ឪពុករបស់ Lionel Messi ៖ ខ្ញុំមិនគិតថា Leo នឹងលេងឱ្យ Barcelona ម្តងទៀតទេ
ឪពុករបស់ Lionel Messi ៖ ខ្ញុំមិនគិតថា Leo នឹងលេងឱ្យ Barcelona ម្តងទៀតទេ
កាលពីថ្ងៃព្រហស្បតិ៍ ទី១៦ ខែកុម្ភៈ ម្សិលមិញនេះ ឪពុករបស់កីឡាករ Lionel Messi លោក Jorge Messi បានបដិសេធពីលទ្ធភាពដែលម្ចាស់ជើងឯក World Cup ២០២២ ត្រលប់មក Barcelona វិញ នៅរដូវក្តៅខាងមុខនេះ ប្រសិនបើគាត់សម្រេចចិត្តចាកចេញពី Paris Saint-Germain ។
កីឡាករវ័យ ៣៥ ឆ្នាំរូបនេះ មានទម្រង់លេងយ៉ាងល្អក្នុងរដូវកាលនេះ សម្រាប់ក្លឹប និងប្រទេស ហើយស៊ុតបញ្ចូលទីបាន ២៨ គ្រាប់ ក្នុងការបង្ហាញខ្លួនត្រឹមតែ ២៤ លើកប៉ុណ្ណោះ នៅ Ligue 1 និង Champions League ។ យ៉ាងណា កាសែតបារាំង L’Equipe អះអាងថា ក្លិបមិនសូវជាចង់ឲ្យ Messi បន្តនៅក្លឹបលើសពីចុងបញ្ចប់នៃរដូវកាលនេះឡើយ។ រូបគេនឹងផុតកុងត្រានៅរដូវក្ដៅ ទោះបីជាមានជម្រើសក្នុងការបន្តស្នាក់នៅមួយឆ្នាំបន្ថែមទៀតក៏ដោយ។
ដំបូងឡើយ PSG សង្ឃឹមថា នឹងអាចបញ្ចុះបញ្ចូលគាត់ឱ្យស្នាក់នៅបានយូរជាងនេះ ប៉ុន្តែរហូតមកដល់ពេលនេះ កីឡាករអន្តរជាតិអាហ្សង់ទីន មិនទាន់ទទួលយកសំណើនេះទេ ហើយការពិភាក្សាកំពុងជាប់គាំង។ នោះបានជំរុញឱ្យមានរបាយការណ៍លើកឡើងថា គាត់អាចផ្លាស់ទៅកាន់ទ្រនំចាស់វិញ ក្នុងទឹកដី Camp Nou។
ជុំវិញពាក្យចចាមរាមនេះ ឪពុករបស់ Messi លោក Jorge បានប្រាប់កាសែតអេស្ប៉ាញ Sport នៅពេលដែលគាត់បានហោះចេញពីទីក្រុង Catalan កាលពីរសៀលថ្ងៃព្រហស្បតិ៍ថា ៖« ខ្ញុំមិនគិតថា Leo នឹងលេងឱ្យ Barcelona ម្តងទៀតទេ។ លក្ខខណ្ឌមិនត្រូវបានបំពេញ។ យើងមិនបាននិយាយជាមួយ ប្រធានក្លឹប Barcelona លោក Joan Laporta ឡើយ ហើយមិនមានការផ្តល់ជូននៅលើតុនោះទេ។ ខ្ញុំមិនដឹងថា វាមិនអាចទៅរួច ឬយ៉ាងណានោះទេ ប៉ុន្តែគាត់ស្ថិតក្រោមកុងត្រាជាមួយ PSG»៕
