អ្នករាយការណ៍របស់អង្គការសហប្រជាជាតិ ទាមទារឱ្យមានចំណាត់ការជាសកល ដើម្បីបញ្ឈប់ “អំពើប្រល័យពូជសាសន៍” របស់អ៊ីស្រាអែលនៅហ្គាហ្សា

អ្នករាយការណ៍របស់អង្គការសហប្រជាជាតិ ទាមទារឱ្យមានចំណាត់ការជាសកល ដើម្បីបញ្ឈប់ “អំពើប្រល័យពូជសាសន៍” របស់អ៊ីស្រាអែលនៅហ្គាហ្សា

មជ្ឈឹមបូពារ៖ លោកស្រី Francesca Albanese អ្នករាយការណ៍ពិសេសរបស់អង្គការសហប្រជាជាតិប្រចាំដែនដីប៉ាឡេស្ទីន បានអំពាវនាវជាបន្ទាន់មួយឱ្យមានចំណាត់ការជាសកល ដើម្បីបញ្ឈប់អ្វីដែលលោកស្រីបានហៅថា “អំពើប្រល័យពូជសាសន៍” របស់អ៊ីស្រាអែលនៅហ្គាហ្សា។

ថ្លែងនៅក្នុងសន្និសីទបន្ទាន់មួយដែលរៀបចំឡើងដោយប្រទេសកូឡុំប៊ី និងអាហ្វ្រិកខាងត្បូង នៅទីក្រុងបូហ្គោតា ប្រទេសកូឡុំប៊ី លោកស្រី Albanese បានជំរុញឱ្យគណៈប្រតិភូមកពី ៣០ ប្រទេស ចាត់វិធានការជាក់ស្តែង ដើម្បីបញ្ឈប់ការវាយលុករបស់អ៊ីស្រាអែលនៅក្នុងតំបន់ ។

ប្រទេសជាច្រើនដែលចូលរួមបានឆ្លើយតបនឹងទស្សនៈរបស់លោកស្រី ដោយបានពិពណ៌នាអំពីសកម្មភាពរបស់អ៊ីស្រាអែលនៅហ្គាហ្សាថាជាអំពើប្រល័យពូជសាសន៍ប្រឆាំងនឹងប្រជាជនប៉ាឡេស្ទីន។

លោកស្រី Albanese បានសង្កត់ធ្ងន់ថា “រដ្ឋនីមួយៗត្រូវតែពិនិត្យឡើងវិញជាបន្ទាន់ និងផ្អាករាល់ទំនាក់ទំនងទាំងអស់ជាមួយរដ្ឋអ៊ីស្រាអែល… ហើយធានាថាវិស័យឯកជនរបស់ខ្លួនធ្វើដូចគ្នា”។ លោកស្រីបានបន្តទៀតថា “សេដ្ឋកិច្ចអ៊ីស្រាអែលត្រូវបានរៀបចំឡើងដើម្បីទ្រទ្រង់ការកាន់កាប់ ដែលឥឡូវនេះបានប្រែក្លាយទៅជាអំពើប្រល័យពូជសាសន៍”។

លោកស្រីបានគូសបញ្ជាក់ថា មនុស្សជាង ៥៨.០០០ នាក់បានបាត់បង់ជីវិតចាប់តាំងពីអ៊ីស្រាអែលបានចាប់ផ្តើមការវាយប្រហាររបស់ខ្លួននៅក្នុងខែតុលា ឆ្នាំ ២០២៣ យោងតាមអាជ្ញាធរសុខាភិបាលប៉ាឡេស្ទីន ហើយការបិទផ្លូវរបស់អ៊ីស្រាអែលបានធ្វើឱ្យប្រជាជនហ្គាហ្សា ២,៣ លាននាក់ ឈានដល់ការអត់ឃ្លាន។

សន្និសីទនេះដែលភាគច្រើនមានការចូលរួមពីបណ្តាប្រទេសកំពុងអភិវឌ្ឍន៍ រួមមានកាតា និងតួកគី ក៏មានការចូលរួមពីប្រទេសអេស្ប៉ាញ អៀរឡង់ និងចិនផងដែរ។ វាក៏រួមបញ្ចូលសមាជិកនៃ “ក្រុម Hague” ដែលជាសម្ព័ន្ធភាពនៃប្រទេសចំនួនប្រាំបី ដែលពីមុនបានសន្យាកាត់បន្ថយទំនាក់ទំនងយោធាជាមួយអ៊ីស្រាអែល និងគោរពតាមដីកាចាប់ខ្លួនរបស់តុលាការព្រហ្មទណ្ឌអន្តរជាតិប្រឆាំងនឹងនាយករដ្ឋមន្ត្រីអ៊ីស្រាអែល លោក Benjamin Netanyahu។

មតិយោបល់របស់លោកស្រី Albanese បានពង្រឹងនូវការកត់សម្គាល់ដែលលោកស្រីបានធ្វើពីមុនទៅកាន់សហភាពអឺរ៉ុប ដោយបញ្ជាក់ថាសហភាពអឺរ៉ុប
ក្នុងនាមជាដៃគូពាណិជ្ជកម្ម និងវិនិយោគកំពូលរបស់អ៊ីស្រាអែល “មានកាតព្វកិច្ចស្របច្បាប់” ដើម្បីផ្អាកកិច្ចព្រមព្រៀងសមាគមរបស់ខ្លួនជាមួយអ៊ីស្រាអែល។
លោកស្រីបានអះអាងថា “ការធ្វើពាណិជ្ជកម្មជាមួយសេដ្ឋកិច្ចដែលជាប់ទាក់ទងយ៉ាងជិតស្និទ្ធទៅនឹងការកាន់កាប់ ការបំបែកជាតិសាសន៍ និងអំពើប្រល័យពូជសាសន៍ គឺជាការជាប់ពាក់ព័ន្ធ”។

អនុរដ្ឋមន្ត្រីការបរទេសកូឡុំប៊ី លោក Mauricio Jaramillo បានសង្កត់ធ្ងន់ថា ស្ថានភាពនេះ “មិនមែនគ្រាន់តែនិយាយអំពីប៉ាឡេស្ទីនប៉ុណ្ណោះទេ។ វាគឺអំពីការការពារច្បាប់អន្តរជាតិ និងសិទ្ធិក្នុងការកំណត់ជោគវាសនាដោយខ្លួនឯង”៕