ប្រាប់តគ្នាផង! យប់នេះ រាធធានីភ្នំពេញ ខេត្តតាកែវ ស្វាយរៀង និងពោធិសាត់ នឹងបញ្ជាំងស្លាយការប្រកួតវគ្គផ្ដាច់ព្រ័ត្ររបស់ក្រុមកីឡាការិនីជម្រើសជាតិកម្ពុជា

ប្រាប់តគ្នាផង! យប់នេះ រាធធានីភ្នំពេញ ខេត្តតាកែវ ស្វាយរៀង និងពោធិសាត់ នឹងបញ្ជាំងស្លាយការប្រកួតវគ្គផ្ដាច់ព្រ័ត្ររបស់ក្រុមកីឡាការិនីជម្រើសជាតិកម្ពុជា

ដើម្បីចូលរួមគាំទ្រដល់ក្រុមកីឡាបាល់ទាត់ជម្រើសជាតិនារីកម្ពុជា ក្នុងការប្រកួតវគ្គផ្តាច់ព្រាត់ AFF WOMEN’S CUP 2024 ជាមួយនឹងក្រុមបាត់ទាត់ជម្រើសជាតិនារីឥណ្ឌូនេស៊ី នៅថ្ងៃទី ០៥ ខែធ្នូ ឆ្នាំ២០២៤ វេលាម៉ោង៧ :៣០នាទីយប់ សហព័ន្ធកីឡាបាល់ទាត់កម្ពុជា បានរៀបចំឱ្យមានការបញ្ជាំងស្លាយ ការប្រកួតនៅ នៅបរិវេណសួនវឌ្ឍនៈកាពីតាលឡាយហ្វ៍ស្តាយផាក។ ដូច្នេះសូមគោរពអញ្ជើញបងប្អូនចូលរួមទស្សនា និងគាំទ្រឲ្យបានច្រើនកុះករ។

ជាមួយគ្នានេះដែរ សាលាខេត្តពោធិសាត់ បានប្រកាសរៀបចំបញ្ជាំងស្លាយ ពីការប្រកួតក្រុមជម្រើសជាតិនារីកម្ពុជា ទល់នឹងឥណ្ឌូណេស៊ី វគ្គផ្តាច់ព្រ័ត្រ AFF Women’s Cup 2024 ម៉ោង៧:៣០យប់នេះ ក្នុងសួនច្បារទល់មុខសាលាខេត្ត។ ដើម្បីឲ្យបងប្អូនក្នុងខេត្តពោធិសាត់ អាចទៅទស្សនា ហ៊ោជុំគ្នាបាន។

រដ្ឋបាលខេត្តស្វាយរៀង បានប្រកាសថា ក្រោមការចង្អុរបង្ហាញរបស់ ឯកឧត្ត ប៉េង ពោធិ៍សា អភិបាលនៃគណៈអភិបាលខេត្តស្វាយរៀង បានរៀបចំបញ្ជាំងស្លាយ ពីការប្រកួតក្រុមជម្រើសជាតិនារីកម្ពុជា ទល់នឹងឥណ្ឌូណេស៊ី វគ្គផ្តាច់ព្រ័ត្រ AFF Women’s Cup 2024 ម៉ោង៧:៣០យប់នេះ ចំនួន ៣ទីតាំង
១. បញ្ចាំងស្លាយនៅសួនច្បារច្រាំងតាបុល
២. បញ្ចាំង LED រង្វង់មូលស្វាយរៀង
៣. បញ្ចាំង LED នាគពន្ធ័ ។
ដូច្នេះ សូមទស្សនិកជនទាំងអស់អញ្ជើញចូលរួមទស្សនា ស្រែកហ៊ោ គាំទ្រ លើកទឹកចិត្តពីចម្ងាយទាំងអស់គ្នា។

ចំណែកខេត្តតាកែវ ជាខេត្តដំបូងគេ ដែលប្រកាសរៀបចំឱ្យមានការផ្សាយបន្តផ្ទាល់ការប្រកួតជាប្រវត្តិសាស្រ្ត របស់ក្រុមកីឡាការិនីជម្រើសជាតិកម្ពុជានេះ ដោយរដ្ឋបាលខេត្តតាកែវ នឹងរៀបចំឱ្យមានការផ្សាយបន្តផ្ទាល់ នៅបរិវេណសួនច្បារមាត់បឹងតាកែវ ចាប់ពីម៉ោង ៧:៣០យប់នេះ ។

ក្រុមជម្រើសជាតិនារីកម្ពុជា ក្រោមការដឹកនាំរបស់គ្រូបង្វឹក លោក ឃួន ឡាបូរ៉ាវី បានឡើងទៅកាន់វគ្គផ្តាច់ព្រ័ត្រជាលើកដំបូង ក្នុងប្រវត្តិសាស្រ្តបាល់ទាត់នារីកម្ពុជា នៃពានរង្វាន់ AFF Women’s Cup 2024 ក្រោយឈ្នះ ក្រុមទីម័រខាងកើត នៅវគ្គពាក់កណ្ដាលផ្ដាច់ព្រ័ត្រ ក្នុងលទ្ធផល ៣-០។

កាលពីយប់ថ្ងៃពុធ ទី៤ ខែធ្នូ ឆ្នាំ២០២៤នេះ សហព័ន្ធកីឡាបាល់ទាត់កម្ពុជា ក៏បានប្រកាសថា ការប្រកួតវគ្គផ្ដាច់ព្រ័ត្ររបស់ក្រុមកីឡាការិនីជម្រើសជាតិកម្ពុជា ទល់នឹង ឥណ្ឌូណេស៊ី ក្នុងពានរង្វាន់ AFF Women’s Cup 2024 នៃវគ្គផ្តាច់ព្រ័ត្រ នឹងមានការផ្សាយផ្ទាល់លើ Page ផ្លូវការរបស់ខ្លួន។ ដូច្នេហបងប្អូនក៏អាចទស្សនាតាមទូរស័ព្ធផងដែរ។

សម្រាប់ពានរង្វាន់ AFF Women’s Cup 2024 ប្រព្រឹត្តទៅចាប់ពីថ្ងៃទី២៣ ខែវិច្ឆិកា ដល់ថ្ងៃទី០៥ ខែធ្នូ ឆ្នាំ២០២៤ នៅប្រទេសឡាវ។ សម្រាប់ក្រុមជម្រើសជាតិនារីកម្ពុជាវិញ ធ្លាប់បានចូលរួមចំនួន ៣លើក នៅឆ្នាំ២០១៨ ២០១៩ និង២០២២ តែមិនដែលឆ្លងផុតវគ្គចែកពូលឡើយ។

គួរបញ្ជាក់ថា ពានរង្វាន់ជើងឯកផ្នែកនារី ប្រចាំតំបន់អាស៊ាន ASEAN Women’s Cup 2024នេះ មានក្រុមចូលរួមចំនួន៦ បែងចែកជា ២ពូល ដែលពូល A មាន៖ ទីម័រខាងកើត សិង្ហបុរី និងឡាវ ចំណែក ពូល B មាន៖ ឥណ្ឌូណេស៊ី កម្ពុជា និងម៉ាឡេស៊ី។ ដោយក្នុង១ពូល គេយក ២ក្រុម លេខ១ និងលេខ២ ឡើងទៅវគ្គពាក់កណ្ដាលផ្តាច់ព្រ័ត្រ៕