លោក Netanyahu៖ ការវាយប្រហាររបស់កងទ័ពអ៊ីស្រាអែលឈានជិតដល់ «ចុងបញ្ចប់នៃដំណាក់កាលកម្ចាត់» កងទ័ពហាម៉ាសនៅហ្គាហ្សា
លោក Netanyahu៖ ការវាយប្រហាររបស់កងទ័ពអ៊ីស្រាអែលឈានជិតដល់ «ចុងបញ្ចប់នៃដំណាក់កាលកម្ចាត់» កងទ័ពហាម៉ាសនៅហ្គាហ្សា
បរទេស៖ នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃចន្ទថា យោធារបស់ប្រទេសនេះឈានជិតដល់ «ដំណាក់កាលនៃការលុបបំបាត់« កងទ័ពរបស់ក្រុម Hamas នៅក្នុងតំបន់ Gaza ។
លោក Netanyahu ថ្លែងថា៖«ខ្ញុំបានធ្វើដំណើរទស្សនកិច្ចទៅកាន់ផ្នែកខ្លះនៃតំបន់ Gaza ។ ខ្ញុំបានឃើញសមិទ្ធផលដ៏សន្ធឹកសន្ធាប់ក្នុងការប្រយុទ្ធគ្នាដែលត្រូវបានធ្វើនៅក្នុងក្រុង Rafah។ យើងកំពុងឈានទៅដល់ទីបញ្ចប់នៃដំណាក់កាលនៃការកម្ចាត់កងទ័ពភេរវជនហាម៉ាស។ យើងនឹងបន្តវាយលុកនៅទីតាំងដែលសេសសល់។
លោក Netanyahu ថ្លែងបែបនេះ ទៅកាន់ក្រុមមន្ត្រីយោធាអ៊ីស្រាអែល និងអន្តរជាតិភាគច្រើនដែលកំពុងសិក្សានៅមហាវិទ្យាល័យសន្តិសុខជាតិ។
ជាមួយគ្នានោះ លោក Netanyahu បានប្តេជ្ញាម្តងទៀតថា អ៊ីស្រាអែលនឹងសម្រេចបាននូវគោលដៅរបស់ខ្លួនក្នុងសង្គ្រាមប្រឆាំងនឹងក្រុមហាម៉ាស ដោយធានាថា នឹងនាំយកចំណាប់ខ្មាំងពីហ្គាហ្សា លុបបំបាត់យោធា និងសមត្ថភាពគ្រប់គ្រងរបស់ហាម៉ាស ដោយធានាថា តំបន់ហ្គាហ្សានឹងមិនបង្កើតការគំរាមកំហែងប្រឆាំងនឹងអ៊ីស្រាអែលទៀតទេ ហើយថែមទាំងបញ្ជូនអ្នកស្រុកអ៊ីស្រាអែលដែលផ្លាស់ទីលំនៅមកវិញដោយសុវត្ថិភាពទៅកាន់ផ្ទះរបស់ពួកគេទាំងពីរ គឺនៅ ខាងត្បូង និងខាងជើង។
មុនពេលចាប់ផ្តើមប្រតិបត្តិការយោធានៅក្រុង Rafah ក្នុងខែឧសភា មេដឹកនាំអ៊ីស្រាអែលបានអះអាងថា ទីក្រុង Gaza ភាគខាងត្បូង គឺជាបន្ទាយចុងក្រោយរបស់ក្រុមហាម៉ាស។
លោក Netanyahu បាននិយាយកាលពីខែមុនថា “ដំណាក់កាលដ៏ខ្លាំងក្លានៃសង្គ្រាមជាមួយក្រុមហាម៉ាស (នៅហ្គាហ្សា) ជិតបញ្ចប់ហើយ” ហើយថាការផ្តោតអារម្មណ៍របស់យោធាអាចផ្លាស់ប្តូរទៅព្រំដែនភាគខាងជើងរបស់អ៊ីស្រាអែលជាមួយប្រទេសលីបង់។
លោក Netanyahu បានប្រាប់ទូរទស្សន៍ Channel 14 នៅថ្ងៃទី ២៣ ខែមិថុនា ថា ៖«វាមិនមានន័យថាសង្រ្គាមនឹងបញ្ចប់នោះទេ ប៉ុន្តែសង្រ្គាមនៅក្នុងដំណាក់កាលបច្ចុប្បន្នរបស់វានឹងត្រូវបញ្ចប់នៅក្រុង Rafah ។ វាជាការពិត។ យើងនឹងបន្តកាត់ស្មៅនៅពេលក្រោយ»។
អ៊ីស្រាអែលបានបើកការវាយលុកយោធារបស់ខ្លួននៅតំបន់ហ្គាហ្សា បន្ទាប់ពីការវាយប្រហារដោយក្រុមហាម៉ាស់កាលពីថ្ងៃទី ៧ ខែតុលា ទៅលើភាគខាងត្បូងអ៊ីស្រាអែល ដែលក្នុងនោះមនុស្សយ៉ាងហោចណាស់ ១,២០០ នាក់ត្រូវបានសម្លាប់ និងជាង ២៥០ នាក់ផ្សេងទៀតត្រូវបានចាប់ពង្រត់។
ចាប់តាំងពីពេលនោះមក ការវាយប្រហាររបស់អ៊ីស្រាអែលនៅតំបន់ហ្គាហ្សាបានសម្លាប់ជនជាតិប៉ាឡេស្ទីនយ៉ាងតិច ៣៧.៧១៨ នាក់ និងរបួស ៨៦.៣៧៧ នាក់ផ្សេងទៀត។ នេះបើយោងតាមមន្ត្រីសុខាភិបាលហ្គាហ្សា៕
