្នុងព្រៃដើម្បីដាក់អន្ទាក់យកសត្វយកមកលក់នៅតាមទីផ្សារផ្សេងៗ ប៉ុន្តែតាំងពីយើងចាប់ផ្ដើមពង្រឹងនូវការអនុវត្តច្បាប់ ផ្សព្វផ្សាយការអប់រំ ផ្ដល់នូវបច្ចេកទេសនៅក្នុងការដាំបន្លែ ក៏ដូចជាពន្យល់ឲ្យគាត់យល់អំពីផលប៉ះពាល់ផ្សេងៗហ្នឹង គឺពួកគាត់បានផ្លាស់ប្ដូរមុខរបរពួកគាត់។»
ឯកឧត្តមក៏បានលើកឡើងអំពីការផ្លាស់ប្ដូរនៃប្រជាជនក្នុងតំបន់វាលវែងផងដែរថា ពីមុនមក ពេលដែលពួកគាត់កាប់ឈើ ធ្វើរោងសិប្បកម្មកែច្នៃឈើ ចំណូលរបស់ពួកគាត់មិនទៀងទាត់នោះទេ ប៉ុន្តែបន្ទាប់ពីពួកគាត់ចាប់ផ្ដើមការដាំដុះបន្លែបង្កា គឺសេដ្ឋកិច្ចរបស់ពួកគាត់មានភាពជាក់លាក់ជាងមុន ហើយអ្វីដែលសំខាន់ទៅទៀតនោះ គឺពួកគាត់មានសុវត្ថិភាពផ្លូវចិត្ត ដោយមិនចាំបាច់ភ័យខ្លាចថាអាច ប្រឈមមុខនឹងច្បាប់។
ឯកឧត្តមក៏បានគូសបញ្ជាក់បន្តទៀតដែរថា៖ «ជាមួយគ្នានេះ ក្រសួងបរិស្ថាន យើងបានទទួលស្គាល់សហគមន៍តំបន់ការពារធម្មជាតិ ប្រមាណជា 200 នៅទូទាំងប្រទេសកម្ពុជា ដោយយើងបានផ្ដល់នូវការគាំទ្រ តាមរយៈនាយកដ្ឋានអភិវឌ្ឍន៍ជីវភាពសហគមន៍…ក្នុងនោះគឺមានផ្ដល់នូវប្រភេទពូជសត្វចិញ្ចឹមដែលមានគោ មានក្របី មានពពែ មានជ្រូក មានសត្វមាន់ ហើយនិងប្រភេទដំណាំផ្សេងៗក៏ដូចជាគ្រាប់បន្លែបង្ការផ្សេងៗដើម្បីឱ្យប្រជាសហគមន៍ គាត់អាចដាំដើម្បីប្រើប្រាស់នៅក្នុងក្រុមគ្រួសាររបស់គាត់ឬក៏អាចធ្វើជាអាជីវកម្មដើម្បីប្រកបរបរចិញ្ចឹមជីវិតរបស់គាត់ដែរ»។
បើទោះជាយ៉ាងនេះក្ដី ឯកឧត្តមក៏បន្តសំណូមពរឲ្យមានការចូលរួមកាន់តែច្រើនកុះករពីសំណាក់ប្រជាជនដទៃទៀត ដើម្បីអាចឈានទៅរក្សាបាននូវធនធានធម្មជាតិពីការពឹងអាស្រ័យទាំងស្រុងតែម្ដង។
គួរបញ្ជាក់ថា យុទ្ធនាការអន្ទាក់សូន្យ ដំណាក់កាលទីពីរបានចាប់ផ្ដើមឡើងនៅក្នុងខេត្តពោធិ៍សាត់ នាថ្ងៃទី ២២មេសានេះ ហើយនឹងបន្តទៅកាន់ខេត្តផ្សេងៗទៀត ដែលស្ថិតនៅតាមតំបន់ជួរភ្នំក្រវាញ៕
