ម្ចាស់មេដាយមាស កីឡាហែលទឹកក្នុងព្រឹត្តិការណ៍អូឡាំពិក ឆ្នាំ២០១៦ ប្រកាសដកខ្លួនចេញពីស៊ីហ្គេម ២០២៣ នៅកម្ពុជា

ម្ចាស់មេដាយមាស កីឡាហែលទឹកក្នុងព្រឹត្តិការណ៍អូឡាំពិក ឆ្នាំ២០១៦ ប្រកាសដកខ្លួនចេញពីស៊ីហ្គេម ២០២៣ នៅកម្ពុជា

នៅរសៀល ថ្ងៃពុធ ទី០១ ខែមីនានេះ កីឡាករហែលទឹក Joseph Schooling ដែលជាម្ចាស់មេដាយមាសកីឡាអូឡាំពិក ឆ្នាំ២០១៦ បានប្រកាសដកខ្លួនចេញពីការប្រកួតកីឡាអាស៊ីអាគ្នេយ៍ នាពេលខាងមុខ ដោយគូសបញ្ជាក់ថា ខ្លួនមិនស្ថិតក្នុងកម្រិតដែលអាចប្រកួតប្រជែងនៅក្នុងព្រឹត្តិការណ៍នេះបានទេ។

កីឡាករហែលទឹករូបនេះបាននិយាយនៅក្នុងសេចក្តីថ្លែងការណ៍មួយថា​៖ «បន្ទាប់ពីការពិចារណាយ៉ាងយកចិត្តទុកដាក់ជាមួយក្រុមរបស់ខ្ញុំ ខ្ញុំបានសម្រេចចិត្តដកខ្លួនចេញពីស៊ីហ្គេម លើកទី៣២នេះ។ នេះមិនមែនជាការសម្រេចចិត្តដ៏ងាយស្រួលនោះទេ ប៉ុន្តែបច្ចុប្បន្ន ខ្ញុំមិនទាន់ស្ថិតក្នុងកម្រិតដែលអាចចូលរួមក្នុងព្រឹត្តិការណ៍នេះទេ»។

ម្ចាស់ជើងឯកអូឡាំពិករូបនេះ បានគូសបញ្ជាក់ថា លោកនឹងផ្តោតលើភារកិច្ចបម្រើជាតិជំនួសវិញ ហើយគាំទ្រមិត្តរួមក្រុមរបស់គាត់ពីផ្ទះ។

Joseph Schooling បាននិយាយថា​ ៖ «ខ្ញុំបានសម្រេចចិត្តផ្តល់កន្លែងរបស់ខ្ញុំ ដល់មិត្តរួមក្រុមដែលបានត្រៀមខ្លួនរួចជាស្រេច និងគាំទ្រពួកគេពីផ្ទះ ហើយផ្តោតលើភារកិច្ចកងទ័ពជើងទឹករបស់ខ្ញុំ»។

គួរបញ្ជាក់ថា Joseph Isaac Schooling គឺជាអ្នកហែលទឹកអាជីពជនជាតិសិង្ហបុរី ដែលមានជំនាញហែលទឹកលើវិញ្ញាសារ មេអំបៅ​(butterfly), ហ្វ្រីស្ទីល​ (freestyle) និងមេឌៀ​ (medley )។ Joseph គឺជាម្ចាស់មេដាយមាសក្នុងវិញ្ញាសាមេអំបៅ 100 ម៉ែត្រ ក្នុងព្រឹត្តិការណ៍អូឡាំពិក ឆ្នាំ ២០១៦ ដោយបានឈ្នះមេដាយមាសអូឡាំពិកលើកដំបូង មិនធ្លាប់មានរបស់ប្រទេសសិង្ហបុរី។

គួររំលឹកថា ព្រឹត្តិការណ៍កីឡាស៊ីហ្គេម ឆ្នាំ២០២៣ នឹងប្រព្រឹត្តទៅចាប់ពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ នៅប្រទេសកម្ពុជា៕