គ្រូបង្វឹក Barcelona ថា Messi គឺជាកីឡាករល្អបំផុតគ្រប់ពេល

គ្រូបង្វឹក Barcelona ថា Messi គឺជាកីឡាករល្អបំផុតគ្រប់ពេល

គ្រូបង្វឹកក្រុមអ្នកមានបុណ្យ FC Barcelona លោក Hansi Flick ថាពិតជាមានមោទនភាពក្នុងការទទួលបានការសរសើរពីកីឡាករល្អបំផុតគ្រប់ពេល ដូចជាអតីតវីរបុរសរបស់ក្លិប Lionel Messi ។

នៅក្នុងបទសម្ភាសន៍ជាមួយទូរទស្សន៍អេស្ប៉ាញ TV3 កាលពីថ្ងៃទី ២២ ខែវិច្ឆិកា កីឡាករសញ្ជាតិអាហ្សង់ទីន Messi បាននិយាយថា លោកនៅតែតាមដាន Barca គ្រប់ការប្រកួត ហើយចាប់អារម្មណ៍នឹងទេពកោសល្យរបស់គ្រូបង្វឹក Flick ក្នុងការប្រើប្រាស់កីឡាករ។

តារាឆ្នើមវ័យ ៣៧ឆ្នាំរូបនេះ បានបន្ថែមថា ៖«Barca កំពុងលេងយ៉ាងអស្ចារ្យ ដោយផ្តល់ឱកាសជាច្រើនដល់កីឡាករវ័យក្មេង។ ប៉ុន្តែខ្ញុំមិនភ្ញាក់ផ្អើលទេព្រោះ Barca តែងតែធ្វើបែបនេះ តាំងពីខ្ញុំមកក្លឹបនៅអាយុ ១៣ឆ្នាំ»។

ក្រុមបច្ចុប្បន្នរបស់ Barca មានកីឡាករជាច្រើន ដែលធំធាត់នៅ La Masia ដែលជាថ្នាល់យុវជនរបស់ខ្លួន និងបង្ហាញខ្លួនក្នុងក្រុមឈុតធំក្នុងរយៈពេលប៉ុន្មានឆ្នាំចុងក្រោយនេះ រួមទាំងកីឡាករល្បីៗដូចជា Pedri, Gavi ឬ Lamine Yamal ខណៈកីឡាករផ្សេងទៀតកំពុងបាននាទីលេងជាបណ្តើរៗដូចជា Pau Cubarsi, Alejandro Balde, Marc Bernal ។ Hector Fort, Sergi Dominguez ឬ Fermin Lopez ។ ក្នុងចំណោមនោះ មានកីឡាករជាច្រើនមិនមានអាយុលើសពី ២០ឆ្នាំទេ ប៉ុន្តែជាសមាជិកសំខាន់ដែលជួយ Barca ធ្វើបានល្អនៅ La Liga និង Champions League។

ត្រង់ចំណុចនេះ Messi បាននិយាយថា ៖« អ្នកលេងមកពី La Masia ស្គាល់ក្លឹបល្អជាងអ្នកផ្សេង។ ដោយសារតែពួកគេត្រូវបានបង្រៀនពីទស្សនវិជ្ជារបស់ក្លឹបតាំងពីពួកគេនៅក្មេង។ អ្វីដែលកំពុងកើតឡើងនៅ Barca ឥឡូវនេះគឺដូចជាយុគសម័យ នៃភាពជោគជ័យមួយផ្សេងទៀត»។

Barca បានឈ្នះ Champions League ៣ដង នៅចន្លោះឆ្នាំ ២០០៩ និង ២០១៥ ដោយសារទេពកោសល្យរបស់ La Masia ដូចជា Xavi Hernandez, Andres Iniesta, Messi, Sergio Busquets និង Pedro Rodriguez ។ នេះគឺស្រដៀងទៅនឹង Barca ក្រោមការដឹកនាំរបស់ Flick នៅពេលនេះ ដែល Yamal ក៏ជាតារាមួយរូបផងដែរ ទោះបីជាមានអាយុត្រឹមតែ ១៧ឆ្នាំក៏ដោយ ហើយត្រូវបានគេចាត់ទុកថា ជាអ្នកស្នងតំណែងរបស់ Messi ។

នៅពេលសួរអំពីការសរសើររបស់តារាឆ្នើមអាហ្សង់ទីន Flick បាននិយាយថា ៖« ខ្ញុំពិតជាមានកិត្តិយសណាស់ ដែលកីឡាករល្អបំផុតគ្រប់ពេលនិយាយបែបនេះ។ វាពិតជាអស្ចារ្យណាស់ដែលគាត់នៅតែធ្វើតាមដានក្រុមចាស់របស់គាត់។ Messi កោតសរសើរកីឡាករវ័យក្មេងនៅ Barca ហើយវាមានន័យខ្លាំងណាស់ សម្រាប់ពួកយើង»។

គួររំលឹកថា លោក Hansi Flick បានដឹកនាំ Bayern Munich លត់ក្រុម អ្នកមានបុណ្យ FC Barcelona ក្នុងលទ្ធផល ៨-២ ក្នុងការប្រកួត Champions League វគ្គ ១/៤ ផ្តាច់ព្រ័ត្រ ២០២០ បន្ទាប់មកបានជួយឱ្យ “Bayer” ឈ្នះពានចំនួន ៣។ លោក Hansi Flick ចូលដឹកនាំ Barca តាំងពីរដូវក្តៅឆ្នាំ ២០២៤ ដែលបច្ចុប្បន្ន មានអត្រាឈ្នះ ៨២% ជាមួយនឹងការឈ្នះ ១៤ដង ក្នុង ១៧ប្រកួត៕