រដ្ឋបាលខេត្តសៀមរាប និងក្រុង TAKAMATSU ខេត្ត KAGAWA ប្រទេសជប៉ុន ចុះហត្ថលេខាលើអនុស្សរណៈ នៃការយោគយល់គ្នាស្តីពីការអនុវត្តគំនិតផ្តួចផ្តើមទីក្រុងឆ្លាតវៃ

ដោយ៖ Volak ENN | ថ្ងៃពុធ ទី៧ ខែកុម្ភៈ ឆ្នាំ២០២៤ ព័ត៌មានជាតិ

សៀមរាប៖ រដ្ឋបាលខេត្តសៀមរាប ដឹកនាំដោយឯកឧត្តម ប្រាក់ សោភ័ណ អភិបាលនៃគណៈអភិបាលខេត្ត និង ក្រុងTAKAMATSU ខេត្ត KAGAWA ប្រទេសជប៉ុន ដឹកនាំដោយលោក អូនីស្ហ៊ិ ហ៊ីដេតុ(ONISHI Hideto) អភិបាលក្រុង TAKAMATSU បានចុះហត្ថលេខាលើអនុស្សរណៈ នៃការយោគយល់គ្នា ស្តីពីការអនុវត្តគំនិតផ្តួចផ្តើមទីក្រុងឆ្លាតវៃ តាមរយៈប្រព័ន្ធអនឡាញ នៅបន្ទប់ប្រជុំ Video Conference សាលាខេត្តសៀមរាប នារសៀលថ្ងៃទី៦ ខែកុម្ភៈ ឆ្នាំ២០២៤ម្សិលមិញនេះ ។

ឯកឧត្តម ប្រាក់ សោភ័ណ អភិបាល នៃគណៈអភិបាលខេត្ត មានប្រសាសន៍ថា ខេត្តសៀមរាបត្រូវបានដាក់បញ្ចូលជាសមាជិកនៃបណ្តាញទីក្រុងឆ្លាតវៃអាស៊ាន(ASEAN Smart City Network) ក្នុងកិច្ចប្រជុំកំពូលអាស៊ានលើកទី៣២ នាឆ្នាំ២០១៨ នៅប្រទេសសិង្ហបុរី ហើយនៅឆ្នាំ២០១៩ រដ្ឋបាលខេត្តសៀមរាប ក៏បានទទួលជំនួយកិច្ចសហប្រតិបត្តិការបច្ចេកទេស ពីទីភ្នាក់ងារសហប្រតិបត្តិការអន្តរជាតិជប៉ុន ដែលហៅកាត់ថា JICA ទៅលើការសិក្សា និងការរៀបចំផែនការយុទ្ធសាស្រ្តអភិវឌ្ឍន៍ទីក្រុងសៀមរាប ឱ្យក្លាយទៅជាទីក្រុងឆ្លាតវៃ ព្រមទាំងទទួលបាននូវការគាំទ្រយ៉ាងពេញទំហឹងពី JICA ទៅលើការអនុវត្តគម្រោងសាកល្បងទីក្រុងឆ្លាតវៃចំនួន៨ នៅក្នុងក្រុងសៀមរាប។

ឯកឧត្តមបន្តថា JICA ជាតួអង្គមួយដ៏សំខាន់ ដែលបានជួយជ្រោមជ្រែងលើការងារកិច្ចសហប្រតិបត្តិការទីក្រុងឆ្លាតវៃរវាងខេត្តសៀមរាប នៃព្រះរាជាណាចក្រកម្ពុជា និងក្រុង TAKAMATSU ខេត្ត KAGAWA នៃប្រទេសជប៉ុន រហូតដល់មានការចុះអនុស្សរណៈនៃការយោគយល់គ្នារវាងភាគីទាំងពីរនាពេលនេះ ហើយឯកឧត្តម ជឿជាក់ថាកិច្ចសហការនេះនឹងនាំមកនូវលទ្ធផលជាទីមោទនៈបន្ថែមទៀតដើម្បីញ៉ាំងឱ្យការអនុវត្តទីក្រុងឆ្លាតវៃរវាងខេត្ត ក្រុងទាំងពីរកាន់តែមានភាពរីកចម្រើន ស្របតាមនិន្នាការសកលនៃបរិបទឧស្សាហកម្មជំនាន់ទី៤។

ក្នុងឱកាសនោះដែរ ឯកឧត្តម អភិបាលខេត្តសៀមរាប បានសម្ដែងនូវការអរគុណ ចំពោះរដ្ឋាភិបាល នៃប្រទេសជប៉ុន ក៏ដូចជាប្រជាពលរដ្ឋជប៉ុន និងទីក្រុង Takamatsu នៃខេត្ត KAGAWA ផ្ទាល់ដែលជានិច្ចជាកាល តែងតែផ្តល់នូវការជួយឧបត្ថម្ភគាំទ្រគ្រប់បែបយ៉ាងដល់ប្រទេសកម្ពុជា ក៏ដូចជាខេត្តសៀមរាបនាពេលកន្លងមក និងបានថ្លែងអំណរគុណដល់ លោក លោកស្រី អភិបាលរងខេត្តទទួលបន្ទុកទីក្រុងឆ្លាតវៃ និងភាគីJICA ដែលបានផ្តល់កិច្ចសហការ ក្នុងការអនុវត្តគម្រោងទីក្រុងសៀមរាបឆ្លាតវៃប្រកបដោយផ្លែផ្កាក្នុងរយៈកាលកន្លងមកនេះ ។

