ឆេក សារភាពថាអស់លទ្ធភាពផ្គត់ផ្គង់អាវុធឲ្យអ៊ុយក្រែនទៀតហើយ
ឆេក សារភាពថាអស់លទ្ធភាពផ្គត់ផ្គង់អាវុធឲ្យអ៊ុយក្រែនទៀតហើយ
បរទេស ៖ ឆេក គឺជាសមាជិកពេញសិទ្ធមួយរបស់អង្គការណាតូដែលកន្លងមកតែងតែមានសកម្មភាពគាំទ្រ និងផ្គត់ផ្គង់អ៊ុយក្រែនជានិច្ចទាំងហិរញ្ញវត្ថុ និងសព្វាវុធផងដែរ ដែលគិតចាប់តាំងតែពីពេលមានជម្លោះជាមួយនឹងរុស្ស៊ីមកម្ល៉េះ។
ទោះបីជាយ៉ាងណាក្តី កាលពីថ្ងៃម្សិលមិញនេះ រដ្ឋាភិបាលនៃទីក្រុង Prague បានសារភាពថា ខ្លួនមិនមានសព្វាវុធដែលនៅសេសសល់ក្នុងស្តុកទៀតទេដើម្បីផ្គត់ផ្គង់ឲ្យទៅប្រទេសអ៊ុយក្រែនដោយក្នុងនោះលោកប្រធានាធិបតីឆេក Petr Pavel បានថ្លែងថា ប្រទេសរបស់លោកកំពុងជួបបញ្ហាជាច្រើនដែលត្រូវដោះស្រាយ ជាពិសេសគឺបញ្ហាកង្វះខាតធនធានមនុស្សនៅក្នុងវិស័យផលិតកម្ម។
គួរឲ្យដឹងដែរថា លោកប្រធានាធិបតីបានពន្យល់ដែរថា ទោះបីជាយ៉ាងណាក្តីប្រទេសឆេកនឹងនៅតែអាចផលិតនូវអាវុធមួយចំនួនសម្រាប់អ៊ុយក្រែនសម្រាប់ប្រព័ន្ធការពារដែនអាកាស ប៉ុន្តែក្នុងចំនួនកំណត់ប៉ុណ្ណោះ។
យោងតាមតួលេខដែលក្រសួងការពារជាតិនៃប្រទេសឆេកធ្លាប់បានបង្ហាញបានឲ្យដឹងថា រដ្ឋាភិបាលទីក្រុង Prague បានផ្តល់ការគាំទ្រជាសព្វាវុធទៅឲ្យរដ្ឋាភិបាលក្រុងគៀវក្នុងទំហំប្រមាណជា ២,៣ពាន់លានអឺរ៉ូ ឬត្រូវជា ២,៥ពាន់លានដុល្លាររួចមកហើយប៉ុន្តែឆេកមិនបានលំអិតឡើយនូវប្រភេទអាវុធណាខ្លះដែលមាននៅក្នុងបញ្ជី៕
