ភ្នំពេញក្រោន តាមស្មើកំណត់ត្រាចាស់របស់ព្រះខ័នរាជស្វាយរៀង ឈ្នះ ១០ប្រកួតជាប់ៗគ្នា នៅលីគកំពូលកម្ពុជា

ភ្នំពេញក្រោន តាមស្មើកំណត់ត្រាចាស់របស់ព្រះខ័នរាជស្វាយរៀង ឈ្នះ ១០ប្រកួតជាប់ៗគ្នា នៅលីគកំពូលកម្ពុជា

ក្លិបបាល់ទាត់ភ្នំពេញក្រោន ក្រោមការដឹកនាំដោយលោក Oleg Strarynskyi នៅតែបន្តភាពខ្លាំងរបស់ខ្លួន ពោលគឹបានរក្សាកំណត់ត្រាឈ្នះ១០ប្រកួតជាប់ៗគ្នានៅលីគកំពូលកម្ពុជា រដូវកាលនេះ ដែលបានតាមស្មើកំណត់ត្រាចាស់របស់ក្លិបបាល់ទាត់ព្រះខ័នរាជស្វាយរៀង កាលពីឆ្នាំមុន។

កាលពីរដូវកាល ២០២៣-២៤ ក្លិបព្រះខ័នរាជស្វាយរៀង ក្រោមការដឹកនាំរបស់លោក 𝗣𝗘𝗣 𝗠𝘂ñ𝗼𝘇 បានយកឈ្នះការប្រកួតចំនួន១០ប្រកួតជាប់គ្នា ហើយក៏បានក្លាយជាម្ចាស់ពានផងដែរ។ចំណែកក្រុមបឹងកេត ក៏ធ្លាប់ធ្វើបានកំណត់ត្រាផងដែរនេះ ពោលគឺនៅឆ្នាំ២០២០ ក្រោយមកពួកគេលើកពាន។

ងាកមកចាប់អាម្មណ៍ក្រុមបាល់ទាត់ភ្នំពេញក្រោន វិញម្ដង ក្រុមដែលមានរហស្សនាមថា សឹងក្រហម បានបន្តរក្សាកំណត់ត្រាមិនដែលចាញ់១០សប្ដាហ៍ជាប់ៗគ្នា ក្រោយពីយកឈ្នះ អាយអេសអាយ ដង្កោសែនជ័យ ក្នុងលទ្ធផល ១ ទល់នឹង ០ កាលពីយប់ថ្ងៃ អាទិត្យ ទី៣ ខែវិច្ឆិកា ឆ្នាំ២០២៤នេះ នាកីឡដ្ឋាន Smart RSN។

ខាងក្រោមនេះជាលទ្ធផលការប្រកួតរបស់ ក្រុមភ្នំពេញក្រោន ទាំង ១០សប្ដាហ៍ ៖
-ភ្នំពេញក្រោន ១-០ អាយអេសអាយ ដង្កោសែនជ័យ
-ភ្នំពេញក្រោន ៣-១ អង្គរថាយហ្គឺរ
-ភ្នំពេញក្រោន ៥-១ សមាគមបាល់ទាតក្រសួងមហាផ្ទៃ
-ភ្នំពេញក្រោន ៤-៣ ព្រះខ័នរាជស្វាយរៀង
-ភ្នំពេញក្រោន ១០-០ ក្លិបបាល់ទាត់ឡាយហ្វ ខេត្តព្រះសីហនុ
-ភ្នំពេញក្រោន ៦-២ ណាហ្គាវើលដ៍
-ភ្នំពេញក្រោន ៦-០ គិរីវង្សសុខសែនជ័យ
-ភ្នំពេញក្រោន ២-១ បឹងកេត
-ភ្នំពេញក្រោន ២-១ កងយោធពលខេមរភូមិន្ទ
-ភ្នំពេញក្រោន ៤-២ វិសាខា ។

គួរបញ្ជាក់ថា គិតត្រឹមជុំទី១នេះ ក្លិបបាល់ទាត់ភ្នំពេញក្រោន កំពុងឈរកំពូលតារាងមាន ៣០ពិន្ទុពេញ ឆ្លងកាត់ការប្រកួត ១០ប្រកួត ឈ្នះទាំងអស់, វិសាខា ឈរលេខ២ មាន ២៤ពិន្ទុ ខណៈ និងអង្គរថាយហ្គឺរ ឈរលេខ៣ មាន ១៩ពិន្ទុ ស្របពេលដែលគីរីវង្សសុខសែនជ័យ ឈរបាតតារាង មាន ១ពិន្ទុ៕