ANDRES NIETO ឈ្នះស្បែកជើងមាសលីគកំពូលកម្ពុជា រដូវកាល ២០២៤-២៥
ANDRES NIETO ឈ្នះស្បែកជើងមាសលីគកំពូលកម្ពុជា រដូវកាល ២០២៤-២៥
យុទ្ធនាការការប្រកួតលីគកីឡាបាល់ទាត់កំពូលកម្ពុជា ឬខេមបូឌានព្រីមៀរលីគ រដូវកាល ២០២៤/២៥ បានបញ្ចប់ជាស្ថាពរហើយ កាលពីថ្ងៃអាទិ្យ ទី១៨ ខែឧសភា ម្សិលមិញនេះ បន្ទាប់ពីការប្រកួតប្រជែង៣០សប្ដាហ៍នៅលើទីលាន ទីបំផុត ក្លិបបាល់ទាត់ព្រះខ័នរាជស្វាយរៀង បានក្លាយជាម្ចាស់ជើងឯក នៅរដូវកាលនេះ ។
ចំណែកឯពានរង្វាន់កីឡាករស៊ុតបញ្ជូលទីបានច្រើនជាងគេ ឬស្បែកជើងមាស បានទៅលើខ្សែប្រយុទ្ធរបស់ភ្នំពេញក្រោន និងក្រុមជម្រើសជាតិកម្ពុជា កីឡាករ RAFAEL ANDRES NIETO RONDON ដោយបានវ៉ាដាច់ DE ANORADE SOUZA RAMON របស់វិសាខា នៅប្រកួតចុងក្រោយ។
កីឡាករ ANDRES NIETO បានស៊ុតបញ្ជូលទីសរុបចំនួន ២១គ្រាប់ ខណៈដែលកីឡាករ SOUZA RAMON ស៊ុតបញ្ជូលទីបានចំនួន ២០គ្រាប់ ពោលគឺខុសគ្នាតែ ១គ្រាប់ប៉ុណ្ណោះ ខណៈ Top 3 បានទៅលើកីឡាករ JELLE JOOST GOSELINK របស់ភ្នំពេញក្រោន និងកីឡាករ Christian Roque របស់ព្រះខ័នរាជស្វាយរៀង រកបានចំនួន ១៦គ្រាប់ដូចគ្នា។
ចំណែកកីឡាករខ្មែរ ដែលស៊ុតបញ្ជូលទីបានច្រើនជាងគេ បានទៅលើកីឡាករ សៀង ចន្ធា របស់បឹងកេត រកបានចំនួន ១៤គ្រាប់ ខណៈកីឡាករ ម៉ាត់ នូរុណ របស់បឹងកេត និងកីឡាករ ហាវ សុខនេត្រ របស់ អាយ អេស អាយ ដង្កោសែនជ័យ រកបានម្នាក់ ១១គ្រាប់ដូចគ្នា។
រីឯកីឡាករដែលបញ្ជូនបាល់ឲ្យមិត្តរួមក្រុមស៊ុតបញ្ជូលទីបានច្រើនជាងគេ( Assist ) បានទៅលើកីឡាករ អ៊ុក សុវណ្ណ របស់វិសាខា លេខ២ បានទៅលើកីឡាករ លឹម ពិសុទ្ធ របស់ភ្នំពេញក្រោន និងកីឡាករ KINOSHITA REIYA របស់ Tiffy Army FC បញ្ជូនបាន ១៣គ្រាប់ដូចគ្នា។
គួរបញ្ជាក់ថា កាលពីរដូវកាល ២០២៣-២៤ អតីតកីឡាកររបស់ព្រះខ័នរាជស្វាយរៀង Marcus Haber បានក្លាយជាម្ចាស់ស្បែកជើងមាស ដោយស៊ុតបញ្ចូលទី ចំនួន ៣០គ្រាប់។ កីឡាករ Marcus Haber បានក្លាយជាម្ចាស់ស្បែកជើងមាសពីរឆ្នាំជាប់គ្នា ដោយកាលពីរដូវកាល ២០២២-២៣ រូបគេ ស៊ុតបញ្ជូលទីបាន ២៥គ្រាប់៕
