គ្រូបង្វឹកក្រុមជម្រើសជាតិជប៉ុន ថាពេលនេះ ឥណ្ឌូណេស៊ី ខ្លាំងជាងមុន

គ្រូបង្វឹកក្រុមជម្រើសជាតិជប៉ុន ថាពេលនេះ ឥណ្ឌូណេស៊ី ខ្លាំងជាងមុន

គ្រូបង្វឹកក្រុមជម្រើសជាតិជប៉ុន លោក Hajime Moriyasu ចង់ឱ្យកីឡាករជប៉ុន មានការប្រុងប្រយ័ត្ន ចំពោះក្រុមជម្រើសជាតិឥណ្ឌូនេស៊ី ដែលបច្ចុប្បន្ន ភាគច្រើនជាកីឡាករចូលសញ្ជាតិ។ លោក Hajime Moriyasu បានលើកឡើងមុនពួកគេជួបគ្នា ក្នុងពូល C នៃជុំទីបីនៃការប្រកួតជម្រុះ World Cup ឆ្នាំ 2026 នៅតំបន់អាស៊ី។

បច្ចុប្បន្ន ជប៉ុន កំពុងឈរកំពូលតារាងពូល C ដោយមាន ១០ពិន្ទុ មាន ៥ពិន្ទុនាំមុខក្រុមទាំង ៣ ដែលតាមពីក្រោយពួកគេ គឺ អារ៉ាប៊ីសាអូឌីត អូស្ត្រាលី និងបារ៉ែន។ ចាប់តាំងពីការប្រកួតជម្រុះជុំទី ២ មក ជប៉ុន បានបង្ហាញភាពខ្លាំងរបស់ពួកគេ ដោយឈ្នះ ៩ប្រកួត ក្នុងចំណោម ១០ ប្រកួតរបស់ពួកគេ ដោយស៊ុតបញ្ចូលទីបាន ៣៩គ្រាប់ និងរបូតវិញតែមួយគ្រាប់គត់។

ក្នុងចំណាត់ថ្នាក់របស់ FIFA Ranking ជប៉ុន កំពុងឈរនៅលេខរៀងទី ១៥ ខណៈ ឥណ្ឌូនេស៊ី ឈរនៅលេខរៀង ១៣០។ ជប៉ុន ក៏បានយកឈ្នះ ឥណ្ឌូណេស៊ី ក្នុងលទ្ធផល ៣-១ ក្នុងការជួបគ្នាចុងក្រោយក្នុងពូល នៃពានរង្វាន់ Asian Cup ឆ្នាំ២០២៣។ ទោះបីជាយ៉ាងណាក៏ដោយ គ្រូបង្វឹក Moriyasu មានការប្រុងប្រយ័ត្ន ចំពោះការប្រកួតដ៏ស្វិតស្វាញ នៅពេលដែលពួកគេទៅលេងប្រទេសឥណ្ឌូនេស៊ី នៅ Gelora Bung Karno នៅល្ងាចថ្ងៃទី ១៥ ខែវិច្ឆិកា ក្នុងប្រកួតទី៥ នៃវគ្គជម្រុះជុំទី ៣ ។

លោក Moriyasu បាននិយាយនៅពេលប្រទេសជប៉ុន បោះជុំរំផ្តុំហ្វឹកហាត់កាលពីថ្ងៃទី ១០ ខែវិច្ឆិកា ថា ៖ «ឥណ្ឌូណេស៊ី ពេលនេះ ជាក្រុមដែលខ្លាំង ដែលមិនធ្លាប់មានពីមុនមក កម្លាំងនោះ ត្រូវបានកសាង និងពង្រឹងតាមវិធីផ្សេងៗគ្នាជាច្រើន»។

បើតាមគ្រូបង្វឹកវ័យ ៥៦ឆ្នាំរូបនេះ ឥណ្ឌូណេស៊ី មានវប្បធម៌បាល់ទាត់រស់រវើក។ កម្លាំងជម្រើសជាតិបច្ចុប្បន្ន បានមកពីការប្រមូលផ្តុំកីឡាករចូលសញ្ជាតិ ដែលភាគច្រើនជាជនជាតិហូឡង់ ដែលលេងនៅអឺរ៉ុប។ Moriyasu បាននិយាយថា ៖«កីឡាករដែលមានគុណភាពកំពុងបំពេញក្រុមដំបូង ដែលធ្វើឱ្យឥណ្ឌូនេស៊ី ក្លាយជាក្រុមដែលខុសពីមុន និងខ្លាំងជាងមុន។ ឥណ្ឌូណេស៊ី ការពារបានល្អហើយវាយប្រហារបានលឿន»។

គួររំលឹកថា ចាប់តាំងពីឆ្នាំ ២០២២ ចំនួនកីឡាករចូលសញ្ជាតិនៅក្នុងក្រុមជម្រើសជាតិឥណ្ឌូនេស៊ី មាន ១៥នាក់ ហើយទើបតែកើនឡើងដល់ ១៦នាក់ជាមួយនឹងការបន្ថែមខ្សែការពារ Kevin Diks អាយុ ២៨ឆ្នាំ មកពីក្លឹប Copenhagen ។ កត្តាទាំងនេះ បានជួយឲ្យឥណ្ឌូនេស៊ី ឆ្លងផុតវគ្គចែកពូលជាលើកដំបូង ក្នុងព្រឹត្តិការណ៍ Asian Cup 2023 នឹងឈានចូលវគ្គជម្រុះទីបីនៃការប្រកួតបាល់ទាត់ពិភពលោកឆ្នាំ ២០២៦ ជាលើកដំបូង និងឈានទៅវគ្គពាក់កណ្តាលផ្តាច់ព្រ័ត្រជាលើកដំបូងនៅ AFC U23 Championship 2024។

ចាប់តាំងពីចាប់ផ្តើមការប្រកួតជម្រុះលើកទី៣មក ក្រុមជម្រើសដំបូងរបស់ប្រទេសឥណ្ឌូណេស៊ី តែងតែមានកីឡាករចូលសញ្ជាតិ ពី ៨ ទៅ ៩ នាក់ ដែលនាំឱ្យមានការភ្ញាក់ផ្អើរ ជាមួយនឹងលទ្ធផល ស្មើក្រុមអារ៉ាប៊ីសាអូឌីត ១-១, អូស្ត្រាលី ០-០ ហើយស្ទើរតែឈ្នះ បារ៉ែន មុននឹងស្មើ ២-២ នៅម៉ោងបន្ថែម។

ដើម្បីត្រៀមប្រកួតជាមួយជប៉ុន និងអារ៉ាប៊ីសាអូឌីត គ្រូបង្វឹក Shin Tae-yong បានកោះហៅកីឡាករចំនួន ២៨ នាក់ ក្នុងនោះ ១៧ នាក់ដែលលេងនៅបរទេស រួមទាំងកីឡាករចូលសញ្ជាតិ ១៥ នាក់ផងដែរ៕