Xavi ថា Barcelona ប្រឈមមុខនឹងក្រុម Manchester United ល្អបំផុត ក្នុងរយៈពេលជាច្រើនឆ្នាំ

Xavi ថា Barcelona ប្រឈមមុខនឹងក្រុម Manchester United ល្អបំផុត ក្នុងរយៈពេលជាច្រើនឆ្នាំ

(បាល់ទាត់)៖ ក្រុមអ្នកមានបុណ្យ FC Barcelona និងក្រុមបិសាចក្រហម Manchester United ធ្វើល្អបំផុតអស់រយៈពេលជាច្រើនឆ្នាំ ជាពិសេសក្នុងការប្រកួតជើងទីពីរនៃវគ្គជម្រុះ Europa League របស់ពួកគេនៅ Old Trafford។ នេះបើយោងតាមសម្ដីគ្រូបង្វឹករបស់ Barcelona លោក Xavi Hernandez បាននិយាយកាលពីថ្ងៃពុធ ទី២២ ខែកុម្ភៈនេះ។

បន្ទាប់ពីស្មើគ្នាក្នុងលទ្ធផល ២-២ នៃការប្រកួតដ៏ស្វិតស្វាញនៅឯកីឡដ្ឋាន Camp Nou ប្រទេសអេស្ប៉ាញ លោក Xavi ជឿជាក់ថា ក្រុមរបស់លោកនឹងត្រូវធ្វើឱ្យអស់ពីសមត្ថភាពរបស់ពួកគេនៅយប់ថ្ងៃព្រហស្បតិ៍នេះ ដើម្បីឈានទៅវគ្គ ១៦ ក្រុមចុងក្រោយ។

Xavi បានប្រាប់សន្និសីទសារព័ត៌មានថា៖«វានឹងក្លាយជាការប្រកួតដ៏លំបាកមួយ ព្រោះ Manchester United គឺជាក្រុមដ៏ល្អបំផុតមួយនៅក្នុងទ្វីបអឺរ៉ុប នាពេលបច្ចុប្បន្ននេះ ហើយពួកគេកំពុងបង្ហាញវាគ្រប់ការប្រកួត។ Ten Hag កំពុងធ្វើការងារដ៏អស្ចារ្យ យើងអាចនិយាយបានថា Manchester United បានត្រលប់មកវិញ ហើយពួកគេកំពុងលេងបាល់ទាត់ល្អបំផុតរបស់ពួកគេក្នុងរយៈពេលជាច្រើនឆ្នាំ។ វាជាឱកាសដ៏ល្អ ដើម្បីបង្ហាញថា Barca ក៏អាចប្រកួតប្រជែងបានដែរ»។

គួរបញ្ជាក់ថា Man Utd មិនស្គាល់ចាញ់សោះក្នុងការប្រកួតប្រាំបីលើកចុងក្រោយរបស់ពួកគេ គិតគ្រប់ព្រឹត្តិការណ៍ទាំងអស់ ហើយកំពុងឈរលេខ៣ ក្នុងតារាង Premier League មាន ៤៩ ពិន្ទុ ដោយតាមពីក្រោយក្រុមកំពូលតារាង Arsenal ចំនួន ៥ពិន្ទុ៕