Nieto សម្រេចចាកចេញពី ភ្នំពេញក្រោន និងលីគកំពូលកម្ពុជា
Nieto សម្រេចចាកចេញពី ភ្នំពេញក្រោន និងលីគកំពូលកម្ពុជា
បន្ទាប់ពីជួយភ្នំពេញក្រោន គ្រងតំណែងជេីងឯកពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី ១៨ កាលយបថ្ងៃ អាទិត្យ ទី ២៥ ខែ ឧសភា ឆ្នាំ ២០២៥ ខ្សែប្រយុទ្ធក្រុមគោព្រៃកម្ពុជា Andres Nieto បានបង្ហើបពីថា ខ្លួននឹងចាកចេញពីក្លិប ភ្នំពេញក្រោន ឆាប់ៗ ខាងមុខនេះ។
ជាការពិតណាស់ កីឡាករដែលទេីបចូលសញ្ជាតិខ្មែរ Nieto បានដើរតួយ៉ាងសំខាន់ ក្នុងការជួយឱ្យ ភ្នំពេញក្រោន ឈ្នះពានរង្វាន់សម្តេចតេជោ ហ៊ុន សែន រដូវកាល ២០២៤-២០២៥ ក្រោយខកខានអស់រយៈពេល ១៦ ឆ្នាំ បន្ទាប់ពីរូបគេស៊ុតបញ្ចូលទីមួយគ្រាប់នៅនាទីទី ៧៩ ជួយឱ្យក្រុម សិង្ហក្រហម យកឈ្នះលើក្រុមព្រះខ័នរាជស្វាយរៀង ក្នុងលទ្ធផល ២-១ នៅពហុកីឡដ្ឋានជាតិមរតកតេជោ។
យ៉ាងណា ក្រោយការប្រកួតបញ្ចប់ ខ្សែប្រយុទ្ធជនជាតិកូឡុំប៊ី វ័យ ២៩ ឆ្នាំរូបនេះ បាន ប្រាប់សារព័ត៌មានក្នុងស្រុកថា ខ្លួន នឹងចាកចេញពី ភ្នំពេញក្រោន និងលីគកំពូលកម្ពុជា នៅរដូវកាលនេះហើយ។
ទោះបីយ៉ាងណា កីឡាករ មិនទាន់បានប្រាប់លម្អិតអំពីអនាគតរបស់ ខ្លួន នាពេលបន្ទាប់ និងទៅលេងនៅក្លិបណា ឬប្រទេសណានៅឡើយទេ ប៉ុន្តែមានពាក្យចចាមអារ៉ាមថា រូបគេនឹងទៅប្រកបអាជីពនៅលីគកំពូលឥណ្ឌូណេស៊ី។
គួររំលឹកថា Nieto បានចូលរួមជាមួយ ភ្នំពេញក្រោន នៅឆ្នាំ ២០១៩ ដោយបានជួយឱ្យភ្នំពេញក្រោន ឈ្នះពានលីគកំពូលកម្ពុជា Cambodian Premier League ២លើក, ពាន Cambodian League Cup ២លើក និងពានសម្តេចហ៊ុន សែន ១លើក៕