ជាមួយគ្នានេះដែរ លោក ONISHI Hideto អភិបាលក្រុង TAKAMATSU ខេត្ត KAGAWA នៃប្រទេសជប៉ុន បានលើកឡើងពីទំនាក់ទំនងនិងកិច្ចសហប្រតិបត្តិការរវាងខេត្តទាំងពីរ តាមរយៈផ្លាស់ប្តូរទសនស្សកិច្ចសិក្សាទៅវិញទៅមក និង បានទស្សនាប្រព័ន្ឋការពារគ្រោះមហន្តរាយ និងជួបសំណេះសំណាលជាមួយបណ្តាវិស័យនានាជាច្រើន និងបានប្រជុំតាមប្រព័ន្ឋអនឡាញពាក់ព័ន្ឋទៅនឹងគម្រោងផែនការទីក្រុងឆ្លាតវៃនេះផងដែរ ព្រមទាំងបានចូលរួមបណ្តុះបណ្តាលធនធានមនុស្សក្នុងវិស័យទីក្រុងឆ្លាតវៃ ពិសេសការចុះអនុស្សារៈណៈយោគយល់គ្នានាពេលនេះ នឹងជំរុញឱ្យទំនាក់ទំនងកិច្ចប្រតិបត្តិការអនុវត្តទីក្រុងឆ្លាតវៃរវាងក្រុង TAKAMATSU ខេត្ត KAGAWAនៃប្រទេសជប៉ុន និងទីក្រុងសៀមរាប ខេត្តសៀមរាបនៃព្រះរាជាណាចក្រកម្ពុជាកាន់តែដំណើរការទៅដោយរលូននិងជោគជ័យ ។

លោក KAWAMURA Kenichi អនុប្រធានជាន់ខ្ពស់នៃ JICA មានប្រសាសន៍ថា ការចុះអនុស្សារៈណៈនៃការយោគយល់នេះ គឺជាសក្ខីភាពមួយបង្ហាញអំពីកិច្ចសហប្រតិបត្តិការក្នុងការជំរុញនិងអភិវឌ្ឍវិស័យនានាដោយប្រើប្រាស់បច្ចេកវិទ្យាឌីជីថលនិងការបណ្តុះបណ្តាលធនធានមនុស្សនិងការផ្លាស់ប្តូរទំនាក់ទំនងពាក់ព័ន្ឋនឹងទីក្រុងឆ្លាតវៃរវាងទីក្រុងនៃខេត្តទាំងពីរ។

លោក បន្តថា ទំនាក់ទំនងនិងកិច្ចសហប្រតិបត្តិការនេះចាប់ផ្តើមនៅឆ្នាំ២០២០ ហើយ នៅខែឧសភាឆ្នាំ២០២២យើងចាប់អនុវត្តគម្រោងនិងវិធីសាស្ត្រទីក្រុងឆ្លាតវៃជាគម្រោងបច្ចេកទេសដែលមានភាគីពាក់ព័ន្ឋចូលរួមាច្រើនដោយប្រើប្រាស់បច្ចេកវិទ្យាឆ្លាតវៃដើម្បីសម្រេចបាននូវការគ្រប់គ្រងនិងដោះស្រាយបញ្ហាដែលកើតមានឱ្យមានភាពល្អប្រសើរ។

គួររំលឹកថា ក្នុងគម្រោងនេះ រដ្ឋបាលខេត្តសៀមរាប និង JICA បានសហការគ្នាយ៉ាងស្អិតរមួត ទាំងការជំរុញការអនុវត្តនិងពង្រឹងការអនុវត្តសមត្ថភាពជាដើម ហើយកាលពីខែកក្កដាឆ្នាំ២០២៣ ទីក្រុង TAKAMATSU បានរៀបចំកិច្ចប្រជុំG7ដោយបានបង្កើតនូវគោលការណ៍ ដូចជាការអនុវត្តវីធីសាស្ត្រគោលនយោបាយកម្រិតខ្ពស់សម្រាប់ក្រុមប្រកបដោយនិរន្តរភាព ផ្សព្វផ្សាយផែនការទីក្រុងឆ្ពោះទៅកាន់ការអភិវឌ្ឍប្រកបដោយនិរន្តរភាព និងសហប្រតិបត្តិការគាំទ្រដល់ការផ្លាស់ប្តូរទំនាក់ទំនងអន្តរជាតិជាមួយប្រទេសកំពុងអភិវឌ្ឍ។

តាមរយៈការអនុវត្តគំនិតផ្តួចផ្តើមគម្រោងទីក្រុងឆ្លាតវៃ នេះនឹងអនុញ្ញាតឱ្យទីក្រុងទាំងពីរទទួលបាននូវការផ្លាស់ប្តូរបទពិសោធល្អៗលើការប្រើប្រាស់បច្ចេកវិទ្យាឌីជីថល និងសកម្មភាពទីក្រុងឆ្លាតវៃជាមួយគ្នានឹងការអភិវឌ្ឍធនធានមនុស្ស ក៏ដូចជាការលើកកម្ពស់ការប្រើប្រាស់បច្ចេកវិទ្យាឌីជីថលក្នុងខេត្តសៀមរាប និងក្រុង Takamatsu ឱ្យកាន់តែមានភាពជឿនលឿន និងប្រកបដោយប្រសិទ្ធភាពបន្ថែមមួយកម្រិតទៀត៕

អត្ថបទទាក់ទង