FIFA នឹងចំណាយប្រាក់ ៣៥៥លានដុល្លារដល់ក្លិប សម្រាប់ការបញ្ជូនកីឡាករទៅលេង World Cup 2026 និង 2030
FIFA នឹងចំណាយប្រាក់ ៣៥៥លានដុល្លារដល់ក្លិប សម្រាប់ការបញ្ជូនកីឡាករទៅលេង World Cup 2026 និង 2030
នៅថ្ងៃ អង្គារ ទី២៨ ខែមីនា ឆ្នាំ២០២៣នេះ សមាគមក្លិបអឺរ៉ុប(ECA) បានបញ្ជាក់ថា FIFA នឹងចំណាយប្រាក់សរុបចំនួន ៣៥៥ លានដុល្លារដល់ក្លិបបាល់ទាត់សម្រាប់ការបញ្ជូនកីឡាករបាល់ទាត់របស់ពួកគេទៅចូលរួមការប្រកួតបាល់ទាត់ពិភពលោកឆ្នាំ ២០២៦ និងឆ្នាំ២០៣០។
ECA បាននិយាយនៅក្នុងសេចក្តីថ្លែងការណ៍មួយថា “ប្រធាន FIFA លោក Gianni Infantino និងប្រធាន ECA លោក Nasser Al-Khelaifi បានចុះហត្ថលេខាលើអនុស្សរណៈនៃការយោគយល់គ្នា (MoU) ថ្មី រវាងពួកគេនៅឯមហាសន្និបាត ECA លើកទី 29 នៅទីក្រុង Budapest ប្រទេសហុងគ្រី”។
ECA បានគូសបញ្ជាក់ថា “កម្មវិធីអត្ថប្រយោជន៍ក្លិប ដែលបានផ្តល់សំណងជាប្រវត្តិសាស្រ្តដល់ក្លឹបទាំងអស់ ដែលបានអនុញ្ញាតឲ្យកីឡាករចូលរួមការប្រកួតបាល់ទាត់ពិភពលោកបុរស និងជាសមិទ្ធផលសំខាន់នៃ MoU ពីមុន ឥឡូវនេះ នឹងកើនឡើងពី ២០៩ លានដុល្លារ សម្រាប់ការប្រកួតចុងក្រោយរបស់ FIFA World Cup ឆ្នាំ២០១៨ និង ២០២២ ទៅ ៣៥៥ លានដុល្លារ សម្រាប់ការប្រកួតឆ្នាំ២០២៦ និង ២០៣០”។
មែនទែនទៅ ការផ្ដល់អត្ថប្រយោជន៍ដល់ក្លឹបនូវចំណែកនៃប្រាក់ចំណូលពីការប្រកួត World Cup គឺជាថ្នូរនឹងការដែលក្លិបអនុញ្ញាតឲ្យកីឡាកររបស់ខ្លួនចូលរួមជាមួយក្រុមជម្រើសជាតិ និងការពារក្លិបក្នុងករណីកីឡាកររបស់ពួកគេរងរបួសអំឡុងពេលប្រកួតអន្តរជាតិនោះ។
កាលពីដើមខែនេះ FIFA បានប្រកាសថា ការប្រកួត FIFA Club World Cup ដែលមាន ៣២ ក្រុម នឹងត្រូវលេងរៀងរាល់ ៤ ឆ្នាំម្ដង ចាប់ពីខែមិថុនា ឆ្នាំ ២០២៥ ដោយជំនួសការប្រកួតប្រចាំឆ្នាំរបស់ខ្លួន ដែលមានក្រុមចំនួន ៧៕
