លោក Didier Deschamps បន្តផ្ដល់ឱកាសសម្រាប់កីឡាករថ្មី ទោះបីជា បារាំង ទើបតែចាញ់អ៊ីតាលី ក៏ដោយ

លោក Didier Deschamps បន្តផ្ដល់ឱកាសសម្រាប់កីឡាករថ្មី ទោះបីជា បារាំង ទើបតែចាញ់អ៊ីតាលី ក៏ដោយ

គ្រូបង្វឹកក្រុមមាន់គោកបារាំង លោក Didier Deschamps បាននិយាយថា នឹងប្រកាន់ខ្ជាប់នូវផែនការរបស់លោក ដែលជ្រើសយកការប្រកួត Nations League សម្រាប់ផ្ដល់ឱកាស និងតេស្តសមត្ថភាពកីឡាករថ្មី។
បារាំងបានរងបរាជ័យ ក្នុងលទ្ធផល ៣-១ ក្រោមថ្វីជើងក្រុមអ៊ីតាលី នៅទីក្រុងប៉ារីស កាលពីថ្ងៃសុក្រ ក្នុងការចាប់ផ្តើមយុទ្ធនាការ Nations League របស់ពួកគេ ប៉ុន្តែលោក Deschamps បានទទូចថា នេះនឹងមិនរារាំងលោកពីការធ្វើតាមផែនការដែលបានកំណត់ទុកជាមុនរបស់ខ្លួននោះទេ។

លោក Deschamps បានប្រាប់សន្និសីទសារព័ត៌មានមុនការប្រកួតជាមួយនឹងក្រុមបែលហ្សិក នៅយប់នេះ ថា៖«ការប្រកួត Nations League ចំនួនប្រាំមួយប្រកួត ត្រូវតែផ្ដល់ពេលវេលា សម្រាប់កីឡាករថ្មីបង្ហាញសមត្ថភាព។ប្រសិនបើយើងមានកាលវិភាគផ្សេង ហើយកំពុងលេងវគ្គជម្រុះ World Cup ខ្ញុំនឹងមិនជ្រើសរើសធ្វើបែបនេះទេ។ ប៉ុន្តែខ្ញុំជ្រើសរើស Nations League ព្រោះខ្ញុំជឿថា យើងត្រូវឆ្លងកាត់វា ហើយខ្ញុំនឹងមិនផ្លាស់ប្តូរឱកាសនេះទេ»។
គួរបញ្ជាក់ថា បន្ទាប់ពីបើកការប្រកួត Nations League ចំនួនពីររបស់ពួកគេ បារាំង នឹងប្រកួតជាមួយអ៊ីស្រាអែល និងបែលហ្សិក នៅខែក្រោយ ហើយបញ្ចប់ការប្រកួតក្នុងពូលរបស់ពួកគេ ជាមួយអ៊ីស្រាអែល និងអ៊ីតាលី ក្នុងខែវិច្ឆិកា៕