អបអរសាទរ! ព្រះខ័នរាជស្វាយរៀង យកឈ្នះ ក្រុម Young Elephants របស់ឡាវ ក្នុងជើងទី១
អបអរសាទរ! ព្រះខ័នរាជស្វាយរៀង យកឈ្នះ ក្រុម Young Elephants របស់ឡាវ ក្នុងជើងទី១
គ្រាប់បាល់ពីរគ្រាប់ចុងម៉ោង របស់កីឡាករ Christian Roque Silveira Dos Santos និង ញាណ សុស៊ីដាន នៅនាទី៩០ និងនាទី ៩០+ បានជួយឱ្យក្រុមស្វាយរៀង របស់កម្ពុជា យកឈ្នះ ក្រុមម្ចាស់ផ្ទះ Young Elephants របស់ឡាវ ក្នុងលទ្ធផល ៣-២ ក្នុងការប្រកួតជម្រុះជើងទី១ ពានរង្វាន់ក្លឹបប្រចាំតំបន់អាស៊ាន (ASEAN Club Championship-Shopee Cup 2024/2025)។
គ្រាប់បាល់៣គ្រាប់របស់ព្រះខ័នរាជស្វាយរៀង រកបានដោយកីឡាករ Gabriel Silva Costa នៅនាទីទី១៩, Christian Roque Silveira Dos Santos នៅនាទី៩០ និងកីឡាករចំណូលថ្មី ញាណ សុស៊ីដាន នៅនាទី ៩០+ ខណៈ ២គ្រាប់របស់ Young Elephants រកបានដោយអតីតកីឡាករវិសាខា Takumu Nishhara នាទីទី៣៤ និងកីឡាករ Shokhrukh Mahmudxojiyev នៅនាទី ៣៧។
ក្នុងថ្ងៃជាមួយគ្នានេះ ក៏មានការប្រកួតជម្រុះមួយគូទៀតដែរ ដោយក្រុម Kasuka FC របស់ប្រ៊ុយណេដារូសាឡឹម បានត្រឹមស្មើ ជាមួយ Shan United របស់ពីមីយ៉ាន់ម៉ា ក្នុងលទ្ធផល ១-១ ។
ក្រុមព្រះខ័នរាជស្វាយរៀង និង Young Elephants ត្រូវជួបគ្នាម្ដងទៀត នៅជើងទី២ នៅពហុកីឡដ្ឋានជាតិអូឡាំពិក នាថ្ងៃទី២៤ ខែកក្កដា ឆ្នាំ២០២៤ នៅលើទឹកដីកម្ពុជា ដើម្បីកាត់សេចក្ដីរកអ្នកឈ្នះឡើងទៅកាន់វគ្គ Group Stage ។
គួរឱ្យដឹងផងដែរថា បើព្រះខ័នរាជស្វាយរៀង ឆ្លងផុតវគ្គ Play-Off ជាមួយនឹង Young Elephants FC នោះព្រះខ័នរាជស្វាយរៀង នឹងឡើងទៅវគ្គ Group Stage ក្នុងពូល A មាន BG Pathum United FC របស់ថៃ , Terengganu FC របស់ម៉ាឡេស៊ី, PSM Makassar របស់ឥណ្ឌូនេស៊ី , Đông Á Thanh Hóa FC របស់វៀតណាម និង Play-off2 (Kasuka FC/Shan United FC)៕
